ޣައްޒާ ދޫކޮށް ރަފާ ބޯޑަރު ސަރަހައްދަށް ނުދާ ކޮންމެ މީހަކާމެދު އަމަލުކުރާނީ ޓެރަރިސްޓެއްގެ ގޮތުގައި ކަމަށްބުނެ، އިޒްރޭލުން ޣައްޒާގެ ރައްޔިތުންނަށް މިއަދު އިންޒާރު ދެމުން އެބަދެއެވެ.
ޣައްޒާގެ ބިމުން ޚަބަރުތައް ގެނެސްދެމުން އަންނަ އަލްޖަޒީރާގެ ނޫސްވެރިން މިއަދު ބުނެފައިވަނީ، ޣައްޒާގެ ރައްޔިތުންގެ ފޯނުތަކަށް ކޯލެއް މިއަދު ލިބެމުން އަންނަ ކަމަށާއި، އެ ކޯލުގައި އިއްވަނީ ރެކޯޑުކޮށްފައިވާ މެސެޖެއް ކަމަށެވެ.
އެ މެސެޖުގައި ބުނަނީ، ޣައްޒާ ދޫކޮށް މިސްރުގެ އައްސޭރިއަށް (ރަފާ ބޯޑަރު ސަރަހައްދަށް) ދިއުމަށް ކަމަށާއި، ނުދާ ކޮންމެ މީހަކީ ޓެރަރިސްޓެއްގެ ގޮތުގައި ބަލާނެކަމަށެވެ. އަދި އެމީހަކާމެދު އަމަލުކުރާނީ ޓެރަރިސްޓަކާމެދު އަމަލުކުރާ ގޮތަށް ކަމުގައި އެ މެސެޖުގައި ބުނާކަމަށްވެސް ބުނެފައިވެއެވެ.
މީޑިއާ ރިޕޯޓްތައް ބުނާގޮތުގައި، އިޒްރޭލުގެ ފައުޖުތަކުން މިހާރު ތައްޔާރުވަމުން އަންނަނީ އެއްގަމު މަގުން ޣައްޒާ ތެރެއަށް ވަދެގަންނާށެވެ. އެއީ ހަނގުރާމައިގެ ދެވަނަ މަރުހަލާ ކަމުގައި އިޒްރޭލުންވެސް ބުނެފައިވެއެވެ. އަދި ތިންވަނަ މަރުހަލާއަކީ ހަމާސް ޖަމާއަތް އެކުގައި ނައްތާލައި، ޣައްޒާއާއި އިޒްރޭލުން ހަވާލުވުން ކަމުގައިވެސް ބުނެފައިވެއެވެ.
ޣައްޒާގެ ހާލަތު ވަރަށް ބޮޑަށް ނުތަނަވަސްވެ ހަލަބޮލިވެފައި ވާއިރު، ހަމަނުޖެހުންތަކުގެ ތެރޭގައި (ބަލިމީހުންނާއި ގެދޮރު ގެއްލިފައިވާ މީހުން ހިމެނޭގޮތުން) އާންމުން ވަނީ ބޮޑު އިންސާނީ ކާރިސާއެއްގެ ތެރޭގައެވެ.
ފަލަސްތީނުގެ ރެޑް ކްރެސެންޓުން ބުނީ އެ ސަރަހައްދުގައި މިހާރު ހިނގަމުންދާ ހަމަނުޖެހުންތަކުގެ ސަބަބުން ހާލުގައި ޖެހިފައިވާ މީހުންގެ ފުރާނަ ސަލާމަތްކުރުމަށް ބައިނަލްއަގުވާމީ ގޮތުން އަވަސް ފިޔަވަޅުތަކެއް ނާޅައިފިނަމަ ގިނަބައެއް ފުރާނަ ގެއްލިގެން ދާނެކަމަށެވެ.
