އަލް އަހްލީ ހޮސްޕިޓަލަށް އިސްރޭލުން ދިން ޙަމަލާ ރާއްޖެއިން ކުށްވެރިކޮށްފި
ހޮސްޕިޓަލް ތަކާއި ޢާއްމު ރައްޔިތުންގެ ބޭނުންތަކަށް ބޭނުންކުރާ ޢުމްރާނީ ވަޞީލަތްތަކަށް ޙަމަލާދިނުމަކީ ބައިނަލްއަގުވާމީ ގާނޫނާ ހިލާފުކަމެއް
ޣައްޒާގެ އަލް އަހްލީ ހޮސްޕިޓަލަށް ބޮންއެޅުމުގެ ސަބަބުން އެތަން ސުންނާފަތިވެފައި
ޣައްޒާގެ އަލް އަހްލީ ހޮސްޕިޓަލަށް އިސްރޭލުން ދިން ޙަމަލާ އެންމެ ހަރުކަށި ޢިބާރާތުން ދިވެހިރާއްޖެއިން ކުށްވެރިކޮށް އެއްވެސް ރަޙުމެއް ނެތި ދެމުންދާ ޙަމަލާތައް ހުއްޓުވުމަށް ކުރެވެން ހުރި ހުރިހާ މަސައްކަތެއް ކުރުމަށް ބައިނަލްއަޤުވާމީ މުޖުތަމަޢަށް ދިވެހިރާއްޖެއިން ގޮވާލައިފިއެވެ.
އިސްރާއީލުން ފަލަސްތީނުގެ ޣައްޒާއަށް ދިން ބޮމުގެ ހަމަލާއެއްގައި އަލް އަހްލީ ބަޕްޓިސްޓް ހޮސްޕިޓަލް އެއްކޮށް ފުނޑުފުނޑުވެ 500 މީހުން ވަނީ ޝަހީދުކޮށްލާފައެވެ. ޣައްޒާގެ ސިއްހީ އިދާރާތަކުން ކަށަވަރު ކޮށްދިން ގޮތުގައި އަންގާރަ ދުވަހުގެރޭ ދިން ބޮމުގެ ހަމަލާ އަމާޒުކޮށްފައިވަނީ ސީދާ އަލް އަހްލީ އަރަބް ހޮސްޕިޓަލަށެވެ. އެހަމަލާގައި ހޮސްޕިޓަލް ގައި އެޑްމިޓްކޮށްފައިވާ މީހުންނާއި، އެތަނަށް ޒިޔާރަތްކުރި މީހުންވެސް ހިމެނޭގޮތުން 500 އަށްވުރެ ގިނަ މީހުން ޝަހީދުވެ އެތައްބަޔަކު ޒަޚަމްވެފައިވާކަމަށް ސިއްހީ އިދާރާތަކުން ވަނީ ރިޕޯޓްކޮށްފައެވެ.
މިހަމަލާގައި ޝަހީދުވި މީހުންނާއި، ޒަޚަމްވި މީހުންގެ ތެރޭގައި އެތައް ކުޑަކުދިންނަކާއި މާބަނޑު އަންހެންހެނުން ހިމެނޭއިރު، އަންގާރަ ދުވަހުގެ ރޭ ވިހޭ ތުއްތު ކުދިންވެސް ހިމެނޭކަމަށް އެ ހޮސްޕިޓަލާއި ހަވާލާދީ ސިއްހީ އިދާރާތަކުން ވަނީބުނެފައެވެ.
މިކަން ކުށްވެރިކޮށް ރާއްޖެއިން ނެރުނު ބަޔާނުގައި ބުނެފައިވަނީ ޣައްޒާގެ އަލް އަހްލީ ހޮސްޕިޓަލަށް އިސްރޭލުން ދިން ޙަމަލާ އެންމެ ހަރުކަށި ޢިބާރާތުން ދިވެހިރާއްޖެއިން ކުށްވެރިކުރާ ކަމަށެވެ. މިޙަމަލާގައި ފަލަސްޠީނުގެ އެތައް ސަތޭކަ މައުސޫމް ރައްޔިތުންނެއް ޝަހީދުވެފައިވާ ކަމަށާއި، ޢާއްމު ރައްޔިތުންނަށް އަމާޒުކޮށް، ހޮސްޕިޓާތަކާއި ޢާއްމު ރައްޔިތުންގެ ބޭނުންތަކަށް ބޭނުންކުރާ ޢުމްރާނީ ވަޞީލަތްތަކަށް ޙަމަލާދިނުމަކީ ބައިނަލްއަޤުވާމީ އިންސާނީ ޙައްޤުތަކާ ބެހޭ ޤާނޫނުތަކާ ކަނޑައެޅިގެން ޚިލާފު އަދި އެއްވެސް ގޮތަކަށް ބަލައިގަނެވޭނެ ކަންކަމެއް ނޫން ކަމަށް ބުނެފައިވެއެވެ.
އަދި ފަލަސްޠީނުގެ ކުށެއް ނެތް ޢާއްމު ރައްޔިތުންނާ ދެކޮޅަށް އެއްވެސް ރަޙުމެއް ނެތި ދެމުންދާ ޙަމަލާތައް ހުއްޓުވުމަށް ކުރެވެން ހުރި ހުރިހާ މަސައްކަތެއް ކުރުމަށް ބައިނަލްއަޤުވާމީ މުޖުތަމަޢަށް ދިވެހިރާއްޖެއިން ގޮވާލި ގޮވާލުން ތަކުރާރުކޮށްފައިވެއެވެ. އަދި ޣައްޒާއަށް ބޭނުންވާ ބޭހާއި ކާބޯތަކެއްޗާއި ޒަރޫރީ ބޭނުންތަކަށް ބޭނުންވާ ތަކެތި ފޯރުކޮށްދިނުމަށް އިންސާނިއްޔަތުކަމުގެ ކޮރިޑޯތަކެއް ހުޅުވުމަށް ކުރަމުންދާ މަސައްކަތްތައް އިތުރަށް އަވަސްކުރުމަށް ވެސް ދިވެހިރާއްޖެއިން ގޮވާލާފައިވެއެވެ.
