އިސްރާއީލުން ފަލަސްތީނުގެ ޣައްޒާ އަށް ދެމުންދާ ހަމަލާތަކާައި ގުޅިގެން ޣައްޒާގެެ ހާލަތު ގޯސްވެ ނިޔާވާ މީހުން އައިސްކްރީމް ޓްރަކްތަކަށް ލާން ޖެހޭ ހިސާބަށް ގޮސްފިއެވެ.
ހެލްތް އޮފިޝަލުންނާއި ހަވާލާދީ ރޮއިޓަރސްގައި ބުނެފައި ވަނީ ޣައްޒާފައި ނިޔާވާ މީހުންގެ އަދަދު އިތުރުވުމުގެ ސަބަބުން ނިޔާވާ މީހުން ބައިތިއްބަން އެކަށީގެންވާ ތަނެއް ހޯދުމުގައި ދަތިތަކާއި ކުރިމަތިލާންޖެހިފައިވާ ކަމަށެވެ. އެގޮތުން އިސްރާއީލުން ވައިގެ މަގުން އެ ސަރަހައްދޭ ހަމަލާތަކުގައި ނިޔާވާ މީހުންގެ ހަށިގަނޑު އައިސްކްރީމް ޓްރަކްތަކުގައި ރައްކާކުރަން އާއްމުން ވަނީ ފަށާފައެވެ. ސަބަބަކީ އިސްރާއީލުން މެދު ނުކެނޑި ޣައްޒާ އަށް ދެމުންދާ ހަމަލާތަކުގެ ތެރޭގައި ހޮސްޕިޓަލަށް ހަށިގަނޑު ގެންދިއުމުގެ ނުރައްކާ ވަރަށް ބޮޑުވުމެވެ. މީގެ އިތުރުން މީހުން ވަޅުލާ ސަހަރާތަކުގައި ވެސް މިހާރު މީހުން ވަޅުލާނެ ޖާގަ ގިނަ ފަހަރު ނުލިބޭ ކަމަށް ރިޕޯޓްތަކުން ފާހަގަވެއެވެ.
މީޑިއާތަކަށް މައުލޫމާތުދިން ފަލަސްތީނުގެ އާއްމުން ބުނީ ހޮޮސްޕިޓަލްތަކުގައި މޯގްގައި މީހުން ބައިތިއްބާ އިރު އެންމެ ގިނައިން ބައިތިއްބަނީ 10 މީހުންގެ ހަށިގަނޑުކަމަށެވެ. އެހެންކަމުން މިހާރު އައިސްކްރީމް ފްރީޒަރތައް ގަނެގެން ނިޔާވާ މީހުން އެތަކެއްޗަށް ލަމުންދާ ކަމަށް ވަނީ ބުނެފައެވެ.
އެފަދަ އައިސްކްރީމް ޓްރަކްތަކުގެ ބޭރުގައި ކުޑަކުދިން އައިސްކްރީމް ކާން ހެވިފައި ތިބި މަންޒަރު ފެންނަން ހުރި އިރު މިއީ އިހަކަށް ދުވަހާ ޖެހެންދެން ސުޕަރމަރކެޓްތަކުން އައިސްކްރީމް ޑެލިވަރކޮށްދޭން ބޭނުންކުރި ޓްރަކްތަކެވެ. ނަމަވެސް މިއީ މިހާރު ޣައްޒާގެ ހާލަތު އޮތްގޮތުން މޯރގްތަކަށް ވަނީ ބަދަލުވެފައެވެ. މީގެ އިތުރުން ޓެންޓުތަކުގައި ވެސް މަރުވެފައިވާ މީހުން ބައިތިއްބާފައިވާކަން ބައިނަލްއަޤުވާމީ މީޑިއާތަކުން ވަނީ ފާހަގަކޮށްފައެވެ.
ރިޕޯޓްތައް ބުނާގޮތުން މިހާތަނަށް އިސްރާއިލުން ވައިގެ މަގުން ދެމުންދާ ހަމަލާތަކުގައި 2300 މީހުން ވަނީ މަރާލާފައެވެ. އޭގެ ތެރޭގައި ގިނަ އަދަދެއްގެ ކުޑަކުދިން ވެސް ހިމެނެއެވެ. އަދި ޒަހަމްވި މީހުން އަދަދު 10000 އަށް ވުރެ މައްޗެވެ.
