މަސްތުވާތަކެތި ގެންގުޅެ އޭގެ ވިޔަފާރިކުރި މީހަކު ބަންދުކުރުމަށް އަމުރުކޮށްފި
18 އޮކްޓޯބަރު 2023 | ބުދަ 11:51އޭނާގެ ކުޑަކަމުދާތަކެތި ޓީއެޗްސީއަށާއި ސީއޯސީއަށް ޕޮޒިޓިވްވެފައިވޭ
ފުލުހުން ހޯދި މަސްތުވާތަކެތި ކޮތަޅަކަށް އަޅާފައި: ފައިލް
މަސްތުވާތަކެތި ގެންގުޅެ އޭގެ ވިޔަފާރިކުރި މީހަކު ބަންދުކުރުމަށް އަމުރުކޮށްފިއެވެ.
ދިވެހި ފުލުހުންގެ ހިދުމަތުން އެދިގެން ކްރިމިނަލް ކޯޓުން އަމުރު ނެރެފައިވަނީ ކ. ކާށިދޫ / ސްނޯވައިޓް، މުހައްމަދު ޝާވިން 5 ދުވަހަށް ބަންދުކުރުމަށެވެ. އެއީ މި މަހުގެ 17 ވަނަ ދުވަހުން ފެށިގެން 22 ވަނަ ދުވަހަށެވެ.
މުހައްމަދު ޝާވީން ބަންދުކުރާ މައްސަލައަކީ މަސްތުވާތަކެތި ގެންގުޅެ އެތަކެތީގެ ވިޔަފާރިކުރާ މައްސަލައިގައެވެ. ބަންދުގައި ބަހައްޓަން އަމުރު ކުރި ސަބަބެއްގެ ގޮތުގައި ބުނެފައިަވނީ އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތުހުމަތުކުރެވޭ މިންވަރުގެ ހެކި ގަރީނާއާއިި ފުލުހެއްގެ ބަޔާން އަދި އޭނާގެ ކުޑަކަމުދާތަކެތި ޓީއެޗްސީއަށާއި ސީއޯސީއަށް ޕޮޒިޓިވްވެފައިވާ ކަމަށެވެ.
ބަންދުގައި ބަހައްޓަން އަމުރުކުރި ހާލަތުގެ ގޮތުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި ގާނޫނު ނަންބަރު 12/2016 ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާގެ (ބ) އަށް ރިއާޔަތްކޮށް، މުޖްތަމައުގެ ސަލާމަތާއި ރައްކާތެރިކަމަށްޓަކައި ކަމަށެވެ.
އަދި ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބެއްގެ ގޮތުގައި ބުނެފައިވަނީ ޝަރީއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ (1) ވަނަ ނަންބަރުގައި ބަޔާންކުރާ ކަންކަން ފުރިހަމަވާކަމަށް ބެލެވުން ކަމަށެވެ.
