މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ހޯމަ ދުވަހަށް އެޖެންޑާކުރި ޖަލްސާ ކެންސަލްވީ ގޮތުގެ ތަފްސީލް ހިއްސާކޮށްދިނުމަށް އެމްޑީޕީން އެދިއްޖެއެވެ.

އެމްޑީޕީގެ ޕީޖީ ގްރޫޕްގެ ލީޑަރ މުހައްމަދު އަސްލަމް ސޮއިކުރައްވާ މަޖިލީހުގެ އަމީން ޢާއްމު ފާތިމަތު ނިއުޝާ އަށް އެޑްރެސްކުރައްވާ ފޮނުއްވި ސިޓީގައި ބުނެފައި ވަނީ 2023 ވަނަ އަހަރުގެ 30 އޮކްޓޯބަރ ވީ ހޯމަ ދުވަހުގެ ހެނދުނު 09:00ގައި ބޭއްވުމަށް ހަމަޖެއްސި ޖަލްސާގެ ނޯޓިސް 29 އޮކްޓޯބަރ 2023ވީ އާދިއްތަ ދުވަހު މެމްބަރުންނަށް ފޮނުވާފައިވާ ކަމަށެވެ. އެހެންނަމަވެސް 30 އޮކްޓޯބަރ 2023ގައި ހެނދުނު 06:30ގައި ޖަލްސާ ކެންސަލް ވެފައިވާކަން މެމްބަރުންނަށް މަޖިލީހުގެ އިދާރާއިން ވަނީ މެސެޖުކުރައްވާފައިކަން އެ ސިޓީގައި ފާހަގަކުރައްވާފައިވެއެވެ.

އެހެންކަމުން ހޯމަ ދުވަހަށް ތާވަލްކުރި މަޖިލީހުގެ 2023 ވަނަ އަހަރުގެ ތިން ވަނަ ދައުރުގެ 15 ވަނަ ޖަލްސާގެ ނޯޓިސް މެމްބަރުންނަށް ދިނުމަށް ފަހު، އެ ޖަލްސާ ކެންސަލްކުރެއްވީ ރައްޔިތުންގެ މަޖިލީހުގެ ގަވާއިދުގެ ކޮން މާއްދާއެއްގެ ދަށުންތޯ އާއި އެ ޖަލްސާ ކެންސަލް ކުރެއްވީ ކޮން ބޭފުޅެއްކަން ސާފުކުރުމަށް އެ ސިޓީގައި ވަނީ އެދިވަޑައިގެންފައެވެ.

ނަޝީދުގެ އިތުބާރު ނެތްކަމުގެ މައްސަލަ އަނެއްކާވެސް ބުދަދުވަހަށް ވަނީ ތާވަލްކޮށްފައެވެ.