ރެއާލް މެޑްރިޑަށް ކުޅެމުން އަންނަ އިންގްލެންޑުގެ މިޑްފީލްޑަރު ޖޫޑް ބެލިންހަމް އަކީ އައު ކުޅުންތެރިޔެއްގެ ގޮތުގައި ސިފަ ނުވާ ކަމަށް އެ ޓީމުގެ މިޑްފީލްޑަރު ލޫކާ މޮޑްރިޗް ބުނެފި އެވެ.

މޮޑްރިޗް މިހެން ބުނީ ބޮރޫޝިއާ ޑޯޓްމަންޑުގައި ހުރުމަށްފަހު ރެއާލަށް ބަދަލުވެ އުމުރުން 20 އަހަރުގެ ކުޅުންތެރިޔާ ދައްކަމުން އަންނަ ކުޅުމާ ގުޅޭ ގޮތުން ވާހަކަ ދައްކަމުންނެވެ. އެގޮތުން ސްޕެނިޝް ލީގުގައި ރެއާލުން ބާސެލޯނާއާ ދެކޮޅަށް ކުޅުނު މެޗުގައި ބެލިންހަމް ވަނީ ދެ ލަނޑު ޖަހައި އެ ޓީމު މޮޅު ކޮށްދީފަ އެވެ. މިއަހަރުގެ ޖޫން މަހު ރެއާލަށް ބަދަލުވި ބެލިންހަމް ވަނީ މިހާތަނަށް އެ ކުލަބަށް ކުޅެދިން 13 މެޗުގައި، 13 ލަނޑު ޖަހައިފަ އެވެ. އޭގެ ތެރެއިން 10 ލަނޑަކީ ސްޕެނިޝް ލީގުގައި އޭނާ ޖެހި ލަނޑެވެ.

މޮޑްރިޗް ބުނީ، އޭނާ އަށް އިހުސާސްވަނީ ބެލިންހަމް އަކީ ގިނަ ދުވަސްތަކެއް ވަންދެން ރެއާލްގައި ހުރި ކުޅުންތެރިޔެއްގެ ގޮތުގައި ކަމަށެވެ. އޭނާ އެ ކުލަބާ ގުޅުނުތާ އެންމެ ތިން މަސް ވެފައިވާ ކަމުގެ އިހުސާސް ނުކުރެވޭ ކަމަށް ވެސް މޮޑްރިޗް ވަނީ ބުނެފަ އެވެ. މޮޑްރިޗް ބުނީ ރެއާލްގައި ބެލިންހަމް ދައްކަމުން އަންނަ ކުޅުމާމެދު އެ ޓީމުގެ އެންމެހާ ކުޅުންތެރިން ތިބީ އުފަލުން ކަމަށެވެ. އޭނާ ދެކޭ ގޮތުގައި އެހާ އަވަސް މުއްދަތަކެއްގައި ރެއާލްގެ ވައްޓަފާޅި އަށް ބެލިންހަމް ފިޓުވުމަކީ އިއްތިފާގެއް ނޫނެވެ. މޮޑްރިޗް ބުނީ ބެލިންހަމް އަކީ މަތީ ފަންތީގައި ކުޅެމުން އަންނަ ކުޅުންތެރިޔެއް ކަމަަށާއި، ކޮންމެ ދުވަހަކު ބެލިންހަމް އަންނަނީ އޭނާގެ ފެންވަރު ސާބިތު ކޮށްދެމުން ކަމަށެވެ.

ރެއާލަށް ބަދަލުވެ އެ ޓީމުގައި އޭނާ ދައްކަމުން އަންނަ މޮޅު ކުޅުމުގެ ސަބަބުން، ރެއާލްގެ ކޯޗު ކާލޯ އަންޗެލޮޓީ ވެސް ވަނީ އެކި ފަހަރު މަތިން ބެލިންހަމަށް ތައުރީފު ކޮށްފަ އެވެ. އޭނާ ރެއާލަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ.