މާލެސިޓީގެ ތަރައްގީއަށް ގިނަ މަސައްކަތްތައް ކުރެވިފައިވޭ
އިންތިހާބީ ރައީސް ޑރ. މުހައްމަދު މުއިއްޒު
މާލެސިޓީ ކައުންސިލަށް ގޮންޖެހުންތައް ކުރިމަތިނުވި ނަމަ މިހާރު ހުންނާނީ މާލޭގެ މަގުތައް ހެދި، ޕާކިން މައްސަލައަށް ބޮޑު ހައްލެއް ގެނެވިފައިކަމަށް އިންތިޚާބީ ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އިންތިޚާބީ ރައީސް މިހެން ވިދާޅުވީ މާލެސިޓީ ކައުންސިލްގެ މުވައްޒަފުންނާއި ބައްދަލުކުރެއްވުމަށް ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އިންތިޚާބީ ރައީސް ވިދާޅުވީ ގިނަ ގޮންޖެހުންތަކާއެކު ވެސް މާލޭގެ ތަރައްގީއަށް، މާލެސިޓީ ކައުންސިލްގެ ހުރިހާ މުވައްޒަފުން ވަރަށް ގިނަ މަސައްކަތްތައް ކޮށްފައިވާ ކަމަށެވެ. އަދި އެ ގޮންޖެހުންތައް ކުރިމަތިނުވި ނަމަ މަސައްކަތްތައް ކުރެވިފައި ހުންނާނީ މާ ފުރިހަމައަށް ކަމަށް އިންތިޚާބީ ރައީސް ވިދާޅުވިއެވެ.
އެގޮތުން މަގުތައް ހުންނާނީ ހެދިފައި ކަމަށާއި، ޕާކިންގެ މައްސަލައަށް ވެސް ބޮޑު ހައްލެއް ގެނައުމަށް ޕާކިން ބިލްޑިންތައް އެޅިފައި ކަަމަށް އިންތިޚާބީ ރައީސް ވިދާޅުވިއެވެ.
މީގެ އިތުރުން އިންތިޚާބީ ރައީސް ވިދާޅުވީ މަސައްކަތްތައް ކުރުމުގައި މާލެސިޓީ ކައުންސިލްގެ މަސައްކަތް ކުރާ ހުރިހާ މުވައްޒަފުންގެ ދައުރު ވަރަށް ބޮޑު ކަމަށެވެ.
ކުރިއަށް އޮތްތަނުގައި މާލެސިޓީގެ ކަންކަން ވަރަށް ފުރިހަމައަށް ކުރިއަށް ގެންދަވާނެ ކަމަށް އިންތިޚާބީ ރައީސް ވިދާޅުވެފައިވާއިރު، އެމަނިކުފާނުގެ ހައުސިން މިނިސްޓަރު ކަމުގައި ޕާކިންގެ މައްސަލަ ހައްލުކުރުމަށް މެކޭނިކަލް ޕާކިން ސިސްޓަމްތަކެއް ރާއްޖެއަށް ގެނެސްފައިވެއެވެ. އަދި މާލޭގައި 4 ޕާކިން ސިސްޓަމް ބެހެއްޓި އެވެ. ނަމަވެސް އެ ސިސްޓަމްތައް ޓެސްޓު ކުރުމަށްފަހު ހުރިހާ މެކޭނިކަލް ޕާކިން ސިސްޓަމްތައް ދަބަރަށް ފޮޅި ހަލާކުވެދިޔައީ ބޭނުން ނުކުރެވިއެވެ.
މީގެ އިތުރުން މާލޭގެ 11 މަގެއް އަލުން ހަދައި ފެންވަރު ރަނގަޅު ފެން ހިންދާ ނިޒާމެއް އެމަގުތަކުގައި ގާއިމް ކުރުމުުގެ މަޝްރޫއެއް 01 ސެޕްޓެންބަރު 2016 ގައި ފެށިއެވެ. ނަމަވެސް 2018 ވަނަ އަހަރު ސަރުކާރު ބަދަލުވެގެން ދިޔައިރު ވެސް މިމަޝްރޫއުގެ މަސައްކަތްތައް ނިމިފައިނުވެއެވެ.
