ބެލޮންޑިއޯ އެވޯޑު: އެންމެ މޮޅު ގޯލް ކީޕަރަކަށް އާޖެންޓީނާގެ މާޓިނޭޒް

ފްރާންސް ފުޓުބޯޅަ އިން ދެމުން އަންނަ ބެލޮންޑިއޯ އެވޯޑުގެ އެންމެ މޮޅު ގޯލް ކީޕަރަކަށް އެސްޓަން ވިލާ އަށް ކުޅެމުން އަންނަ އާޖެންޓީނާގެ އެމިލިއާނޯ މާޓިނޭޒް ހޮވިއްޖެ އެވެ.

މި އެވޯޑު މާޓިނޭޒް ހާސިލްކޮށްފައި ވަނީ މޮރޮކޯގެ ޔާސީން ބޯނޯ، ބެލްޖިއަމްގެ ތިބައޫ ކޯޓުއާ، ބްރެޒިލްގެ އެޑާސަން އަދި ޖަރުމަނުގެ މާކް އަންދްރޭ ޓަ ސްޓެގަންއާ ވާދަކޮށެވެ. މާޓިނޭޒް އަށް އެވޯޑު ހަވާލު ކޮށްދިނީ އޭނާގެ ބައްޕަ އަލްބާޓޯ މާޓިނޭޒް އެވެ.

ބެލޮންޑިއޯ ހާސިލް ކުރި މާޓިނޭޒް ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުގައި މޮޅު ކުޅުމެއް ދައްކައިފަ އެވެ. އެގޮތުން މުބާރާތުގެ ކުއާޓާ ފައިނަލްގައި ނެދަލެންޑްސްއާ ދެކޮޅަށް ކުޅުނު މެޗުގެ ޕެނަލްޓީ ޝޫޓް އައުޓްގައި އޭނާ ވަނީ މޮޅު ސޭވްތަކެއް ކޮށްފަ އެވެ. މީގެ އިތުރުން ފްރާންސްއާ ދެކޮޅަށް ކުޅުނު ފައިނަލް މެޗުގައި މޮޅު ސޭވްތަކެއް ކުރިއިރު، ފްރާންސްގެ ޕެނަލްޓީ އޭނާ ވަނީ ހުއްޓުވައިފަ އެވެ. މާޓިނޭޒް ވަނީ އާޖެންޓީނާއާއެކު އެ މުބާރާތް ކާމިޔާބު ކުރުމުގެ އިތުރުން މުބާރާތުގެ އެންމެ މޮޅު ގޯލް ކީޕަރުގެ މަޤާމު ވެސް ހޯދައިފަ އެވެ. އެއާއެކު މާޓިނޭޒް ވަނީ ފީފާ އިން ހޮވި އަހަރުގެ އެންމެ މޮޅު ގޯލް ކީޕަރުގެ އެވޯޑު ވެސް ހާސިލްކޮށްފަ އެވެ.

އުމުރުން 31 އަހަރުގެ މާޓިނޭޒް އަންނަނީ އިނގިރޭސި ޕްރިމިއާ ލީގުގެ އެސްޓަން ވިލާގައި ވެސް މޮޅު ކުޅުމެއް ދައްކަމުންނެވެ.

މީގެ އިތުރުން މިއަހަރުގެ ޖާޑް މުލާ އެވޯޑު ހާސިލްކޮށްފައި ވަނީ މެންޗެސްޓަރ ސިޓީ އަށް ކުޅެމުން އަންނަ ނޯވޭގެ އާލިން ހާލަންޑް އެވެ. ހާލަންޑް މި އެވޯޑު ހާސިލްކޮށްފައި ވަނީ ޕޮލެންޑުގެ ރޮބާޓް ލެވަންޑޯސްކީ، އާޖެންޓީނާގެ ލިއޮނަލް މެސީ، އިންގްލެންޑުގެ ހެރީ ކޭން އަދި ފްރާންސްގެ ކީލިއަން އެމްބާޕޭއާ ވާދަކޮށެވެ. ހާލަންޑް ވަނީ މިދިޔަ ސީޒަންގައި 56 ލަނޑު ޖަހައިފަ އެވެ. މި އެވޯޑަކީ އަހަރުގެ އެންމެ މޮޅު ސްޓަރައިކަރ އަށް ދެމުން އަންނަ އެވޯޑެކެވެ.