މޮޅާއެކު އަލް ޙިލާލުން އެއް ވަނަ މަގާމު ދަމަހައްޓައިފި

ސައުދީ ޕްރޯ ލީގުގައި އަލް ޚަލީޖާ ދެކޮޅަށް ކުޅުނު މެޗުން އަލް ޙިލާލް މޮޅުވެއްޖެ އެވެ.

ހުކުރު ދުވަހުގެ ރޭ ކުޅުނު މެޗު އަލް ޙިލާލުން ކާމިޔާބު ކުރީ 1-0 އިންނެވެ. މެޗުގައި އެ ޓީމުގެ ބްރެޒިލް ތަރި ނޭމާ ޖޫނިއާ ކުޅެފައެއް ނުވެ އެވެ. ބައިނަލްއަޤުވާމީ ބްރޭކުގައި ބްރެޒިލުން ކުޅުނު މެޗެއްގައި ނޭމާ އަށް ލިބުނު އަނިޔާއެއްގެ ސަބަބުން އޭނާ ހުންނަން ޖެހެނީ ކުޅުމާ ދުރުގަ އެވެ. ނޭމާގެ ފަޔަށް ލިބުނު އަނިޔާ އާއެކު އޭނާ ޖެހެނީ އަނެއްކާ ވެސް ސާޖަރީއެއް ކުރާށެވެ. އެހެން ނަމަވެސް، ނޭމާ ކުޅުމާ ދުރުގައި ހުންނާނީ ކިހާ މުއްދަތަކަށް ކަމެއް ޔަގީނެއް ނުވެ އެވެ.

މެޗު ފަށައިގެން އަލް ހިލާލުން ވަނީ ލަނޑު ޖެހުމަށް މަސައްކަތް ކޮށްފަ އެވެ. މެޗުގެ ކުރީ ކޮޅު އެ ޓީމުގެ އެލެކްސެންޑާ މިޓްރޮވިޗަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފަ އެވެ. މެޗުން އަލް ޙިލާލް މޮޅުވީ ފުރަތަމަ ހާފުގެ 30 ވަނަ މިނެޓުގައި މިޓްރޮވިޗް ޖެހި ލަނޑުންނެވެ. އެއީ އަލް ޙިލާލަށް ލިބުނު ކޯނަރެއްގައި ހުރަސްވި ބޯޅައެއް އަލް ޚަލީޖުގެ ކުޅުންތެރިޔެއްގެ ބޮލުގައި ޖެހިފައި، ލިބުމުން ބޮލުން ގޯލަށް ވައްދާލައިގެން މިޓްރޮވިޗް ކާމިޔާބު ކޮށްދިން ލަނޑެކެވެ.

މޮޅާއެކު އަލް ޙިލާލުން ވަނީ އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅުނު 10 މެޗުން އެ ޓީމަށް ލިބެނީ 26 ޕޮއިންޓެވެ. ލީގުގައި ކުޅުނު 10 މެޗުން އެ ޓީމު ވަނީ އަށް މެޗުން މޮޅުވެފަ އެވެ. ދެ މެޗެއް ވަނީ އެއްވަރުވެފަ އެވެ. މި ސީޒަންގެ ސައުދީ ލީގުގައި މިހާތަނަށް ކުޅުނު އެއްވެސް މެޗަކުން އެ ޓީމު ބަލިވެފައެއް ނުވެ އެވެ.