ދިވެހިރާއްޖޭގެ ޗާޓަށް ސިޔާސީ ގޮތުން ކުޅުދުއްފުށީ އައުން ވެގެންދިޔައީ ލިބުނު ވަރަށް ބޮޑު ކާމިޔާބީއަކަށް: ޔާސިރު

ދިވެހިރާއްޖޭގެ ޗާޓަށް ސިޔާސީ ގޮތުން ކުޅުދުއްފުށީ އައުން ވެގެންދިޔައީ ލިބުނު ވަރަށް ބޮޑު ކާމިޔާބީއެއްކަމަށް ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުލް ލަޠީފް ވިދާޅުވެއްޖެއެވެ.

އަންގާރަ ދުވަހުގެ ރޭ ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ޔާސިރު ވިދާޅުވީ، 2024 ވަނަ އަހަރުގެ ރައްޔިތުންގެ މަޖިލީހުގެ ކުޅުދުއްފުށީ ދާއިރާއަށް ވާދަކުރަން ވަރަށް ގިނަ ޒުވާނުންނާއި އެހެނިހެން ފަރާތްތަކުންވެސް އިއުލާނުކުރަމުންދާކަމަށެވެ. މިކަމަކީ، ކުޅުދުއްފުށީގައި އެއްކޮށްނެތެމުންދިޔަ ސިޔާސީ މަސްރަހު އަލުން އެނބުރި ރާއްޖޭގެ ސިޔާސީ ޗާޓަށް އައުމުގެ ހެތްކެއްކަމަށް ޔާސިރު ސިފަކުރެއްވިއެވެ. އަދި މިއީ އޭނާއަށް ލިބިވަޑައިގެންނެވި ވަރަށް ބޮޑު ކާމިޔާބީއެއްކަމަށްވެސް ޔާސިރު ފާހަގަކުރެއްވިއެވެ.

ޔާސިރު އިތުރަށް ވިދާޅުވީ، ދައުރުގައި އެންމެ ބޮޑު އިސްކަމެއް ދެއްވީ، ބޯހިޔާވަހިކަމުގެ މައްސަލައަށް ހައްލު ހޯދުމަށާއި، ސިއްހީ ނިޒާމު ރަނގަޅު ކުރުމުގެ އިތުރުން މަގުތަކުގެ މައްސަލަ ހައްލުކުރުމަށްކަމަށެވެ. އެހެންނަމަވެސް މަގުތަކުގެ މައްސަލައަށް އެދެވޭ ފަދަ ކާމިޔާބީއެއް ހޯދިފައި ނުވާކަމަށް ޔާސިރު ފާހަގަކުރެއްވިއެވެ.

ޔާސިރު އިތުރަށް ވިދާޅުވީ، ކަންކަން ރަނގަޅުކުރުމަށާއި، ރައްޔިތުން އެދޭ ގޮތަށް ކަންކަން ބަދަލުކުރުމަށް ސަރުކާރުގެ އެއްބާރުލުން ވަރަށް ބޮޑަށް ލިބޭކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަރަށް ބޮޑަށް އެފަދަ ކަންކަމަށް ޖާގަދެއްވާ އެއްބާރުލުން ދެއްވާކަމަށްވެސް ޔާސިރު ވިދާޅުވިއެވެ.

މީގެއިތުރުން ޔާސިރު ވިދާޅުވީ، މި ދައުރުގައި ރައްޔިތުންގެ ޖީބަށް މާ ބޮޑު އަދަދެއް އިތުރު ނުކުރެވުނު ނަމަވެސް، ނިޒާމަށް ގެނައި ހެޔޮ ބަދަލުގެ ތެރެއިން، ރައްޔިތުންގެ ޖީބުން ކުރަންޖެހޭ ޚަރަދުތައް ކަނޑާލެވިފައިވާކަމަށެވެ.