އިސްރާއީލުން ޣައްޒާގެ ހިސާބުތައް އެއްކޮށް ބަންދުކުރުމާއެކު ޣައްޒާގެ ހާލަތު ގޯސްވެ، ސީރިއަސް ބަލިމަޑުކަމެއް ފެތުރިގެން ހިނގައިދާނެ ބިރު ހީވެފައިވާ ކަމަށް މީޑިއާތަކުން ރިޕޯޓްކޮށްފިއެވެ.

މީޑިއާ ރިޕޯޓްތައް ބުނާ ގޮތުން މިހާރު ސާފު ބޯފެން ލިބުމުގައި ގިނަ ހިސާބުތަކުގައި ވަރަށް ބޮޑަށް ވަނީ ދަތިވާން ފަށާފައެވެ. ބައެއް ކުޑަކުދިންނަށް ވެސް ދުވާލެއްގެ މައްޗަށް ދެމުން ދަނީ އެންމެ ފުޅިއެއްގެ ފެން ކަމަށް މީޑިއާތަކުން ވަނީ ރިޕޯޓްކޮށްފައެވެ. ފުރަތަމަކޮޅު އެކަމުގެ ސަބަބުން ކުޑަކުދިންނަށް ވަރަށް ބޮޑަށް އުނދަނގުވި ނަމަވެސް ފެނަށް ޖެހުނަ ނުދިނުމަށް މިހާރު އެ ހާލަތަށް ހޭނުމަށް މަސައްކަތް ކުރަމުންދާ ކަމަށް އާއްމުންނާއި ހަވާލާދީ ރިޕޯޓްކޮށްފައިވެއެވެ.

އިސްރާއީލުން ވަނީ ޣައްޒާގެ އުތުރުން 1.1 މިލިއަނެއްހާ މީހުން ފައްސާ ބޭރުކޮށްލާފައެވެ. އަދި މެދު ނުކެނޑި ޣައްޒާގެ އެކި ހިސާބުތަކަށް ބޮމުގެ ހަމަލާތައް ދަނީ ދެމުންނެވެ. ޣައްޒާގައި ހަރަކާތްތެރިވާ ވޯޓަރ އެންޑް ސެނިޓޭޝަން އޮފިސަރެއްކަމުގައިވާ މުޝްތަހާ ވަނީ މިހާރު މީހުން ނިދަމުން ދަނީ މަގުތަކާއި ކާރާއި މިސްކިތްތަކުގައި ކަމަށް ބުނެފައެވެ. އަދި 200 ސްކޮއަރ މީޓަރ އެޕާޓްމެންޓެއްގައި 100 އެއްހާ މީހުން ނިދާ ކައިބޮއި ހަދަމުންދާ ކަަމަށާއި އެކަމުގެ ސަބަބުން ސާފުތާހިރުކަން ދެމެހެއްޓުމަށް ދަތިވާކަމަށް އޭނާ ވަނީ ބުނެފައެވެ.

މީގެއިތުރުން ސުޕަރމާކެޓުތަކުން ސާފުތާހިރުކަމަށް ބޭނުންވާ ސާމާނުތައް ހުސްވެފައިވާ ކަމަށް ވެސް އޭނާ ވަނީ ބުނެފައެވެ. އެއްވެސް ކަހަލަ އިންޒާރަކާއި ނުލާ އިސްރާއީލުން ދޭ ހަމަލާތަކުގެ ސަބަބުން އެތައް އާއްމުންނެއް ވަނީ ނުރައްކަލަށް ހުށަހެޅިފައެވެ. މި ހާލަތުގެ ޝިކާރައަކަށްވެފައިވާ ބައެއް މީހުންނަށް ފެން ފޮދެއް ނުލިބި 24 ގަޑިއިރު ވެސް ހޭދަ ކުރަން ޖެހޭ ކަމަށް މުޝްތަހާ ބުންޏެވެ. އެހެންކަމުން ރައްކާތެރި ބޯފެން ނުލިބި ކޮލެރާ ފަދަ ބަލިތަކަށް މަގުފަހިވެދާނެ ކަމުގެ ބިރު އޮތް ކަމަށް އޭނާ އިތުރަށް ބުންޏެވެ.