އެފްއޭއެމްގެ މަނީ ލޯންޑަރިންގެ މައްސަލަ: އެއް ދުވަސްވީއިރު ވެސް ބައްސާމާއި، އެފްއޭއެމް ހަނު!
ފުލުހުން އެފްއޭއެމް ބަލައި ފާސްކުރިތާ އެއް ދުވަސް ފާއިތުވެގެން ދިޔަ އިރު ވެސް، އެކަމުގައި އެ އިދާރާގެ ރައީސް ބައްސާމްގެ ބަހެއް ނެތް
އެފްއޭއެމްގެ ރައީސް ބައްސާމް އަދީލް ޖަލީލް
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ދެކޮޅަށް ދިވެހި ފުލުހުން ކުރިއަށް ގެންދާ ތަހުގީގާ ގުޅިގެން، އެ އިދާރާ އިން ބަހެއް ބުނުމަށް ދެކޮޅު ހަަދައިފި އެވެ.
އާދިއްތަ ދުވަހު ފުލުހުން ވަނީ އެފްއޭއެމްގެ އިދާރާ އަށް ވަދެ، ބަލައި ފާސްކުރުން ކުރިއަށް ގެންގޮސްފަ އެވެ. ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފައިވާ ގޮތުގައި، އެފްއޭއެމަށް އެކި ފަރާތްތަކުން ދެމުން އަންނަ ފައިސާތަކަށް އެ އިދާރާގެ އިސްވެރިން ޚިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތު ކުރެވޭ މައްސަލައިގެ އެއްވެސް ހިސާބެއްގައި މަނީ ލޯންޑަރިން، ވައްކަން، ޚިޔާނާތް އަދި މަކަރާއި ހީލަތް ނުވަތަ އެ ނޫން ވެސް ޖިނާއީ ކުށެއްގެ މައްސަލައެއް ހިނގަމުންދާނަމަ، އެ ކަމެއް ތަޙުގީގުކޮށް، އެ މައްސަލައިގައި ދަޢުވާއެއް ކުރެވެން އޮތް ބައެއްގެ މައްޗަށް ދަޢުވާ ކުރުމަށް ފޮނުވައި ދިނުމަށް އެދޭ ކަމަށެވެ.
އެކަމާ ގުޅިގެން އާދިއްތަ ދުވަހު އެފްއޭއެމްގެ ރަސްމީ މީޑިއާ ގްރޫޕުގައި ނޫސްވެރިޔަކު ސުވާލު ދެންނެވުމުން ބައްސާމް ވިދާޅުވީ، މިހާރު ކުރިއަށްދާ ތަހުގީގު ނިކުމާއެކު އެކަމުގެ ވާހަކަ ދައްކަވާނެ ކަމަށެވެ. އެކަމާ ގުޅޭ އިތުރު އެއްވެސް ތަފްސީލެއް ބައްސާމް ދެއްވައިފައެއް ނުވެ އެވެ. ނަމަވެސް، ފުލުހުން އެފްއޭއެމް ބަލައި ފާސްކުރިތާ އެއް ދުވަސް ފާއިތުވެގެން ދިޔަ އިރު ވެސް، އެކަމުގައި އެ އިދާރާގެ ރައީސް ބައްސާމްގެ ބަހެއް ނެތެވެ. އޭގެ ފަހުން އެފްއޭއެމްގެ މީޑިއާ ގްރޫޕުގައި ނޫސްވެރިޔަކު ސުވާލު ކުރުމުން ބައްސާމް އަދި އެފްއޭއެމްގެ ޖެނަރަލް ސެކްރެޓަރީ ޙުސެއިން ޖަވާޒް (ޖަވާ) ވެސް އެއްވެސް ޖަވާބެއް ދެއްވައިފައެއް ނުވެ އެވެ.
މައުލޫމާތު ލިބިފައިވާ ގޮތުގައި އެފްއޭއެމާ ދެކޮޅަށް ފުލުހުން ކުރަމުން ދަނީ ސީރިއަސް ތުހުމަތު ތަކެކެވެ. އެގޮތުން އެ އިދާރާ އަށް އެކި ގޮތް ގޮތުން ލިބެމުން އަންނަ ފައިސާ، އިދާރާގެ އިސްވެރިންނާއި، އިސްވެރިންނާއި ގާތް ގުޅުން އޮތް ފަރާތްތަކުގެ އިތުރުން، އެކި އެކި ކުންފުނިތަކަށް ވެސް ވަނީ ޖަމާކޮށްފަ އެވެ.
މި ފަހުން އައިސް އެފްއޭއެމްގެ މާލީ މައްސަލަތައް ވަނީ އިންތިހާއަށް ބޮޑުވެ، އެފްއޭއެމް ބަނގުރޫޓުވާން ކައިރިވެފަ އެވެ. އެގޮތުން އެ އިދާރާގައި މަސައްކަތް ކުރަމުން އަންނަ މުވައްޒަފުންނަށް މުސާރަ ނުދެވޭތާ ގިނަ މަސްތަކެއް ވެފައިވާއިރު، މުވައްޒަފުންގެ ޕެންޝަން ފައިސާ އަށް ވެސް ވަނީ ޚިޔާނާތްތެރިވެފަ އެވެ. އަނެއްކޮޅުން، އެކި އެކި ތަންތަނުން ޚިދުމަަތް ހޯދުމަށް އެތަންތަނަށް ދައްކަން ޖެހޭ ފައިސާ ވެސް އޮތީ ނުދައްކަ އެވެ. އެކަމުގެ ސަބަބުން އެފްއޭއެމާ ދެކޮޅަށް ކޯޓުން ޙުކުމްތައް އިއްވަމުންދާއިރު، އެ ފައިސާ ދެއްކި ކަމެއް ނުވަތަ ނޫން ކަމެއް ސާފެއް ނުވެ އެވެ.
