އިސްރާއީލުގެ ރައްޔިތުންނަށް ރާއްޖޭގެ ބޯޑަރު ބަންދުކުރުމަށާއި އެގައުމުގެ އުފެއްދުންތައް ވިއްކުން މަނާކުރުމަށް މަޖިލިސް މެންބަރުން ގޮވާލައްވައިފި
އިސްރާއީލަކީ ޓެރަރިސްޓް ގައުމެއް
ފޮނަދޫ ދާއިރާގެ މެމްބަރު މޫސާ ސިރާޖު
އިސްރާއީލުގެ ރައްޔިތުންނަށް ރާއްޖޭގެ ބޯޑަރު ބަންދުކުރުމަށާއި، އެގައުމުގެ އުފެއްދުންތައް ވިއްކުން މަނާކުރުމަށް ރާއްޖޭގެ ރައްޔިތުން މަޖިލީހުގެ ގިނަ މެންބަރު ގޮވާލައްވައިފިއެވެ.
ބުދަ ދުވަހު ކުރިއަށް ދިޔަ، ވިލިނގިލި ދާއިރާގެ މެންބަރު ސަޢުދު ޙުސައިން ހުށަހަޅުއްވާފައިވާ، އިސްރާއީލުން ފަލަސްޠީނުގެ އެކި ސަރަޙައްދުތަކަށް ދެމުންގެންދާ ނުރައްކާތެރި އުދުވާނީ ހަމަލާތައް ކުށްވެރިކޮށް އެ ހަމަލާތައް ވަގުތުން ހުއްޓާލުމަށާއި، ފަލަސްޠީނުގެ ރައްޔިތުންނަށް އިސްރާއީލުން ދެމުންގެންދާ ލާއިންސާނީ އަނިޔާތައް ކުށްވެރިކޮށް އެ އަނިޔާތައް ހުއްޓާލައި ފަލަސްޠީނުގައި އިންސާނީ ޙައްޤުތައް ކަށަވަރުކޮށް، އިސްރާއީލުން ފަލަސްޠީނުގެ ރައްޔިތުންގެ ކިބައިން ފޭރިގެންފައިވާ އެންމެހައި ބިންތަކުން ފައިބާ، އަދި ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ގޮވާލައި ހުށަހަޅާ ޤަރާރުގެ އިބްތިދާއީ ބަހުސްގައި ގިނަ މެންބަރުން ވަނީ އިސްރާއީލަކީ ޓެރަރިސްޓް ގައުމެއްގެ ގޮތުގައި ސިފަކުރައްވައި ވާހަކަފުޅު ދައްކަވާފައެވެ. އަދި މިހާރު ހިންގަމުންދާ ހަނގުރާމަ ވަގުތުން ވަގުތަށް ހުއްޓާލުމަށް ގޮވާލެއްވިއެވެ.
އިސްރާއީލުގެ އަމަލުކޮށް ކުށްވެރިކުރައްވައި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖު ވިދާޅުވީ ރާއްޖެއަކީ ކުޑަ ގައުމެއް ނަމަވެސް ނިސްބަތުން ކުރެވޭނެ ކަންކަން ހުންނާނެ ކަމަށެވެ. އެހެންކަމުން އިސްރާއީލުގެ ރައްޔިތުންނަށް ރާއްޖެއަށް ނުވަދެވޭނެ ގޮތަށް ބޯޑަރު ބަންދުކުރަންޖެހޭ ކަމަށާއި، އިސްރާއީލުގެ އުފެއްދުންތައް ރާއްޖެއަށް އެތެރެކުރުން ހުއްޓުވަންޖެހޭ ކަމަށެވެ.
މީގެ އިތުރުން މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވީ ރާއްޖޭގެ ރައްޔިތުން ތިބީ ފަލަސްތީނުގެ ރައްޔިތުންނާއެކު ކަމަށާއި، އެރައްޔިތުންގެ ހައްގުގައި ވަރަށް ގިނަ މަސައްކަތްތައް ކުރަމުންދާ ކަމަށެވެ. އެގޮތުން އެހީ ފޯރުކޮށްދިނުމަށް ގިނަ މަސައްކަތްތައް ކުރަމުން ގެންދާކަން މެންބަރު ރައީ ފާހަގަކުރެއްވިއެވެ. ނަމަވެސް ރާއްޖޭގެ ސިޔާސީ ބޭފުޅުންނާއި، ވެރިން ފަލަސްތީނުގެ ރައްޔިތުންގެ ހައްގުގައި ޓްވީޓު ކުރުން ނޫން ކަމެއް ނުކުރާ ކަމަށާއި، އެއީ ކަންބޮޑުވާކަމެއް ކަމަށް މެންބަރު ރައީ ވިދާޅުވިއެވެ.
މެންބަރު ރާއީ ވިދާޅުވީ ރާއްޖޭގައި ތިބެގެން އިސްރާއީލުގެ ބައެއް ރައްޔިތުން އެގައުމަށް ތާއީދުކުރާކަން ހާމަކުރަމުންދާ ކަމަށާއި، އެފަދަ މީހުންނާމެދު ފިޔަވަޅު އަޅައި، ރާއްޖެއިން އެމީހުން ޑީޕޯޓުކުރަންޖެހޭ ކަމަށެވެ. މެންބަރު ރާއީ ވިދާޅުވީ އިސްރާއީލުން އެގައުމުގެ ރައްޔިތުންނަށް ރާއްޖެއަށް ނައުމަށް އިލްތިމާސްކުރުމުގެ ކުރިން ރާއްޖެއިން އެ އެންގުން އަންގަންޖެހޭ ކަމަށެވެ. ނަމަވެސް ބައެއް ބޭފުޅުން މިކަމުން ވެސް ސިޔާސީ މަންފާއެއް ހާސިލް ކުރުމަށް މަސައްކަތް ކުރަމުންދާތަން ފެންނަ ކަމަށް މެންބަރު ރައީ ވިދާޅުވިއެވެ.
