މަސްތުވާތަކެތީގެ މައްސަލައަކީ ސިޔާސީ ފިކުރަކާއި ނުވަތަ ސަރުކާރަކާއި ގުޅެންޖެހޭ ކަންކަމެއް ނޫން: އިމާދު
މައްސަލަތައް ހައްލުކުރުމަށްޓަކައި، ދައުލަތުގެ އެއްބާރުލުމާއި، އެހީތެރިކަން ފުރިހަމައަށް ލިބެންޖެހޭ
އެންޑީއޭގެ ސީއީއޯ އިމާދު ޞާލިހު
މަސްތުވާތަކެތީގެ މައްސަލައަކީ ސިޔާސީ ފިކުރަކާއި ނުވަތަ ސަރުކާރަކާއި ގުޅެންޖެހޭ ކަންކަމެއް ނޫންކަމަށް، ނޭޝަނަލް ޑްރަގް އެޖެންސީ (އެންޑީއޭ)ގެ ސީއީއޯ އިމާދު ސާލިހް ވިދާޅުވެއްޖެއެވެ.
އާދިއްތަ ދުވަހުގެ ރޭ ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން އިމާދު ވިދާޅުވީ، މަސްތުވާތަކެތި ފަދަ ބޮޑެތި ސޯޝަލް މައްސަލަތަކަކީ ވަކި ސިޔާސީ ޕާޓީއަކާއި، ސިޔާސީ ފިކުރަކާއި ނުވަތަ ސަރުކާރަކާއި ގުޅިގެން ހުންނަ މައްސަލަތަކެއް ނޫންކަމަށެވެ. ކޮންމެ ވެރިކަމެއްގައިވެސް މިފަދަ މައްސަލަތަކަށް ހައްލު ހޯދުމަށް ޤައުމީ ސިޔާސަތެއް އޮންނަންޖެހޭކަމަށާއި، ޤައުމީ ވިސްނުމަކާއެކު މިފަދަ މައްސަލަތަކަށް ހައްލު ހޯދުމަށް މަސައްކަތްކުރަންޖެހޭކަމަށްވެސް އިމާދު ފާހަގަކުރެއްވިއެވެ.
އިމާދު އިތުރަށް ވިދާޅުވީ، ކޮންމެ ވެރިކަމެއްގައިވެސް މިފަދަ ބޮޑެތި މައްސަލަތަކަށް ހައްލު ހޯދުމަށް ބައްޓަންކުރާ ސިޔާސަތުތަކަކީ ހަރުދަނާ، ބިނާކުރަނިވި އަދި ދެމެހެއްޓެނިވި ގޮތެއްގައި ހައްލު ހޯދޭނެ ސިޔާސަތުތަކަކަށް ވާންޖެހޭކަމަށެވެ. އަދި މިފަދަ ސިޔާސަތުތައް ބިނާވާންޖެހޭނީ އިލްމީ ހަގީގަތުގެ މައްޗަށްކަމަށްވެސް އިމާދު ފާހަގަކުރެއްވިއެވެ.
ރާއްޖޭގައި އޮތް އެންމެ ބޮޑު ސޯޝަލް މައްސަލައަކީ މަސްތުވާތަކެތީގެ މައްސަލަކަން ފާހަގަކުރައްވާ އިމާދު ވިދާޅުވީ، މި މައްސަލައަކީ ރާއްޖޭގެ ހުރިހާ އިޖްތިމާއީ މައްސަލަތަކާއި ގުޅި ލާމެހިފައިވާ މައްސަލައެއްކަމަށެވެ. އަދި މިފަދަ މައްސަލަތައް ހައްލުކުރުމަށްޓަކައި، ދައުލަތުގެ އެއްބާރުލުމާއި، އެހީތެރިކަން ފުރިހަމައަށް ލިބެންޖެހޭނެކަމަށްވެސް އިމާދު ފާހަގަކުރެއްވިއެވެ.
