ޕީއެސްއައިޕީތަކަށް ކުރި ހޭދަ 9.26 ބިލިއަނަށް

މިއަހަރުގެ މިހާތަނށް ޕަބްލިކް ސެކްޓަރ އިންވެސްޓްމެންޓް ޕްރޮޖެކްޓު (ޕީއެސްއައިޕީ) ތަކަށް ކުރި ހޭދަ 9.26 ބިލިއަން ރުފިޔާއަށް އަރާފައިވާ ކަމަށް ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާންމުކޮށްފައިވާ ހިސާބުތަކުން ދައްކާގޮތުގައި މި މަހުގެ 12 ވަނަ ދުވަހާ ހަމައަށް ޕީއެސްއައިޕީ ޕްރޮޖެކްޓުތަކަށް ކުރި ޚަރަދު 9.26 ބިލިއަން ރުފިޔާއަށް އަރާއިރު މިއީ މިދިޔަ އަހަރުގެ މި މުއްދަތާ އަޅާ ބަލާއިރު 3.2 ބިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ޕީއެސްއައިޕީ މަޝްރޫއުތަކަށް ޚަރަދުކޮށްފައިވަނީ 6.09 ބިލިއަން ރުފިޔާއެވެ.

Advertisement

ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިއަހަރު އެންމެ ބޮޑު ހޭދައެއް ކޮށްފައިވަނީ ބަނދަރާއި ބްރިޖު އަދި އެއަރޕޯޓު ތަރައްގީ ކުރުމުގެ މަޝްރޫއުތަކަށާއި ބިން ހިއްކުމާއި މަގު ހެދުމުގެ މަޝްރޫއުތަކަށެވެ. އެގޮތުން، އެއަރޕޯޓު ތަރައްގީ ކުރުމަށް 1.28 ބިލިއަން ރުފިޔާ ހޭދަކޮށްފައިވާއިރު ބަނދަރު ހެދުމަށް 843.7 މިލިއަން ރުފިޔާ، ބްރިޖު ހެދުމަށް 687.9 މިލިއަން ރުފިޔާ، މަގު ހެދުމަށް 1.02 ބިލިއަން ރުފިޔާ އަދި ބިން ހިއްކުމަށް 1.57 ބިލިއަން ރުފިޔާ މިހާތަނަށް ވަނީ ހޭދަކޮށްފައެވެ.

މިހާތަނަށް އައިއިރު ރާއްޖޭގެ ތަރައްގީއާ ގުޅޭ އެކި ދާއިރާތަކުން މަޝްރޫއުތައް ހިންގާފައިވާކަމަށް ސަރުކާރުން ވަނީ ހާމަކޮށްފައެވެ. އެގޮތުން ގައުމީ ސަލާމަތާ ގުޅުންހުރި މަޝްރޫއުތަކަށް 123.5 މިލިއަން ރުފިޔާ މިހާތަނަށް ވަނީ ޚަރަދުކޮށްފައެވެ. މިދިޔަ އަހަރުގެ މި މުއްދަތުގައި ޤައުމީ ސަލާމަތާ ގުޅުންހުރި މަޝްރޫއުތަކަށް ހޭދަކުރީ 33.9 މިލިއަން ރުފިޔާއެވެ.

ސިއްހީ ދާއިރާގެ މަޝްރޫއުތަކަށް މި މަހުގެ 12 ވަނަ ދުވަހާ ހަމައަށް 280 މިލިއަން ރުފިޔާ ދައުލަތުން ވަނީ ޚަރަދުކޮށްފައެވެ. އަދި ތައުލީމީ ދާއިރާއިން ޔުނިވަރިސޓީތަކާއި ސްކޫލްތައް ހެދުމުގެ މަޝްރޫއުތަކަށް 370.8 މިލިއަން ރުފިޔާ ހޭދަކޮށްފައިވާއިރު މިއީ މިދިޔަ އަހަރުގެ މި މުއްދަތާ އަޅާ ބަލާއިރު 215 މިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ މި މުއްދަތުގއި ސިއްހީ ދާއިރާ އަދި ތައުލީމީ ދާއިރާއަށް ހޭދަކޮށްފައިވަނީ 434.8 މިލިއަން ރުފިޔާއެވެ.

