އެފްއޭއެމްގެ ރައީސްކަމަށް ކުރިމަތިލުމުގެ ވިސްނުމެއް ނެތް: އަލީ އާޒިމް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސްކަމަށް ކުރިމަތިލެއްވުމުގެ އެއްވެސް ވިސްނުންފުޅެއް ނުގެންގުޅުއްވާ ކަމަށް އެފްއޭއެމްގެ ފުރަތަމަ އިންތިޚާބީ ރައީސް އަލީ އާޒިމް ވިދާޅުވެއްޖެ އެވެ.

"ރާއްޖެ އެމްވީ"އާ ވާހަކަފުޅު ދައްކަވަމުން މެދުހެންވޭރު ދާއިރާގެ މަޖިލިސް މެންބަރުކަން ވެސް ކުރައްވަމުން ގެންދަވާ އާޒިމް ވިދާޅުވީ، އެފްއޭއެމްގެ ރައީސްކަމުގެ މަގާމަށް ކުރިމަތިލެއްވުމުގެ ޝައުޤުވެރިކަމެއް އަދި ވިސްނުންފުޅެއް ނެތް ކަމަށެވެ. އާޒިމް ވިދާޅުވީ އެފްއޭއެމްގެ ރައީސްކަން ކުރައްވަން ލިބިވަޑައިގެންނެވި ފުރުސަތުގައި އެކަން ކުރެއްވި ކަމަށެވެ. އާޒިމް އަކީ އެފްއޭއެމްގެ ފުރަތަމަ އިންތިޚާބީ ރައީސް އެވެ. 2008 ވަަނަ އަހަރު އޮތް އެފްއޭއެމްގެ އިންތިޚާބުގައި ވާދަކުރައްވާ، ހަތަރު އަހަރުގެ ދައުރަކަށް އާޒިމް އިންތިޚާބުވެވަޑައިގެންނެވި އެވެ. އާޒިމްގެ އެ ދައުރު ހަމަވީ 2012 ވަނަ އަހަރު އެވެ. ޖެހިގެން އައި ދައުރުގައި އެފްއޭއެމްގެ އިންތިޚާބުގައި ވެސް އާޒިމް ވާދަކުރެއްވި އެވެ. ނަމަވެސް އެ އިންތިޚާބުގައި އިލްޙާމް އަޙުމަދާ ވާދަކުރައްވާ، ނާކާމިޔާބުވެވަޑައިގެންނެވީ އެވެ.

އަންނަ އަހަރު އޮންނަ އެފްއޭއެމްގެ އިންތިޚާބުގައި ވާދަކުރައްވާނެކަން މިހާތަނަށް ރަސްމީކޮށް އިއުލާން ކުރައްވާފައި ވަނީ މަހިބަދޫ ދާއިރާގެ މެންބަރު އަދި އެފްއޭއެމްގެ ކުރީގެ ރައީސް އަޙުމަދު ޠާރިޤް (ޓޮމް) އެކަންޏެވެ. މީގެ އިތުރުން ޤައުމީ ޓީމުގެ ކުރީގެ ކެޕްޓަން އަލީ އަޝްފާޤު (ދަގަނޑޭ) ވެސް އެފްއޭއެމްގެ އިންތިޚާބުގައި ވާދަކުރާ ކަމުގެ އަޑުތައް ވަނީ ފެތުރިފަ އެވެ. "ދަގަނޑޭ ފޯ އެފްއޭއެމް"ގެ ނަމުގައި ސޯޝަލް މީޑިއާގައި ކެމްޕެއިން ކުރަމުން އަންނަ ނަމަވެސް، އެކަމުގައި ދަގަނޑޭގެ ރަސްމީ ބަހެއް އަދި ނެތެވެ. އެފްއޭއެމްގެ އިންތިޚާބުގައި ވާދަކުރައްވާ ބޭފުޅުންނާ ގުޅޭ ގޮތުން ވާހަކަފުޅު ދައްކަވަމުން އާޒިމް ވިދާޅުވީ، މިވަގުތަށް ވަކި އެއްޗެއް ވިދާޅުވާން އަވަސް ކަމަށެވެ.

ފުޓުބޯޅައިގެ ހިންގުމުން ދުރުވެ، މިހާރު ސިޔާސީ މަސައްކަތުގައި އުޅުއްވި ނަމަވެސް، އަބަދު ވެސް އާޒިމް ގެންދަވަނަނީ އެފްއޭއެމްގެ ހިންގަމުން އަންނަ ގޮތުގެ ވާހަކަފުޅު ދައްކަވަމުންނެވެ. އެގޮތުން އެ އިދާރާގެ އިސްވެރިން ހަދަމުންދާ ގޯސްތަކުގެ ވާހަކަ އެންމެ ގަދަޔަށް ދައްކަވާ އެއް ބޭފުޅަކީ ވެސް އާޒިމް އެވެ.