"އއ. ތޮއްޑޫގައި ހިންގާ ޓޫރިސްޓް ފެސިލިޓީތަކުގެ ދަފްތަރު"ގައި ރަޖިސްޓްރީވުމަށް ހުޅުވާލައިފި

"އއ. ތޮއްޑޫގައި ހިންގާ ޓޫރިސްޓް ފެސިލިޓީތަކުގެ ދަފްތަރު"ގައި ރަޖިސްޓްރީވުމަށް ހުޅުވާލައިފިއެވެ.

ހޮނިހިރު ދުވަހު އއ. ތޮއްޑޫ ލޯކަލް އޮތޯރިޓީ ކޮމްޕެނީ (ޓީއެލްއޭސީ)ން ކުރި އިއުލާނެއްގައި ބުނެފައިވަނީ، ތޮއްޑޫގައި ރަޖިސްޓަރީކޮށްގެން ހިންގާ ޓޫރިސްޓް ފެސިލިޓީތައް ހިމެނޭ ދަފްތަރު އެކުލަވާލައި ބަލަހައްޓަންޖެހޭތީ، "އއ. ތޮއްޑޫގައި ހިންގާ ޓޫރިސްޓް ފެސިލިޓީތަކުގެ ދަފްތަރު" ގައި ރަޖިސްޓްރީވުމަށް ހުޅުވާލާފައި ވާކަމަށެވެ.

މި ދަފްތަރު އެކުލަވާލުމުގެ މައިގަނޑު މަގުސަދަކީ، ތޮއްޑޫގައި ޓޫރިސްޓުންނަށް ޚާއްސަކުރެވޭ މޫދު ސަރަހައްދުތަކާބެހޭ ގަވާއިދުގެ 11 ވަނަ މާއްދާގެ ދަށުގައިވާ ކަންކަން ތަންފީޒުކުރުމުގެ ގޮތުން ކުރަންޖެހޭ ކަންކަން ކުރުމަށް، ތޮއްޑޫގައި ހިންގާ ޓޫރިސްޓް ފެސިލިޓީތަކާ މުއާމަލާތްކުރެވޭނެ މައުލޫމާތު އެއްކުރުންކަމަށް އެ އިއުލާނުގައި ވަނީ ބުނެފައެވެ. އަދި "ތޮއްޑޫ މޯލްޑިވްސް" ބްރޭންޑް އިޝްތިހާރުކުރުމުގެ ގޮތުން ކުރުމަށް ރާވާފައިވާ ކަންކަން ކުރުމަށް މި ދަފްތަރު ބޭނުންކުރެވޭނެ ކަމަށްވެސް އެ އިއުލާނުގައި ވަނީ ބުނެފައެވެ.

އެގޮތުން، 31 އޮކްޓޯބަރު 2023ވާ އަންގާރަ ދުވަހުގެ 17:00ގެ ކުރިން، ތޮއްޑޫގައި ހިންގާ ޓޫރިސްޓް ފެސިލިޓީތަކުން މި ދަފްތަރުގައި ރަޖިސްޓަރީކުރުމަށް ވަނީ ހުޅުވާލާފައެވެ.