އިސްރާއީލުގެ ހަމަލާތަކުގައި ޣައްޒާގެ 3،500އާ ގާތްކުރާ އަދަދަކަށް މީހުން ޝަހީދުކޮށްލައިފި
18 އޮކްޓޯބަރު 2023 | ބުދަ 14:34މިހާތަނަށް 12،000ށްވުރެ ގިނަ މީހުން ވަނީ ޒަޚަމްކޮށްލާފައި
ޣައްޒާގެ އަލް އަހްލީ ހޮސްޕިޓަލަށް ބޮންއެޅުމުގެ ސަބަބުން އެތަން ސުންނާފަތިވެފައި
އިސްރާއީލުގެ ހަމަލާތަކުގައި ޣައްޒާގެ 3،500އާ ގާތްކުރާ އަދަދަކަށް މީހުން ޝަހީދުކޮށްލާފައި ވާކަމަށް ރިޕޯޓުތައް ބުނެފިއެވެ.
އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ހަނގުރާމަ އިއުލާންކޮށް، ޣައްޒާއަށް ދެމުންގެންދާ ލާއިންސާނީ ހަމަލާތަކުގައި ޣައްޒާ ވަނީ އެއްކޮށް ސުންނާފަތިކޮށްލާފައެވެ. މި ހަމަލާތަކުގެ ސަބަބުން ޣައްޒާގެ އެތައް ބަޔަކު ޝަހީދުކޮށް ގިނަ ބަޔަކުވަނީ ޒަޚަމްކޮށްލާފައެވެ. އެގޮތުން މިހާތަނަށް 12،000ށްވުރެ ގިނަ މީހުން ވަނީ ޒަޚަމްކޮށްލާފައި ކަމަށް ރިޕޯޓުތައް ބުނެއެވެ.
މީގެ އިތުރުން އިސްރާއީލުން ވަނީ، ޣައްޒާއަށް އިންސާނީ އެހީ ފޯރުކޮށް ދިނުންވެސް ހުއްޓުވާފައެވެ.
ޣައްޒާގެ އެންމެ ކާރޫބާރޫ ބޮޑު ސަރަހައްދުގައި ހުންނަ އަލް އަހްލީ އަރަބް ހޮސްޕިޓަލަށް ދިން އުދުވާނީ ހަމަލާގައި، ހޮސްޕިޓަލުގައި އެޑްމިޓްކޮށްފައިވާ މީހުންނާއި، އެތަނަށް ޒިޔާރަތްކުރި މީހުންވެސް ހިމެނޭގޮތުން 500އަށްވުރެ ގިނަ މީހުން ޝަހީދުވެ އެތައްބަޔަކު ޒަޚަމްވެފައި ވާކަމަށް ސިއްހީ އިދާރާތަކުން ވަނީ ރިޕޯޓްކޮށްފައެވެ. އަދި މި ހަމަލާގައި މަރުވި މީހުންނާއި، ޒަޚަމްވި މީހުންގެ ތެރޭގައި އެތައް ކުޑަކުދިންނަކާއި މާބަނޑު އަންހެންހެނުން ހިމެނޭއިރު، މިރޭ އުފަންވި ކުދިންވެސް ހިމެނޭކަމަށް ސިއްހީ އިދާރާތަކުން ވަނީ ރިޕޯޓްކޮށްފައެވެ.
