ހަނގުރާމަ ހުއްޓާލުމަށް ގޮވާލާ އެމެރިކާގެ ގާނޫނު ހަދާ މަޖިލިސް ހުންނަ އިމާރާތުގެ ތެރޭގައި އަޑުއުފުލައިފި
19 އޮކްޓޯބަރު 2023 | ބުރާސްފަތި 00:47މުޒާހަރާކުރަމުންދާއިރު ގޮވާލަމުންދަނީ ވަގުތުން ވަގުތަށް ހަނގުރާމަ ހުއްޓާލުމަށް
ކެޕިޓޮލް އެތެރޭގައި ހަނގުރާމަ ހުއްޓާލުމަށް ގޮވާލާ އަޑުއުފުލަނީ
މިހާރު ހިނގަމުންދާ އިސްރާއީލު ފަލަސްތީނު ހަނގުރާމަ ހުއްޓާލުމަށް ގޮވާލާ އެމެރިކާގެ ޤާނޫނު ހަދާ މަޖިލިސް ހުންނަ އިމާރާތްކަމަށްވާ ކެޕިޓޮލްގައި ޖުވިސް ވޮއިސް ކިޔާ ޖަމާއަތަކުން އަޑުއުފުލައިފިއެވެ.
އެމެރިކާގެ ގާނޫނު ހަދާ މަޖިލީހުގެ ތިރިގެ ހުންނަ އޮފީސް ތެރޭގައި މިމީހުން މުޒާހަރާކުރަމުންދާއިރު ގޮވާލަމުންދަނީ ވަގުތުން ވަގުތަށް ހަނގުރާމަ ހުއްޓާލުމަށެވެ. އަދި ގާނޫނު ހަދާ މަޖިލީހުގެ މެމްބަރުންނަށް އެކަމަށް ގޮވާލުމަށް ވަނީ ޑިމާންޑްކޮށްފައެވެ. ކެޕިޓޮލްގެ ފުލުހުން ގެންދަނީ އެތަނަށް އެއްވި މީހުން ހައްޔަރުކުރަމުންނެވެ.
މީގެއިތުރުން އެމީހުން އަންނަނީ އެމެރިކާގެ ރައީސް ޖޯ ބައިޑަން އިސްރާއީލަށް ދެމުންދާ ހިފެހެއްޓުމެއްނެތް އެއްބާރުމާ ގުޅިގެން އެކަމަށްވެސް ފާޑުކިޔަމުންނެވެ. އެގޮތުން އެމެރިކާގެ މެއިންސްޓްރީމް މީޑިޔާތަކުން މިހަނގުރާމައިގެ ހަމަ އެކަނި އިސްރާއީލުގެ ސައިޑް ގެނެސްދޭތީ އެކަމުގެ ރުޅިވެރިކަން އެމީހުން ހާމަކޮށްފައިވެއެވެ.
އެމީހުން އުންމީދުކުރަނީ މި އަޑުއުފުލުންތަކާއެކު އެމެރިކާގައިވެސް އިސްރާއީލު ސަރުކާރާ ދެކޮޅު މީހުން ތިބިކަން މެއިންސްޓްރީމް މީޑިޔާ މެދުވެރިކޮށް އެނގިގެންދާނެކަމަށެވެ.
މީގެއިތުރުން ބުދަ ދުވަހު އެމެރިކާގެ ވައިޓް ހައުސް ކައިރިއަށްވެސް އެމެރިކަން ޖުވިސްގެ އެތައް ސަތޭކަ ބަޔަކު އެއްވެ ވަނީ ޣައްޒާ އަށް ދެމުންދާ ހަމަލާތައް ހުއްޓާލުމަށް ގޮވާލާފައެވެ.
