އިސްރާއީލުން ދިން ހަމަލާތަކުގައި ފަލަސްތީނުން ޝަހީދުވި މީހުންގެ އަދަދު 3000 އިން މައްޗައް

މި މަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނަށް ދެމުން އަންނަ ހަމަލާތަކުގައި މަރުވި މީހުންގެ އަދަދު 3000 އިން މައްޗަށް އަރައިފިއެވެ.

ފަލަސްތީނުގެ ހެލްތު މިނިސްޓްރީން ހާމަކޮށްފައިވާގޮތުގައި މިއަދަދު 3000 އިން މައްޗަށް އަރާފައިވަނީ އަންގާރަ ދުވަހުގެ ރޭ އިސްރާއީލުން އެ ޤައުމުގެ ހޮސްޕިޓަލަކަށްދިން ހަމަލާއާ ގުޅިގެންނެވެ. އެ ހަމަލާގައި އެކަނި ވެސް 500 އެއްހާ މީހުން ވަނީ ޝަހީދުވެފައެވެ.

ޣައްޒާގެ އަލް އަހްލީ ހޮސްޕިޓަލަކީ އިސްރާއީލުން ދެމުން އަންނަ ހަމަލާތަކުގައި ޒަހަމްވެފައިވާ ގިނަ ބަޔަކަށް ފަރުވާދެމުން އައި ހޮސްޕިޓަލެކެވެ. އަދި ހާލުގައި ޖެހިފައިވާ ފަރާތްތަކުން ދިޔައީ އެ ހޮސްޕިޓަލުގައި ހިޔާވަހިކަން ހޯދަމުންނެވެ.

އަންގާރަ ދުވަހުގެ ރޭގެ މި ހަމަލާ ދުނިޔޭގެ ބައެއް ޤައުމުތަކުން ވަނީ ކުށްވެރިކޮށްފައެވެ. އިސްރާއީލުން ވަނީ މި ހަމަލާއަށް އިންކާރުކޮށް މިއީ ހަމާސްއިން ދޭން އުޅުނު ހަމަލާއެއް ނާކާމިޔާބުވެގެން ހޮޕިޓަލަށް އަމާޒުވި ހަމަލާއެއް ކަމަށް ބުނެފައެވެ. އަދި އިސްރާއީލުގެ ދިފާއުގައި މަސައްކަތް ކުރާ މީޑިއާތަކުން ދަނީ އެ ހޮސްޕިޓަލަކީ ހަމާސްގެ ހަނގުރާމަވެރިން ހަރަކާތްތެެރިވާ އެ މީހުންގެ އައްޑާއެއްގެ ގޮތުގައި ސިފަ ކުރަމުންނެވެ.

ފަލަސްތީނުގައި މިހާތަނަށް ޝަހީދުވި މީހުންގެ ތެރޭގައި ގިނައީ ކުޑަކުދިންނާއި އަންހެނުންނެވެ. މި ހަމަލާތައް ކުށްވެެރިކޮށް ބައެއް ޤައުމުތަކުގައި މިހާރު ދަނީ އިސްރާއީލާ ދެކޮޅަށް މުޒާހަރާވެސް ކުރަމުންނެވެ. .

އިސްރާއީލުން ފަލަސްތީނަށް ދެމުން އަންނަ ހަމަލާތައް ވަގުތުން ހުއްޓާލުމަށް ގޮވާލައި ދުނިޔޭގެ މުސްލިމް ޤައުމުތަކާއެކު ދިވެހިރާއްޖެއިން ވެސް ވަނީ އަޑު އުފުލާފައެވެ. އަދި އެ ހަމަލާތައް ރާއްޖެއިން ވަނީ ކުށްވެރިކޮށްފައެވެ.