ޑރ.މުއިއްޒު އަށް ކެމްޕެއިން ކުރުން އެމަނިކުފާނު ސިފަކުރެއްވީ ޤައުމީ މަސައްކަތެއްގެ ގޮތުގައި
މާލެ ސަރަހައްދުގައި ތިބި އެމަނިކުފާނުގެ ކެމްޕެއިން ޓީމްތަކާއި ޑރ.މުއިއްޒު ބައްދަލުކުރެއްވި
އިންތިޚާބީ ރައީސް ޑރ. މުހައްމަދު މުއިއްޒު
2023ގެ ރިޔާސީ އިންތިޚާބުގައި އިންތިޚާބީ ރައީސް ޑރ.މުހައްމަދު މުއިއްޒު އަށް ކެމްޕެއިންކޮށްދިނުމަކީ ވަރުގަދަ ޤައުމީ މަސައްކަތެއްގެ ގޮތުގައި އެމަނިކުފާނު ސިފަކުރައްވައިފިއެވެ.
އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެ ރޭ ސޯޝަލް ސެންޓަރގައި، މާލެ ސަރަހައްދުގައި ތިބި އެމަނިކުފާނުގެ ކެމްޕެއިން ޓީމްތަކާއި ބައްދަލުކުރައްވާ ވާހަކަފުޅުދައްކަވަމުންނެވެ. ޤައުމު އެދޭ މަންޒިލަށް ގެންދިއުމަށް އެންމެން އެކުގައި ކުރެއްވީ ވަރަށް ވަރުގަދަ ޤައުމީ މަސައްކަތެއް ކަމަށާއި މިއީ ޤައުމުގެ މުސްތަޤްބަލް އުޖާލާކުރުމަށް ލިބިގެން ދިޔަ ފުރުސަތެއް ކަމަށް ޑރ.މުއިއްޒު ވިދާޅުވިއެވެ.
ކަމެއް ހާސިލްކުރުމަކީ ކަމެއް ދެމެހެއްޓުމަށް ވުރެ ފަސޭހަކަމެއް ކަން ފާހަގަކުރައްވާ އެމަނިކުފާނު ވިދާޅުވީ ކުރިއަށް އޮތްތަނުގައި ވެސް ކެމްޕެއިން ޓީމްތަކުން ރިޔާސީ ކެމްޕެއިންގެ ދުވަސްވަރު ދެއްކި އެކުވެރިކަން ދެއްކުމަށް އެދިވަޑައިގަންނަވާ ކަމަށެވެ. އެ އެކުވެރިކަން މަތީ އެއަށް ވުރެ ވަރުގަދަ އަޒުމެއްގައި އަތުކުރި އޮޅާލާ ބަޔަކަށް އެ ޓީމްތައް ވުމަށް އެދިވަޑައިގަންނަވާ ކަމަށް ވެސް ޑރ.މުއިއްޒު ވަނީ ވިދާޅުވެފައެވެ.
ކުރިއަށް އޮތީ ވަރަށް މުހިންމު ހައްސާސް ދުވަސްތަކެއް ކަމަށް ފާހަގަކުރައްވާ ޑރ.މުއިއްޒު ވިދާޅުވީ އެއީ ޤައުމު ހަމަ މަގަށް އެޅުވުމަށް އެންމެން އެކުގައި މަސައްކަތް ކުރަން ޖެހޭ ވަގުތު ކަމަށެވެ.
