ސިވިލް ސަރވަންޓުން ރަސްމީ ބަންދު ދުވަސްތަކުގައި މަސައްކަތްކުރާނަމަ ހާޒިރީ އެލަވަންސް ލިބޭގޮތަށް ދައުލަތުގެ ޕޭ ފްރޭމްވޯރކަށް އިސްލާހު ގެނެސްފިއެވެ.
ފިނޭންސް މިނިސްޓްރީން ދައުލަތުގެ ޕޭ ފްރޭމްވޯރކުގެ މިންގަނޑުތަކަށް ގެނައި އިސްލާހުގައި ބުނެފައިވަނީ، ހާޒިރީ އިނާޔަތަކީ ރަސްމީ މަސައްކަތު ދުވަސްތަކުގެ ތެރެއިން މުވައްޒަފު އޮފީހަށް ހާޒިރުވާ ކޮންމެ ދުވަހަކަށާއި، ރަސްމީ ބަންދު ދުވަސްތަކުގައި ޑިއުޓީ އުސޫލުން އޮފީހަށް ހާޒިރުވެ، މަސައްކަތްކުރާ ކޮންމެ ދުވަހަކަށް ދޭ އިނާޔަތެއްކަމަށެވެ. އޮފީހަށް ހާޒިރުވުން ކަމުގައި މާނަކޮށްފައިވަނީ، މަސައްކަތު ދުވަސްތަކުގެ ތެރެއިން މުވައްޒަފު އޮފީހަށް ހާޒިރުވުމާއި، މަސައްކަތު ދުވަސްތަކުގެ ތެރެއިން އޮންލައިންކޮށް މަސައްކަތްކުރަންޖެހޭ ހާލަތްތަކުގައި އެ އިދާރާއެއްގައި ހަމަޖެހިފައިވާ އުސޫލުން ސައިން-އިން ވެގެން ހާޒިރުވުމާއި، މަސައްކަތު ދުވަސްތަކުގެ ތެރޭގައި ރާއްޖޭގައި ނުވަތަ ރާއްޖެއިން ބޭރަށް ކުރަންޖެހޭ ރަސްމީ ދަތުރުތަކުގެ ދުވަސްތަކަށެވެ.
މި އިސްލާހުގައި އިތުރަށް ބުނެފައިވަނީ، ރަސްމީ ބަންދު ދުވަސްތަކާއި ހުކުރު ދުވަސްތަކުގައި މުވައްޒަފު އިދާރާއަށް ހާޒިރުވެ، ޑިއުޓީ އުސޫލުން އިދާރާގެ ރަސްމީ މަސައްކަތުގެ ގަޑީގެ ގޮތުގައި ކަނޑައަޅާފައިވާ ޖުމްލަ ވަގުތުގެ މަދުވެގެން ދެބައިކުޅައެއްބައި ވަގުތު މަސައްކަތްކުރާ ހާލަތްތަކުގައި ހާޒިރީ އިނާޔަތް ލިބޭނެކަމަށެވެ.
އެއްވެސް މުވައްޒަފަކު ދައުލަތުގެ ޕޭ ފްރޭމްވޯރކަށް ހިޖުރަކުރާ ތާރީޚުން ފެށިގެން ގިނަވަގެން 21 މަސްދުވަހުގެ ތެރޭގައި ވަޒީފާއިން ވަކިވެގެންދާއިރު އިނާޔަތް ދޭންޖެހޭނަމަ، އެމުވައްޒަފަކަށް ލިބޭނެ އިނާޔަތް އިޚްތިޔާރުކުރުމުގެ ފުރުސަތު އޮންނާނެކަމަށްވެސް ޕޭ ފްރޭމްވޯރކަށް ގެނައި އިސްލާހުގައި ބުނެފައިވެއެވެ.
