މިއަހަރުގެ ފުރަތަމަ ޓާމްގެ މިޑް ބްރޭކަށްފަހު ސްކޫލުތަކުގެ ކިޔެވުން ފަށައިފިއެވެ.
ބަންދަށް ސްކޫލުތަކުގެ ކިޔެވުން މެދުކަނޑާލީ ހަފްތާއެއްގެ މުއްދަތަށެވެ. އެއީ އޮކްޓޫބަރު މަހުގެ 15ވީ އާދިއްތަ ދުވަހުން ފެށިގެން 21 ވީ ހޮނިހިރު ދުވަހުގެ ނިޔަލަށެވެ.
ހަފްތާއެއްގެ ބަންދަކަށްފަހު އާދިއްތަ ދުވަހު ރާއްޖޭގެ ހުރިހާ ސްކޫލެއްގައި ވަނި ކިޔަވައިދޭން ފަށާފައެވެ.
ދިރާސީ އައު އަހަރުގެ ފުރަތަމަ ޓާމްގެ ކިޔެވުން ކުރިއަށްދާއިރު، ފުރަތަމަ ޓާމްގެ ބަންދުވާނީ 24 ޑިސެންބަރު 2023ން 04 ޖެނުއަރީ 2024 ށެވެ. އަދި ދެވަނަ ޓާމްގެ ކިޔެވުން ފެށޭނީ 07 ޖެނުއަރީ 2024 ވާ އާދިއްތަ ދުވަހެވެ.
މި އަހަރުގެ ދިރާސީ އަހަރުގެ ކިޔެވުން 84200 އެއްހާ ދަރިވަރުންނާއެކު ފަށައިފައިވަނީ 6 އޮގަސްޓު 2023 ގައެވެ. އެއީ ސަރުކާރު ސްކޫލްތަކުގައި ކިޔަވާ 73078 ދަރިވަރުންނާއި އަދި އަމިއްލަ ސްކޫލްތަކުގައި ކިޔަވާ ދަރިވަރުންނާ އެކުގައެވެ. މީގެތެރެއިން 24000ށްވުރެ ގިނަ ދަރިވަރުން ކިޔަވަނީ މާލެ ސަރަހައްދުގައެވެ.
ސަރުކާރުގެ 216 ސްކޫލެއްގައި ކިޔަވައިދޭއިރު، މީގެތެރެއިން 156 ސްކޫލެއްގައި ކިޔަވައިދެނީ އެއްދަންފަޅިއަށެވެ. ހުރިހާ ސްކޫލެއް އެއްދަންފަޅިއަށް ބަދަލުކުރުމަކީ މިސަރުކާރުގެ ސިޔާސަތެކެވެ.
މީގެއިތުރުން ސެޓްލައިޓް ސްކޫލްގެ ނިޒާމަށް 6 ސްކޫލެއްގައި ކިޔަވައިދޭއިރު އެއީ ވ، ތިނަދޫ ސްކޫލާއި ރަކީދޫ ސްކޫލާއި ފެހެންދޫ ސްކޫލާއި ފުޅަދޫ ސްކޫލުގެ އިތުރުން ކޮނޑޭ އަދި ދިއްދޫ ސްކޫލު ކަމަށް އެޑިޔުކޭޝަން މިނިސްޓްރީން މައުލޫމާތުދެއެވެ.
