"މިނިވަނުންގެ ދުނިޔެއަކުން އަހަރަމެން މަރާ ހުސް ކުރަމުން އެ ދަނީ... ޢަރަބި ޤައުމުތަކަށް އިތުބާރެއް ނެތް"

އެއީ މީގެ ކުރިން އޭނާގެ ޢާއިލާ ދިރިއުޅެމުން ދިޔަ ގެ ހުރި ތަނެވެ. ނަމަވެސް، ޢުމުރުން 61 އަހަރުގެ މުޙައްމަދު އަބޫ ދަޤްތާގެ ކުރިމަތީގައި މިއަދު ފެންނަން އޮތީ ބިމާ ހަމަކޮށްފައި ވާ ޢިމާރާތެއްގެ ބައިތަކެވެ. އަޑުން އަޑު ނަގައި، އެހީއަކަށް އެދި އާދޭސް ކުރަމުން ދިޔަ މުޙައްމަދުގެ ހިތުގައި އަޅަމުން ދާ ވޭން، އޭނާގެ ރޮއި ގިސްލުމުން އަންގައިދެއެވެ. އެ ހިތްދަތި ކަމަކީ ދިރިއުޅުނު ގެ ބިމާ ހަމަ ކުރުމުން އުފެދިފައި ވާ ޖަޒުބާތެއް އެކަންޏެއް ނޫނެވެ. މުޙައްމަދުގެ ޢާއިލާ މެންބަރުން އަދިވެސް ވީ، ވެއްޓިފައި ވާ އެ ޢިމާރާތުގެ ބައިތަކުގެ ދަށުވެފައެވެ. އޭނާ އާދޭސް ކުރަމުން އެ ދަނީ، ގައުކުނޑިތަކުގެ އަޑިން، އޭނާގެ ޢާއިލާ މެންބަރުން ނަގައި ދިނުމަށް އެދިއެވެ.

އޮކްޓޯބަރު 7 ވަނަ ދުވަހުން ފަށައިގެން ޔަހޫދީ އިޒްރޭލުން ޣައްޒާއަށް ދެމުންދާ ރަޙުމެއް ނެތް ޢުދުވާންތަކުގައި، މުޙައްމަދުގެ ޢާއިލާއިން 8 މެންބަރެއްގެ ފުރާނަ ވަނީ ގެއްލިފައެވެ. އިތުރު 3 މީހަކު އަދިވެސް ވަނީ ވެއްޓިފައި ވާ ޢިމާރާތުގެ ބައިތަކުގެ ދަށުވެފައެވެ.

އިޒްރޭލުގެ ޢުދުވާންތަކަށް ހަފުތާއެއް ފާއިތުވެ ގޮސްފައި ވާ އިރު، ފުރާނަ ގެއްލިދިޔަ ފަލަސްޠީނު ރައްޔިތުންގެ ޢަދަދު 2300 އަށް އަރާ ކަމަށް ޣައްޒާގެ ކަމާ ބެހޭ ފަރާތްތަކުން ވަނީ ހާމަ ކޮށްފައެވެ. ރެކޯޑް ކުރެވިފައި ނެތް މަރުގެ އެތައް ކޭސްތަކެއް ހުރުން އަދިވެސް އެކަށީގެންވެއެވެ.

70 އެތައް އަހަރެއް ވީ ޢުދުވާންތަކުގައި ޣައްޒާ ހަފުސްވެފައި ވާ އިރު، އެކަމުގެ ވޭން އުފުލަން ޖެހެނީ ވަކި ޢުމުރެއްގެ ބަޔަކަށް ނޫނެވެ. އިޒްރޭލުގެ މި ފަހުގެ ޢުދުވާންތަކުގައި އެތައް ކުޑަކުދިންނެއްގެ ފުރާނަ ގެއްލިފައި ވާ އިރު، ގިނަ ޢަދަދެއްގެ ކުޑަކުދިން ވަނީ ޔަޠީމުވެސް ވެފައެވެ. ބައެއް ކުދިންގެ މަންމައާއި ބައްޕަވެސް މި ދުނިޔޭގައި މިއަދަކު ނެތެވެ.

