އދ.ގެ ސެކްރެޓަރީ ޖެނެރަލްގެ އިސްތިއުފާއަށް އިސްރާއީލުން ގޮވާލައިފި

ދުނިޔޭގެ ސުލްހަ ބަލަހައްޓާ މައި ޖަމްއިއްޔާ ކަމަށްވާ އދ. މަޖްލީހުގެ ސެކްރެޓަރީ ޖެނެރަލްގެ އިސްތިއުފާއަށް، ހައްދުފަހަނައަޅާފައިވާ ޔަހޫދީ ދައުލަތުން ގޮވާލައިފިއެވެ.

އދ.ގެ ސެކްރެޓަރީ ޖެނެރަލް، އެންޓޯނިއޯ ގުޓަރެސްގެ އިސްތިއުފާއަށް ޔަހޫދީ އިސްރާއީލުން ގޮވާލީ، ފަލަސްތީނުގެ ޣައްޒާއަށް އަމާޒުކޮށް ދެމުންދާ ހަމަލާތަކުގައި ޣައްޒާގެ ރައްޔިތުންނަށް ލިބެމުންދާ އަނިޔާތަކާ ދެކޮޅަށް ވާހަކަފުޅުދައްކަވަމުންނެވެ.

ޣައްޒާގައި މިހާރު އޮތް ހާލަތަށް ބަލާއިރު، ޑީސެލިނޭޝަން ޕްލާންޓުތަކާއި ހޮސްޕިޓަލުތަކުގެ މެޝިންތައް ހިންގުމަށް ބޭނުންވާ ކަރަންޓު ހޯދުމަށް ތެޔޮ ނުލިބިއްޖެނަމަ، މިރޭގެ ނިޔަލަށް ހޮސްޕިޓަލުތަކުގެ މަސައްކަތްތައް ހުއްޓޭނެކަމަށް ފަލަސްތީނުގެ ރެފިއުޖީންގެ ރިލީފް އެންޑް ވޯރކް އޭޖެންސީން މީގެކުރިން ވަނީ ރިޕޯޓުކޮށްފައެވެ.

ހާލަތު ގޯސްވުމުގެ ސަބަބުން ގުޓަރެސް ވަނީ ހަނގުރާމަ މިހާރުން މިހާރަށް ހުއްޓާލުމަށް އިސްރާއީލަށް ގޮވާލައްވާފައެވެ. އަދި ޣައްޒާގެ ހާލަތު، ފާއިތުވާ ކޮންމެ ގަޑިއިރަކާއެކު އިތުރަށް ގޯސްވަމުން އަންނަކަމުގައި ގުޓަރެސް ވިދާޅުވެފައިވާކަމަށް، އެމެރިކާގެ ސީއެންބީސީ ނޫހުން ރިޕޯޓުކޮށްފައިވެއެވެ.

ގުޓަރެސްގެ މި ފާޑުވިދާޅުވުންތަކާއެކު، އިސްރާއީލުން އދ.ށް ކަނޑައަޅާފައި ހުންނަވާ ސަފީރު ވަނީ، ގުޓަރެސް އިސްތިއުފާ ދޭންޖެހޭކަމަށް ވިދާޅުވެފައެވެ.

އިސްރާއީލުން ފަލަސްތީނުގައި ހިންގަމުންދާ ލާއިންސާނީ އަމަލުތަކުގައި 5000ށްވުރެ ގިނަ މީހުން މިހާތަނަށް ވަނީ ޝަހީދުކޮށްލާފައެވެ.