ތިމާވެށީގެ ދާއިރާއިން ވެސް އެކި މަޝްރޫއުތައް ހިންގުމަށް ސަރުކާރުން ވަނީ މި މުއްދަތުގެ ތެރޭގައި 769.9 މިލިއަން ރުފިޔާ ހޭދަކޮށްފައެވެ. އެގޮތުން، ކުނި މެނޭޖް ކުރުމުގެ މަޝްރޫއުތަކަށް 176.7 މިލިއަން ރުފިޔާ ހޭދަކޮށްފައިވާއިރު ގޮނޑުދޮށް ހިމާޔަތް ކުރުމުގެ މަޝްރޫއުތަކަށް 209.8 މިލިއަން ރުފިޔާ، ފެންހިންދާ ނިޒާމު ގާއިމު ކުރުމަށް 25.3 މިލިއަން ރުފިޔާ އަދި އިއާދަކުރަނިވި ހަކަތައާ ގުޅުންހުރި މަޝްރޫއުތަކަށް 358.1 މިލިއަން ރުފިޔާ ވަނީ ހޭދަކޮށްފައެވެ.

މީގެ އިތުރުން ފެނާއި ނަރުދަމާނިޒާމު ގާއިމު ކުރުމަށް 1.195 ބިލިއަން ރުފިޔާ ހޭދަކޮށްފައިވާއިރު ހައުސިންގ މަޝްރޫއުތަކަށް 614.9 މިލިއަން ރުފިޔާ، މިސްކިތްތައް ބިނާ ކުރުމަށް 53.2 މިލިއަން ރުފިޔާ، އިޖުތިމާއީ ދާއިރާގެ މަޝްރޫއުތަކަށް 63.5 މިލިއަން ރުފިޔާ، ކުޅިވަރުގެ ދާއިރާގެ މަޝްރޫއުތަކަށް 158.7 މިލިއަން ރުފިޔާ، މަސްވެރިކަމާއި ދަނޑުވެރިކަމުގެ ދާއިރާގެ މަޝްރޫއުތަކަށް 130.5 މިލިއަން ރުފިޔާ ވަނީ މި މުއްދަތުގެ ތެރޭގައި ހޭދަކޮށްފައެވެ.

މިއަހަރު ސަރުކާރުން ޕީއެސްއައިޕީތަކަށް ކުރި ހޭދަ މިވަނީ މިއަހަރަށް ލަފާ ކުރި އަދަދަށްވުރެ އިތުރުވެފައެވެ. އެގޮތުން، މިއަހަރުގެ ބަޖެޓުގައި މުޅި އަހަރަށް ޕީއެސްއައިޕީތަކަށް ހޭދަވާނީ 8.5 ބިލިއަން ރުފިޔާ ކަމަށް ވަނީ ކަނޑައަޅައިފައެވެ.

މިއަހަރުގެ ބާކީ މިއޮތް ދުވަސްތަކަށް ފާސްކޮށްފައިވާ ބަޖެޓަށް ވުރެ 1.78 ބިލިއަން ރުފިޔާ ޕީއެސްއައިޕީތަކަށް ހޭދަވާނެ ކަމަށް ފިނޭންސުން މިހާރު ވަނީ ލަފާ ކޮށްފައެވެ، އެގޮތުން ޕީއެސްއައިޕީ މަޝްރޫއުތައް ހިންގުން ހަލުވިވެ، ބަޖެޓުކުރި މިންވަރަށްވުރެ ބޮޑަށް އެނޫން ޚަރަދުތައްވެސް ހިނގައި، ބަޖެޓު ފާސްކުރިއިރު ޚަރަދު ކުޑަކުރުމަށް ރާވާފައިވާ ގިނަ ފިޔަވަޅުތައް ރާވާފައިވާ ގޮތަށް ތަންފީޒުވެފައި ނުވާ ކަމަށެވެ. ޚަރަދު އިތުރުވާނެތީ 6.5 ބިލިއަން ރުފިޔާގެ ސަޕްލިމަންޓްރީ ބަޖެޓެއް މިހާރު ސަރުކާރުން ވަނީ މަޖިލީހަށް ހުށަހަޅައިފައެވެ.