ފީފާ އެވޯޑުގައި އެއް މިލިއަނަށް ވުރ ގިނަ މީހުން ވޯޓުލާފައިވާ ކަމަށް، އެ އިދާރާ އިން ހާމަކޮށްފި އެވެ.

އެވޯޑުގެ ހުރިހާ ކެޓަގަރީ އަކަށް ސަޕޯޓަރުންނަށް ވޯޓު ދެވޭއިރު، މިހާރު ވަނީ ވޯޓު ދިނުމުގެ މުއްދަތު ހަމަވެފަ އެވެ. މުއްދަތު ހަމަވީއިރު، އެއް މިލިއަނަށްވުރެ ގިނަ މީހުން ވަނީ ވޯޓުލައިފަ އެވެ. އެވޯޑަށް ނޮމިނޭޓުވި ކުޅުންތެރިން ފައިނަލް ކޮށްފައި ވަނީ މިދިޔަ ސެޕްޓެމްބަރު މަހު އެވެ. އޭގެ ފަހުން ސަޕޯޓަރުން އަންނަނީ ފީފާގެ އެންމެ މޮޅު އަންހެން ކުޅުންތެރިޔާ، އެންމެ މޮޅު ފީފާ ފިރިހެން ކުޅުންތެރިޔާ، އެންމެ މޮޅު ފީފާ އަންހެން ކޯޗު، އެންމެ މޮޅު ފީފާ ފިރިހެން ކޯޗު، އެންމެ މޮޅު ފީފާ އަންހެން ގޯލްކީޕަރު، އެންމެ މޮޅު ފީފާ ފިރިހެން ގޯލްކީޕަރު، ފީފާ ޕުސްކާސް އެވޯޑް އަދި ފީފާ ފޭން އެވޯޑަށް ވޯޓު ދެމުންނެވެ.

ކުރިއަށް އޮތް ހަފުތާތަކުގައި ފައިނަލިސްޓުން އިއުލާނު ކުރުމުގެ ކުރިން ހުރިހާ ވޯޓެއް ވެސް ގުނާނެ އެވެ. އެކަން ކުރުމަށް ފީފާ އިން ހަވާލުކޮށްފައި ވަނީ މިނިވަން އޮޑިޓު ކުރާ ބަޔަކާ އެވެ. އެއަށްފަހު ކޮންމެ ކެޓަގަރީއަކުން ހޮވޭ ކުޅުންތެރިންނާއި، ކޯޗުންނަށް އެވޯޑު ހަވާލު ކުރާނީ އެކަމަށްޓަަކައި ފީފާ އިން ބާއްވާ ޚާއްސަ ރަސްމިއްޔާތެއްގަ އެވެ.

މީގެ ތެރެއިން ފީފާގެ އެންމެ މޮޅު އަންހެން ކުޅުންތެރިޔާ، އަންހެން އެންމެ މޮޅު ގޯލް ކީޕަރު އަދި އެންމެ މޮޅު އަންހެން ކޯޗު ހޮވުމުގައި ބަލާނެ މުއްދަތަކީ، މިދިޔަ އަހަރުގެ އޯގަސްޓު މަހުގެ 22 ވަނަ ދުވަހުން ފެށިގެން، މިއަހަރުގެ އޯގަސްޓު މަހުގެ 23 ވަނަ ދުވަހަށެވެ. ފިރިހެން އެންމެ މޮޅު ކުޅުންތެރިޔާ، އެންމެ މޮޅު ގޯލް ކީޕަރު އަދި ފިރިހެން އެންމެ މޮޅު ކޯޗު ހޮވުމުގައި ބަލާނެ މުއްދަތަކީ، މިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހުން ފެށިގެން، މިއަހަރުގެ އޯގަސްޓު މަހުގެ 20 ވަނަ ދުވަހަށެވެ.

އެންމެ ފަހުން ފީފާ އިން ހޮވި އެންމެ މޮޅު ފިރިހެން ކުޅުންތެރިޔަކަށް ހޮވުނީ އާޖެންޓީނާގެ ކެޕްޓަން ލިއޮނަލް މެސީ އެވެ. މިއަހަރުގެ އެވޯޑަށް ވެސް މެސީ ވާދަކުރެ އެވެ. އަންހެން އެންމެ މޮޅު ކުޅުންތެރިޔަކަށް ހޮވުނީ ސްޕެއިންގެ އެލެކްސިއާ ފުޓޭޔާސް އެވެ. ފިރިހެން އެންމެ މޮޅު ގޯލް ކީޕަރަކަށް އާޖެންޓީނާގެ އެމިލިއާނޯ މާޓިނޭޒް ހޮވުނުއިރު، އަންހެން ކީޕަރަކަށް ހޮވުނީ އިންގްލެންޑުގެ މެރީ އިއާޕްސް އެވެ. ފިރިހެން އެންމެ މޮޅު ކޯޗަކަށް އާޖެންޓީނާގެ ލިއޮނަލް ސްކަލޯނީ ހޮވުނުއިރު، އަންހެން އެންމެ މޮޅު ކޯޗަކީ ސަރީނާ ވިއެމަން އެވެ.