މަޖިލިސް ހުއްޓިފައި އޮތީ، ރިޔާސަތާއި އަމީން އާއްމު މަޖިލިސް ކުރިއަށް ގެންދަވަން ބޭނުންފުޅުނުވާތީ - ސަނީފް
ގާނޫނީ ފަރުވާއެއް ލިބޭނީ ކޯޓުންކަންވެސް އޭނާ ވަނީ ފާހަގަކުރައްވާފައި
ތިނަދޫ ދެކުނު ދާއިރާގެ މެމްބަރު، އަބްދުﷲ ސަނީފް
މަޖިލިސް ހުއްޓިފައި އޮތީ، ރިޔާސަތާއި އަމީން އާއްމު މަޖިލިސް ކުރިއަށް ގެންދަވަން ބޭނުންފުޅުނުވާތީ ކަމަށް، ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންދެވި، މަޖިލިސް ހުއްޓުމަކަށް އައިސްފައިވާ މައްސަލައާ ގުޅޭގޮތުން ވާހަކަފުޅުދައްކަވަމުން ސަނީފް ވިދާޅުވީ އެ މައްސަލަ ކުރިއަށް ނުގެންދެވުމަކީ މެމްބަރުން ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށެވެ. މަޖިލީހުގެ ޖަލްސާތައް އެޖެންޑާކުރަނީ ރިޔާސަތާ މަޝްވަރާކޮށްގެން ކަމަށް ވާއިރު، ގަސްތުގައި ޖަލްސާއަށް ވަޑައިނުގެން މަޖިލީހުގެ ނައިބު ރައީސް އީވާ އަބްދުﷲ މަޖިލީހަށް ސަލާމްވިދާޅުވީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށްގެންދާނެ މަގު ފަހިކޮށްދޭން ބޭނުން ނުވާތީ ކަމަށް ސަނީފް ތުހުމަތުކުރެއްވިއެވެ.
ދެ ބޭފުޅަކު ވެގެން މަޖިލީސް ހުއްޓުވާފައި ނުބޭއްވެވޭނެ ކަމަށް ސަނީފް ވަނީ ވިދާޅުވެފައެވެ. އެ މައްސަލަ ކުރިއަށް ނުގެންގޮސް މަޖިލީހުގެ އެހެން މަސައްކަތެއް ކުރިއަށް ނުގެންދެވޭއިރު، މަޖިލިސް ހިންގޭނެ ގޮތްތައް މަޖިލީހުގެ ގަވާއިދުގައި ވަރަށް ސާފުކޮށް ބަޔާންކޮށްފައި ވާކަމަށް ސަނީފް ވަނީ ވިދާޅުވެފައެވެ. އަދި އަމީންއާއްމުވެސް މަސައްކަތްކުރައްވަން ވާނީ މަޖިލިސް ނުހުއްޓި ކުރިއަށް ގެންދެވޭނެ ގޮތަކަށްކަން މަޖިލީހުގެ ގަވާއިދުން ވަރަށް ސާފުކޮށް އެނގެން އޮތްކަމަށް އޭނާ ވަނީ ވިދާޅުވެފައެވެ.
ސަޕްލިމަންޓްރީ ބަޖެޓާއި ބަޖެޓް، އަދި އިންތިޚާބީ ރައީސް ހުވާކުރުން ކުރިއަށް އޮތް ދަނޑިވަޅެއްގައި މަޖިލީހުގެ ރިޔާސަތާއި އަމީން އާއްމު އަދި މަޖިލީހުގެ ސެކްރެޓަރީ ޖެނެރަލްވެސް އަމަލުކުރައްވަނީ ރަނގަޅަށް ނޫންކަމަށް އޭނާ ވަނީ ވިދާޅުވެފައެވެ. މި މައްސަލައަށް ގާނޫނީ ފަރުވާއެއް ލިބޭނީ ކޯޓުންކަންވެސް އޭނާ ވަނީ ފާހަގަކުރައްވާފައެވެ.
