ފެންނަ ފެނުމަށް އައިސް ކްރީމް ލޮރީއެކެވެ... އެކަމަކު، އެތެރޭގައި އޮތީ ހުސް ޤަބުރެވެ!
ވަޅުލެވޭނެ އިންތިޒާމުތައް ހަމަޖެހެންދެން، ޤަބުރު ބާއްވާލާނެ މޯޗަރީއެއް ނެތް، މޯޗަރީތައްވެސް ފުރިއްޖެ
އިޒްރޭލުގެ ރަޙުމެއް ނެތް ޢުދުވާންތަކުގައި ޣައްޒާއިން ޝަހީދުވެ، މި ދުނިޔެއާއި ވަކިވެ ދިޔަ މީހުންގެ ޢަދަދު 3000 އާ ގާތް ކުރޭ
އަމިއްލަ ބިމުގެ މިނިވަން ކަމުގެ ޙައްޤުގައި ޔަހޫދީ އިޒްރޭލާއި ދެކޮޅަށް ޙަމާސް ޖަމާޢަތުން ދިން ޙަމަލާތަކުގެ ރައްދުގައި ކަމަށް ބުނެ، ޣައްޒާއާ ދެކޮޅަށް ރަސްމީ ސިފައެއްގައި ހަނގުރާމަ ޢިއުލާންކޮށް، އެޔެއް މިޔެއް ބެލުމެއް ނެތި، އިޒްރޭލުގެ އަސްކަރީ ފައުޖުތަކުން ފަލަސްޠީނުގެ މުސްލިމުން ޝަހީދު ކުރަމުންދާތާ ހަފުތާއެއް ފާއިތުވެ ދިޔައީއެވެ. އެހެން ނޫނީ ވިއްޔާ ދެބަޔަކު ކޯޅިލާއިރަށް ދަތިކުރުމުގެ ފިޔަވަޅުތައް އެޅުމުގައި ލައިނުގަނެގެން އުޅޭ، ދުނިޔޭގެ ބޮޑެތި ބާރުތަކަށް އެ މަންޒަރު ނުވެސް ފެންނަނީއެވެ. ބަޔަކަށް ނުފެނުނު ކަމުގައި ވީ ނަމަވެސް، ޣައްޒާގެ ޙާލަތު، ދުވަހަކަށް ވުރެ ދުވަހެއް ވަނީ ގޯހެވެ. ކޮންމެ 2 މިނެޓަކުން ހެން ބޮންތައް އަޅަމުން ދާއިރު، ޞިއްޚީ ނިޒާމު އޮތީ ނޭވާ ހޮޅިއަށް އެޅި، ހަމަ މުޅިންހެން އިނދަޖެހިފައެވެ.
އިޒްރޭލުގެ ރަޙުމެއް ނެތް ޢުދުވާންތަކުގައި ޣައްޒާއިން ޝަހީދުވެ، މި ދުނިޔެއާއި ވަކިވެ ދިޔަ މީހުންގެ ޢަދަދު 3000 އާ ގާތް ކުރާ އިރު، އޭގެ ތެރޭގައި އެތައް ސަތޭކަ ކުޑަ ކުދިންނެއްވެސް ހިމެނެއެވެ. އެއީވެސް ހަމަ، ހަމާސްގެ ހަނގުރާމަވެރިން ތޯއެވެ؟ މަރުވާ މީހުންނާއެކު ބިމާ ހަމަކުރަމުން ދާ ޢިމާރާތްތަކުގެ ބައިތައް ނަގައި ސާފު ކުރަމުން ދާ ވަރަކަށް، އިތުރު މީހުންގެ ހަށިތައް ދަނީ ފެންނަމުންނެވެ. މީހުން ވަޅުލާނެ ތަންތަންވެސް ޣައްޒާގައި މިއަދަކު ނެތެވެ. ވަޅުލެވޭނެ އިންތިޒާމުތައް ހަމަޖެހެންދެން، ޤަބުރު ބާއްވާލާނެ މޯޗަރީއެއްވެސް ނެތެވެ. މޯޗަރީތައްވެސް ފުރިއްޖެއެވެ.