އެފަދަ އެއް ކުއްޖަކީ ޢުމުރުން އެންމެ 4 އަހަރުގެ ފުއްލާ އަލް-ލަޙާމްއެވެ. އޭނާ ދިރިއުޅެމުން ދިޔަ ގެއަށް އަމާޒުވި އިޒްރޭލުގެ ޙަމަލާގައި ލިބުނު ޒަޚަމްތަކާއެކު ފުއްލާ ހޮސްޕިޓަލަށް ގެންދިޔައީ ރެސްކިއު ޓީމުގެ މެންބަރުންނެވެ. ފުއްލާއަށް ހަމަހޭވެރިކަން ވީ އިރު، އޭނާއަށް އޮވެވުނީ ޚާން ޔޫނިސްގެ ހޮސްޕިޓަލެއްގައި އެކަނި މައި އެކަންޏެވެ. އޭނާގެ ޢާއިލާގެ 14 މެންބަރަކު ވަނީ، އިޒްރޭލުގެ ޢުދުވާނުގައި މި ދުނިޔެ ދޫކޮށްފައެވެ. އޭގެތެރޭގައި ފުއްލާގެ މަންމައާއި، ބައްޕައާއި އެއްބަނޑު އެއްބަފާ ކުދިންވެސް ހިމެނެއެވެ.

ފުއްލާ ގާތުގައި މިއަދު އިން ހަމަ އެކަނި މީހަކީ އޭނާގެ މުސްކުޅި މާމަ، އުއްމު މުޙައްމަދުއެވެ. އުއްމި މުޙައްމަދުގެ ފިރިހެން ދަރިފުޅާއި، އެ ދަރިފުޅުގެ މުޅި ޢާއިލާ މިއަދު މި ދުނިޔެއަކު ނެތެވެ.

ހޮސްޕިޓަލު އެނދުމަތީގައި އޮތް ފުއްލާ ލޯ ހުޅުވާލުމާއެކު، އެ މާމަގެ މޫނު މަތިން ފެނިގެން ދިޔަ އުފާވެރިކަމާއި، އެ ހިތުގައި އަޅަމުން ދިޔަ ވޭނަކީ، މިފަދަ ގޮތަކަށް ސިފަކޮށްދެވޭނެ ޖަޒުބާތުތަކެއް ނޫނެވެ.

ޣައްޒާ ދޮވެލާ، ފަލަސްޠީނުގެ ނަޞްލު ދޮވެލުމަށް ފޫގަޅައިގެން އޮތް ޔަހޫދީ އިޒްރޭލުގެ ޢުދުވާންތައް މިއިން ދުވަހަކު ހުއްޓިދާނެ ކަމުގެ ނިޝާނެއް ފެންނާކަށް ނެތެވެ. ދުނިޔޭގެ އެންމެ ނުފޫޒުގަދަ ބާރުގެ ގޮތުގައި އޮތް އެމެރިކާއިން ބަހައްޓާފައި ވާ ބޮޑު އައްޑަނައިގެ ނިވަލުގައި ތިބެ، އިޒްރޭލުން ދެމުންދާ ލާއިންސާނީ އަދި ޣައިރު ޤާނޫނީ ޖަރީމާތަކާ ދެކޮޅަށް ބަހެއް ބުނެލުން ފިޔަވާ، އިސްލާމީ ބޮޑެތި ޤައުމުތަކުން ކުރި ކަމެއް ފެންނާކަށް އަދި ނެތެވެ. ހުރިހާ ހިތްދަތި ކަމަކާއި ވޭނެއް ތަޙައްމަލުކޮށް، ޚިޔާލަށްވެސް ގެންނަން ނޭނގޭ ބިރުވެރި ކަމެއްގެ ތެރޭގައި ދުވަސްތައް ބަރުދާސްތު ކުރަން ޖެހިފައި ވަނީ މުޙައްމަދާއި ފުއްލާ ފަދަ އިންސާނުންނަށެވެ.