ކަނޑުގެ ލޮނުގަނޑު އުފުލި، ރާއްޖެ އަޑިއަށް ހިނގައިދާނެ ކަމަށް ގަބޫލުނުކުރައްވާ ކަމަށް ޑރ. މުއިއްޒު ވިދާޅުވި ބަހުގެ މުރާދަކީ އެއީ ނޫން ކަމަށާއި، ކަނޑުގެ ލޮނުގަނޑު އުފުލުމާމެދު ޑރ. މުއިއްޒު ދެއްކެވި ވާހަކަފުޅު މާނަކުރަނީ ރަނގަޅަށް ނޫންކަމަށް، އިންތިޚާބީ ރައީސްގެ ތަރުޖަމާނު މުހައްމަދު ފިރުޒުލް އަބްދުﷲ ޚަލީލް މިއަދު ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ، މޫސުމީ ބަދަލުތަކުގެ އަސަރު ރާއްޖެއަށް ކުރާކަން ޑރ. މުއިއްޒުވެސް ގަބޫލުކުރައްވާ ކަމަށެވެ.
ދާދިފަހުން އަލްޖަޒީރާއަށް ދެއްވި އިންޓަރވިއުއެއްގައި، މޫސުމީ ބަދަލުތަކުގެ ސަބަބުން ރާއްޖެއަށް ކުރާ އަސަރުތަކާމެދު މުއިއްޒު ދެއްކެވި ވާހަކަފުޅުތަކަށް އާއްމުންގެ ފާޑުކިޔުން ވަނީ ވަރަށް ބޮޑަށް އަމާޒުވެފައެވެ. އަދި ތިމާވެށީގެ މައްސަލަތަކުގައި ބައިނަލްއަގުވާމީ މައިދާނުގައި ރާއްޖެއިން ގެންގުޅެމުންދާ ސްޓޭންޑް ބަދަލުކޮށްފައި ވާކަމަށް ބުނެ އެކަމުގެ ކަންބޮޑުވުން ދަނީ ފާޅުކުރަމުންނެވެ.
އެކަމާ ގުޅޭގޮތުން ނޫސްވެރިން ސުވާލު ދެންނެވުމުން ފިރުޒުލް ވިދާޅުވީ، މޫސުމީ ބަދަލުތަކުގެ ސަބަބުން ރާއްޖެއަށް ހުރި ގޮންޖެހުންތަކަކީ އިންތިޚާބީ ރައީސް ގަބޫލުކުރައްވާ ކަންކަން ކަމަށެވެ. އަދި އެކަންކަމަށް ތައްޔާރުވާން ކުރަންޖެހޭ މަސައްކަތްތައް ހުރިކަންވެސް މުއިއްޒު ގަބޫލުކުރައްވާ ކަމަށް އޭނާ ވިދާޅުވިއެވެ. އިންތިޚާބީ ރައީސް ދެއްކެވި ވާހަކަފުޅު، މަހްފުމޫން ބޭރުން މާނަކުރާކަމަށް ފިރުޒުލް ވަނީ ވިދާޅުވެފައެވެ.
ރާއްޖެ އަޑިއަށް ދާނެކަމަށް ގަބޫލުނުކުރައްވާ ކަމަށް މުއިއްޒު ވިދާޅުވިނަމަވެސް، އެއީ ތިމާވެށީގެ މައްސަލަތަކާއެކުވެސް، ރާއްޖެ ފާއިތުވި ތަނުގައި ގައުމެއްގެގޮތުގައި އަދި ދައުލަތެއްގެ ގޮތުގައި ދެމި އޮތް ގޮތަށް އޮންނާނެކަމުގެ ޔަގީންކަން ދެއްވުމުގެ ގޮތުން ދެއްކެވި ވާހަކަފުޅެއް ކަމަށް ފިރުޒުލް ވިދާޅުވިއެވެ. ހަމަ އެހެންމެ، އެއީ ރާއްޖެ ނެތިދާނެކަމުގެ ބިރުގައި ބޭރުގެ އިންވެސްޓަރުން ނާންނާނެ ކަމަށް ބުނާތީ ވާހަކަފުޅުދެއްކެވި ގޮތް ކަމަށްވެސް ފިރުޒުލް ވިދާޅުވިއެވެ. އެހެންކަމުން އެ ވާހަކަފުޅުތައް މާނަކުރަނީ ރަނގަޅަށް ނޫންކަމަށް ފިރުޒުލް ވަނީ ވިދާޅުވެފައެވެ.