ދިރިއުޅުމުގެ އަސާސީ ޙައްޤުތަކުން މަޚްރޫމުކޮށް، ދިރުހުރުމުގެ ޙައްޤު ނިގުޅައިގަނެފައި ވާ އިރު، މަރުވެފައި ވާ މީހަކަށް ލިބިދޭން ޖެހޭ ޙައްޤުތައްވެސް އަދާ ކޮށްދެވޭނެ ފަދައެއް ނެތެވެ. ފުނިޖެހެމުން ދާ ޤަބުރުތައް ބޭއްވުމަށްޓަކައި، ޣައްޒާގައި މިހާރު ވަނީ އައިސް ކްރީމް ލޮރީތަކާއި، ފިނި ކުރެވޭ ނިޒާމު ހަރުކޮށްފައި ހުންނަ އުޅަނދުތައްވެސް ބޭނުން ކުރަން ފަށާފައެވެ. އެންމެ ލޯބިވާ މީހާ މި ދުނިޔެއާއި ވަކިވެ ދިއުމުގެ ހިތާމައިގެ މައްޗަށް، އެހާ ދެރަ، ނިކަމެތި ޙާލެއްގައި އެމީހެއްގެ ޤަބުރު ވާތީ ފެނުމުން ހިތަށް ކުރާނެ އަސަރު، އެފަދަ މީހަކަށް ނޫނީ ބަޔާން ކޮށްދޭކަށް ނޭނގޭނެއެވެ.
ހޮސްޕިޓަލުތަކުގެ މޯގުތައް ފުރިފައި ވާ އިރު، ޣާއްޒާގައި ކަރަންޓާއި ފެނުގެ ސަޕްލައި ފަދަ އަސާސީ އަދި ޛަރޫރީ ޚިދުމަތްތައްވެސް ލިބެން ނެތްކަން ހަނދާނުން ކަސިޔާރުވިޔަ ނުދެއްވާށެވެ. އެބަޔަކަށް ވީ ގޮތަކުން، އަމިއްލަ ޖަނަރޭޓަރުތަކަށް ތެޔޮ އަޅައިގެން ހިނގާ ހޮސްޕިޓަލުތަކުންވެސް އިރުއިރުކޮޅާ ކަރަންޓުގެ ޚިދުމަތް މެދުކެނޑުމުގެ މައްސަލަ ދިމާވާތީ، އެ ހޮސްޕިޓަލުތަކުންވެސް މިހާރު ޤަބަރު ބާއްވަން ބަރޯސާ ވަނީ އައިސް ކްރީމް ލޮރީތަކަށެވެ. އިޒްރޭލުގެ މަޤްޞަދުތައް ޙާޞިލުވެ، ހިނދުކޮޅަކަށް ނަމަވެސް ޙަމަލާތައް ހުއްޓާލާ ދުވަހަކުން، ހިތްހަމަ ޖައްސާލުމަށް އައިސް ކްރީމްއެއް ބޯލަން ދާނެ ކުއްޖަކު، ޣައްޒާގައި ހުރެދާނެތޯއެވެ؟ މިއަދުގެ އެ ބިރުވެރި، އަދި އެހާ ހިތްދަތި މަންޒަރުތައް ލޯ ކުރިމަތިން ސިފަ ނުވެ ނުދާނެކަން ޤައިމެވެ.
ފެންނަ ފެނުމަށް އެއީ އައިސް ކްރީމް ލޮރީއެކެވެ. ބޭރުގައި ކުރަހާފައި ހުރީވެސް ކުޅު ދިޔާ ކޮށްލާ ފަދަ އައިސް ކްރީމްތަކެކެވެ. ނަމަވެސް، ލޮރީގެ ގެގަނޑު ހުޅުވާ ބަލާއިރު ހިތް ފަޅައިގެން ދެއެވެ. ކަފުންނަށް ލާ ފަސްތަނުން ބަނދެފައި ވާ ޤަބުރުތަކެވެ. ކޮންމެވެސް މީހަކު ދެ ލޯ ނޭދި އެދެމުން ދިޔަ ފުރާނައެކެވެ. އެ ކަފުނުގެ ތެރޭގައި އޮތީ އަހަރަމެން ނުވެސް ދަންނަ، ދުވަހަކުވެސް ނުދެކޭ މީހެކެވެ. އެކަމަކު، އެ މަންޒަރު ބަލާލަން ހިތަށް އިންތިހާ ތަދުވެއެވެ. ޣައްޒާގެ މަސްރަޙު ދެކެފި ކޮންމެ މީހެއްގެ ލޮލުން ކަރުނަ ފާއްދާލައެވެ. ހިތަށް ފުން އަސަރުތަކެއް ކުރުވައެވެ. އިންސާނިއްޔަތު ކަމުގެ ޒައްރެއްގެ މިންވަރުވެސް އެ ހިތެއްގައި ވާ ހަމަ ކޮންމެ މީހެއްގެ ޙާލަކީވެސް އެއީއެވެ.
