ފަތުރުވެރިކަން ސިންދަފާތު ކުރުމަށް ދިވެހި ބޭސްވެރިކަން ސެގްމެންޓްއެއްގެ ގޮތުގައި ކުރާނަމަ، ދުރާލާ އެކަމަށް ތައްޔާރުވެ، ވަރަށް ގިނަ ދިރާސާތައްކުރަންޖެހޭ: ރާއިދު

ފަތުރުވެރިކަން ސިންދަފާތު ކުރުމަށް ދިވެހި ބޭސްވެރިކަން ސެގްމެންޓްއެއްގެ ގޮތުގައި ކުރާނަމަ، ދުރާލާ އެކަމަށް ތައްޔާރުވެ، ވަރަށް ގިނަ ދިރާސާތައްކުރަންޖެހޭކަމަށް އެމްއައިޓީޑީސީގެ މެނޭޖިންގ ޑިރެކްޓަރު މުހައްމަދު ރާއިދު ވިދާޅުވެއްޖެއެވެ.

ފަތުރުވެރިކަމުގެ ދާއިރާ ސިންދަފާތު ކުރުމާއި ގުޅޭގޮތުން ރާއްޖެޓީވީގެ "ފަސްކާފު" ޕްރާގްރާމްގައި ވާހަކަފުޅުދައްކަވަމުން މޯލްޑިވްސް އިންޓަރގްރޭޓެޑް ޓުއަރިޒަމް ޑިވޮލަޕްމަންޓް ކޯޕަރޭޝަން (އެމްއައިޓީޑީސީ)ގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވީ، ފަތުރުވެރިކަން ސިންދަފާތު ކުރުމުގެ ގޮތުން ދިވެހި ބޭސްވެރިކަން ސެގްމެންޓްއެއްގެ ގޮތުގައި ކުރިއެރުވުން ދަތިކަމަށެވެ.

ރާއިދު ވިދާޅުވީ، ދިވެހި ބޭސްވެރިކަން ރަނގަޅު ގޮތުގައި އަންނައޮތް ޖީލުތަކަށް ފޯރުކޮށްދޭނެ މީހުން މަދުކަމަށެވެ. އަދި ދިވެހި ބޭސްވެރިކަމުގެ ދާއިރާއިން މީހުން ތަމްރީނު ކުރުމުގެ ޕްރޮގްރާމްތައް ކޮންމެވެސް ވަރަކަށް ހެލްތު މިނިސްޓްރީއިން ކުރިއަަށްގެންދިޔަ ނަމަވެސް، އެ ޕްރޮގްރާމް ކާމިޔާބުކަމާއިއެކު ކުރިއަށް ގެންދެވުނު މިންވަރު އެނގިވަޑައިނުގަންނަވާކަމަށެވެ.

ރާއިދު އިތުރަށް ވިދާޅުވީ، ދިވެހި ބޭސް ވެރިކަމަކީ ބައެއް ރަށްރަށުގައި ވަރަށް ކުރިއަރާފައިވާ ދާއިރާއެއް ނަމަވެސް އަންނަން އޮތް ޖީލުތަކަށް އެކަން އޭގެ އެންމެ ރަނގަޅު ގޮތުގައި ފޯރުކޮށްދޭނެ ބަޔަކު ނެތުމުން އެކަމުގެ މާހިރުން މަދުވެ، ދިވެހި ބޭސްވެރިކަން ނެތެމުންދާކަމަށެވެ.

ފަތުރުވެރިކަން ސިންދަފާތު ކުރުމަށް ދިވެހި ބޭސްވެރިކަން ސެގްމެންޓްއެއްގެ ގޮތުގައި ކުރާނަމަ، ދުރާލާ އެކަމަށް ތައްޔާރުވެ، ވަރަށް ގިނަ ދިރާސާތައްކޮށް ދެމެހެއްޓެނިވި ގޮތެއްގައި އެކަން ކުރުމަކީ މުހިއްމުކަމެއްގެ ގޮތުގައިކަމަށް ރާއިދު ވަނީ ފާހަގަކުރައްވާފައެވެ.

މީގެއިތުރުން ރާއިދު ވިދާޅުވީ، މެޑިކަލް ޓުއަރިޒަމްއަށް ހުޅުވާލާއިރު، އެކަމަށް ވަރަށް ބޮޑަށް ތައްޔާރުވެ، ފަރުވާތެރިކަމާއިއެކު ހުރިހާ މަސައްކަތެއް މޮނިޓަރިން އޮތޯރިޓީތަކުން ކުރުން މިހިއްމުކަމަށެވެ. އަދި މިފަދަ ގޮތަކަށް މި މަސައްކަތްތައް ކުރިއަށް ގެންދެވިއްޖެނަމަ، މެޑިކަލް ޓުއަރިޒަމްގެ ދާއިރާ އަކީ ރަނގަޅުވެގެންދާނެ ދާއިރާއެއްކަމަށް ގަބޫލުފުޅުކުރައްވާކަމަށް ރާއިދު ވިދާޅުވިއެވެ. މީގެ އިތުރުން ރާއިދު ވިދާޅުވީ، އިންޑަސްޓްރީގައި ސެގްމަންޓެއް ހުޅުވާލަންވާނީ ދެމެހެއްޓެނިވި ގޮތެއްގައި އެކަން ކުރުމަށް ވަރަށް ބޮޑެތި ތައްޔާރީތަކެއްވެގެންކަމަށެވެ.