ކުރިއަށް އޮތް ވެރިކަމަކީ ދިވެހީންގެ ގައުމިއްޔަތަށް އެންމެ އިސްކަންދޭ ވެރިކަމަށް ވާނެ - ޑރ.މުއިއްޒު
17 އޮކްޓޯބަރު 2023 | އަންގާރަ 07:31ދިވެހީން ރީތި އުޅުމާއި ގޮތްފޮތް ދަމަހައްޓައި ދިވެހިންގެ ނަމާ އަބުރު ބައިނަލްއަގްވާމީ މަސްރަހުގައި އުފުލައިދޭނެ ސަރުކާރަކަށް އެ ސަރުކާރު ވާނެ ކަަމަށް ވިދާޅުވި
އިންތިޚާބީ ރައީސް ޑރ. މުހައްމަދު މުއިޒް
17 ނޮވެމްބަރު 2023 ގައި ގާއިމުވާ ޕީޕީއެމް-ޕީއެންސީ އަދި ގުޅިފައިވާ ޕާޓީތައް ބައިވެރިވާ ސަރުކާރަކީ އިސްލާދީނާ ދިވެހީންގެ ގައުމިއްޔަތަށް އެންމެ އިސްކަންދޭ ވެރިކަމަށް ވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުން ވިދާޅުވެއްޖެއެވެ.
ރާއްޖެ އިސްލާމްވި ދުވަހާއި ގުޅުވައިގެން އިންތިހާބީ ރައީސް ޑރ.މުއިއްޒު ނެރުއްވި ބަޔާނުގައި ވިދާޅުވެފައި ވަނީ މި ގައުމުގެ އިސްތިޤްލާލާ ފަޚުރުވެރިކަން ނަގަހައްޓައިދޭ ސަރުކާރަކަށް އެ ސަރުކާރު ވާނެ ކަމަށެވެ. އަދި ދިވެހީންގެ ރީތި އުޅުމާއި ގޮތްފޮތް ދަމަހައްޓައި ދިވެހިންގެ ނަމާ އަބުރު ބައިނަލްއަގްވާމީ މަޞްރަހުގައި އުފުލައިދޭނެ ސަރުކާރަކަށް އެ ސަރުކާރު ވާނެ ކަަމަށް ވިދާޅުވިއެވެ.
އެ ބަޔާނުގައި އިތުރަށް ވިދާޅުވެފައި ވަނީ އިސްލާމްދީން މަތީ ދިވެހިން ފައިތިލަ ސާބިތުކުރިތާ ހިޖުރީގޮތުން 9 ގަރުނު ފުރިހަމަވާން ބާކީ އޮތީ ތިން އަހަރުކަމަށް ވާއިރު، މި ގައުމަށް އެންމެ ހެޔޮ ބަދަލެއް ގެނުވި ތާރީހީ ހާދިސާއަކީ ރާއްޖޭ އިސްލާމްވުން ކަމަށެވެ. ވޭދުވެދިޔަ ދިގު މާޒީގައި ސައްތައިން ސައްތަ މުސްލިމް ގައުމެއްގެ ގޮތުގައި މި ގައުމު ދެމިއޮތް ކަމީ މުޅި ދުނިޔެއަށް ނަމޫނާއެއް ކަމަށް ވެސް އެމަނިކުފާނު ވިދާޅުވިއެވެ.
ފިކުރީ ގޮތުންނާއި އިގްތިޞާދީ ގޮތުންނާއި އިސްތިރާތިޖީ ގޮތުން ވެސް ތަފާތު އެކި ގޮންޖެހުންތައް ކުރިމަތީގައި ހުރި ކަމަށް އެ ބަޔާނުގައި ވިދާޅުވެފައިވެއެވެ. ދިވެހިން އެދެނީ އެ އިން ކޮންމެ ގޮންޖެހުމަކާ ވެސް ދިވެހި ގައުމު އިސްކޮށްގެން ދިވެހީންގެ މަސްލަހަތު ކުރިއަށް ނެރެގެން ކުރިމަތިލުން ކަމަށް ޑރ.މުއިއްޒު ވިދާޅުވިއެވެ.
ބަޔާނެއްގައި ވިދާޅުވީ ޕީޕީއެމް-ޕީއެންސީގެ ވެރިކަމަކީ އިސްލާމްދީނާއި ދިވެހި ގައުމިއްޔަތަށް އިސްކަންދޭ ވެރިކަމަކަށް ވެގެންދާނެ ކަމަށެވެ. އެ ބަޔާނުގައި ރާއްޖެ އިސްލާމްވިތާ 897 އަހަރު ފުރޭ މުނާސަބަތުގައި ތަހުނިޔާ އާއި މުބާރަކްބާދު ދިވެހި ރައްޔިތުންނަށް އަރިސްކުރައްވާފައިވެއެވެ. އަދި އިސްލާމްދީނުގެ މަތިވެރި އަޤީދާއާއި ތެދުމަގުގައި ދިވެހި އުންމަތް ތާއަބަދަށް ލެހެއްޓުވުން އެދި ކީރިތި ﷲ ގެ ހަޟްރަތުގައި ދުއާ ދަންނަވާ ކަމަށް އެމަނިކުފާނު ވިދާޅުވިއެވެ.
