ގާނޫނު ހަދާ މަޖިލީހުން ހަމައެކަނި ސުރުހީ ފާސްކުރުން ނިމުމަކަށް ގެންނަންޖެހޭ: މެންބަރު ސައުދު

ގާނޫނު ހަދާ މަޖިލީހުން ގާނޫނު ހެދުމަށްފަހު، ގާނޫނުގެ ތެރެއިން ހުރިހާ ބާރެއް ސަރުކާރުގެ ވަޒީރަށް ލިބޭ ގޮތަށް އޮންނަ އުސޫލު ބަދަލުކުރަންޖެހޭ ކަމަށް ރައްޔިތުންގެ މަޖިލިހުގެ ވިލިނގިލީ ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.

ސަރުކާރުގެ ފަރާތުން، ކެނދިކުޅުދޫ ދާއިރާގެ މެންބަރު އަހުމަދު އީސާ ހުށަހަޅުއްވާފައިވާ ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސްގައި ވާހަކަފުޅުދައްކަވަމުން މެންބަރު ސައުދު ވިދާޅުވީ ޒަމާނުއްސުރެ ވާރުތަވަމުން އަންނަ ކަންކަން އަދިވެސް ވާރުތަވަމުން އަންނަ ކަމަށާއި، އެކަންކަން 21 ވަނަ ގަރުނުގެ ތެރޭގައި ވެސް ފެންނަމުންދާ ކަމަށެވެ.

Advertisement

މެންބަރު ސައުދު ވިދާޅުވީ ގާނޫނު ހަދަނީ ގާނޫނު ހަދާ މަޖިލީހުން ކަމަށާއި، ބިލް ތަސްތީގުކޮށްދެއްވަނީ ރައީސުލްޖުމްހޫރިއްޔާ ކަމަށެވެ. އެގާނޫނުގެ ދަށުން އެ ނިސްބަތްވާ ވުޒާރާއަކުން އައު އުސޫލުތަކާއި ގަވާއިދުތައް ހެދުމަށްފަހު ހުރިހާ ބާރެއް އެ ވުޒާރާއެއްގައި ހުންނަވާ ވަޒީރަކަށް ލިބޭ ކަމަށެވެ. އަދި އެއުސޫލު ބަދަލުކުރަންޖެހޭ ކަމަށް މެންބަރު ސައުދު ވިދާޅުވިއެވެ. މެންބަރު ސައުދު ވިދާޅުވީ ގާނޫނު ހަދާ މަޖިލީހުން ހަމައެކަނި ސުރުހީ ފާސްކުރުން ނިމުމަކަށް ގެންނަންޖެހޭ ކަމަށާއި، އެ ގާނޫނުގެ އެތެރޭގައިވާ ކަންކަން ވެސް ބައްޓަންކުރަންޖެހޭ ކަމަށެވެ.

ޓޫރިޒަމް މިނިސްޓްރީއަށް އިޝާރަތްކުރައްވައި މެންބަރު ސައުދު ވިދާޅުވީ އެގޮތަށް އެކަންކުރުމުގެ ސަބަބުން އެވަޒީރަކު ބޭނުންވާ ގޮތަކަށް ހުރިހާ ކަމެއް ކުރާ ކަމަށެވެ. އަދި މި އުސޫލުތައް ބަދަލުކުރަންޖެހޭ ކަމަށާއި، އެގޮތަށް އެކަން ކުރުމުގެ ސަބަބުން ލާމަރުކަޒީ ނިޒާމު ވެސް ގެއްލޭ ކަމަށް މެންބަރު ސައުދު ވިދާޅުވިއެވެ.

މެންބަރު ސައުދު ވިދާޅުވީ ގާނޫނުތައް ފާސްކުރަމުންދާއިރު ލާމަރުކަޒީ ނިޒާމު ނުގެއްލޭ ގޮތަށް އިސްލާހުތައް ހުށަހަޅަންޖެހޭ ކަަމަށެވެ.

މީގެ އިތުރުން މެންބަރު ސައުދު ވިދާޅުވީ ރާއްޖޭގެ ފަތުރުވެރިކަމުގެ ސިނާއަތް ކުރިއަރުވަން ވެސް ބޭނުންވާ ކަމަށާއި، ރާއްޖޭގެ ރަށްތައް ވެސް ތަރައްގީ ކުރަން ބޭނުންވާ ކަމަށެވެ. އެހެންކަމުން ކުރިއަށް އޮތްތަނުގައި ގާނޫނުތައް ހެދިގެންދާއިރު، ބާރުތައް އެއްނުކުރެވޭ ގޮތަށް ކޮމެޓީ މަރުހަލާގައި ވެސް މަސައްކަތް ކުރަންޖެހޭ ކަމަށް މެންބަރު ސައުދު ވިދާޅުވިއެވެ.