ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނިކޮށް އެމައްސަލައާ މެދު ގޮތެއް ނުނިންމާ މަޖިލީހުގެ ރައީސަށް މަޖިލީސް ހިންގުމުގެ ބާރު ނެތްކަން މަޖިލީހުގެ ގަވާއިދުން އެނގެން އޮންނަކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގައި ވޯޓު ނުނަގައި މަޖިލީހުގެ އެއްވެސް މަސައްކަތެއް ކުރިއަށްގެންދިއުމުގައި އެއްބާރުލުން ނުދިނުމަށް އެމްޑީޕީ ޕީޖީ ގްރޫޕުން ވަނީ ނިންމާފައެވެ. ނަޝީދުގެ އިތުބާރު ނެތްކަމުގެ މައްސަލަ އޮކްޓޯބަރ މަހުގެ 29 ވާ އާދިއްތަ ދުވަހަށް އެޖެންޑާކުރުމަށް ވަނީ ހަމަޖެހިފައެވެ. ނަޝީދުގެ އިތުބާރު ނެތް ކަމަށް ފާސްކުރުމަށް އެމްޑީޕީ ޕީޖީ ގްރޫޕުން ތްރީލައިން ވިޕެއް ވެސް ނެރެފައިވާއިރު އެމްޑީޕީ ޕާލަމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ ނަޝީދުގެ އިތުބާރު ނެތްކަމުގެ މައްސަލައިގެ ޖަލްސާ ނުބާއްވައި ދެން ކުރާ ކަންކަމަކީ ގަވާއިދާ ޚިލާފަށް ކުރާ ކަންކަންކަމުގައި ދެކޭ ކަމަށެވެ. މީގެ ތެރޭގައި ނޮވެމްބަރު މަހުގެ 17 ވަނަ ދުވަހު ބާއްވާ އިންތިޚާބީ ރައީސް ޑރ. މުޙައްމަދު މުއިއްޒުގެ ހުވާކުރުމުގެ ރަސްމިއްޔާތުވެސް ހިމެނޭއިރު އެ ރަސްމިއްޔާތު ކުރިއަށްގެންދަންވާނީ މަޖިލީހުގެ އިތުބާރު އޮތް ރައީސަކާއެކުގައި ކަމަށް އޭނާ ވިދާޅުވިއެވެ.

މީގެ އިތުރުން އިތުބާރު ގެއްލިފައިވާ ރައީސަކު ގަދަކަމުން އެ މަގާމުގައި ހުންނަވައިގެން ހުވާކުރުމުގެ ރަސްމިއްޔާތު ބާއްވައިފިނަމަ އިންތިޚާބީ ރައީސް ހުށަހަޅުއްވާ ކެބިނެޓަށް ވެސް ބުނާނީ ނޫނެކޭ ކަމަށް ރޮޒައިނާ ވިދާޅުވިއެވެ.

"ނަޝީދުގެ މައްސަލަ ނުނިންމާނަމަ މުއިއްޒުގެ ހުވާ ގަބޫލުނުކުރާނަން، ކެބިނެޓަށް ރުހުން ނުދޭނަން: އެމްޑީޕީ" މިސުރުޚީގެ ދަށުން މިހާރު އޮންލައިނުން ލިޔެފައިވާ ޚަބަރެއް "އެކްސް"އަށް ޕޯސްޓްކުރައްވާ ކުރީގެ ބަންޑާރަ ނައިބު އާޒިމާ ޝުކުރޫ ވިދާޅުވީ އޭރުން ނަޝީދު އާއި އީވާ މަގާމުން ވަކިވީކަމަށް ވާނެތޯ އާއި ސަރުކާރު ހުއްޓުމަކަށް ގެނެވޭނެތޯ ސުވާލުކުރައްވާފައެވެ. އަދި މިއީ ފުރަތަމަވެސް ބަލިވާނެ ހަނގުރާމައެއްކަމަށާއި މިސަރުކާރުގެ ޤާނޫނީޓީމުގެ ފެންވަރު އެނގެނީ މިކަހަލަ ދެކޮޅުނުޖެހޭ ކަންކަމުންކަމަށާއި ޗާގޮސްގެ މައްސަލަ ގެއްލުނީ ގެއްލެންވެގެންކަމަށް ވިދާޅުވެފައިވެއެވެ.

އާޒިމާގެ މިޕޯސްޓަށް ރައްދުދެއްވާ ދިޔާނާ ވިދާޅުވީ އެމްޑީޕީގެ ޕީޖީ ލީޑަރ މުހައްމަދު އަސްލަމް ވިދާޅުވަނީ ޞައްހަ ވާހަކަފުޅެއްކަމަށެވެ. މަޖިލީހުގެ ރައީސްގެ އިތުބާރުނެތްކަމުގެ މައްސަލަ މަޖިލީހުގެ ތަޅުމަށް ހުށަހަޅަން މުއްދަތު ހަމަވުމަށްފަހު އެގަރާރާމެދު ވަކި ގޮތެއް ނުނިމެނީސް އެ ރައީސަށް މަޖިލިސް ހިންގެވުމުގެ ބާރު ނެތްކަން މަޖިލީހުގެ ގަވާއިދާއި ގާނޫނީ އުސޫލުތަކުން އެނގޭކަމަށެވެ.

ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ނ ގައި ބުނެފައިވަނީ މަޖިލީހުގެ ރައީސްގެ އިތުބާރު ނެތްކަމުގެ ގަރާރު މަޖިލީހަށް ލިބުމުން، އެ ގަރާރު ލިޔުން ލިބޭތާ ގިނަވެގެން ބަންދުނޫން ތިން ދުވަހުގެ ތެރޭގައި އެގަރާރުގެ ނޯޓިސް އަމީން އާންމު މެމްބަރުންނަށާއި މަޖިލީހުގެ ރައީސަށް ދިނުމަށްފަހު، އެނޯޓިހުގެ ތާރީޚުން ފެށިގެން 14 ދުވަހުގެ މުއްދަތެއް ދިނުމަށްފަހު، އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ ގަރާރު ހުށަހަޅަންވާނެކަމަށެވެ.

އެ މާއްދާގެ ރ ގައި ބުނެފައިވަނީ މަޖިލީހުގެ ރައީސްގެ އިތުބާރުނެތްކަމުގެ މައްސަލައިގެ ގަރާރުގެ ނޯޓިހުގެ މުއްދަތު ހަމަވެގެން މަޖިލީހުގެ ރައީސް މަގާމުން ވަކިކުރުމުގެ ގަރާރެއް މަޖިލީހުގެ ޖަލްސާއަށް ހުށަހެޅުމަށްފަހު، އެވަގުތު މަޖިލީހަށް ހުށަހެޅިފައިވާ އެހެން އެއްވެސް ކަމަކާމެދު ބަހުސްކުރެވޭނީ، ނުވަތަ ގޮތެއް ނިންމަންވާނީ، މަޖިލީހުގެ ރައީސްގެ މަގާމުން ވަކިކުރުމުގެ ގަރާރާމެދު ގޮތެއް ނިންމުމަށްފަހު ކަމަށެވެ.

މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މީގެކުރިންވެސް އެމްޑީޕީން ހުށަހެޅިއެވެ. ނަމަވެސް އެފަހަރު ގަވާއިދު ތަން ނުދޭކަމަށް ވިދާޅުވެ އެމައްސަލަ ކުރިޔަށް ގެންދަވާފައެއްނުވެއެވެ.