އެމެރިކާ މީހުން އަފްޣާނިސްތާނަށް އަހަރެއްގެ ތެރޭގައި އެޅި ބޮމަށް ވުރެ، ޣައްޒާ އަށް ހަފްތާ އެއްގެތެރޭ އިސްރާއީލުން އެޅި ބޮން ގިނަ - އިމްރާން
15 އޮކްޓޯބަރު 2023 | އާދީއްތަ 00:51އަދާލަތު ޕާޓީގެ ކެރިފޯރުންތެރިކަން ހުރި މިންވަރަކުން އައްޒާ އަށް އެހީތެރިވުމަށް މަސައްކަތްކުރާނެ ކަމަށް އިމްރާން ވިދާޅުވި
އަދާލަތު ޕާޓީގެ ރައީސް ޝެއިހް އިމްރާން އަބްދުﷲ
އެއް އަހަރު ދުވަހުގެ ތެރޭގައި އެމެރިކާ މީހުން އަފްޣާނިސްތާނަށް އެޅިވަރަށް ވުރެ ގިނަ ބޮން އެއް ހަފްތާގެ ތެރޭގައި ޣައްޒާ އަށް އިސްރާއީލް ސިފައިން އަޅާފައިވާ ކަމަށް އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ވިދާޅުވެއްޖެއެވެ.
އަދާލަތު ޕާޓީގެ މަޝްވަރާ މަޖިލީހުގައި ޣައްޒާ އަށް އިސްރާއީލުން ދެމުންދާ ހަމަލާތަކާއި މެދު ނިންމި ނިންމުންތަކަށް ފަހު ވާހަކަދައްކަވަމުން އިމްރާން ވިދާޅުވީ 40 ޓަނަށް ވުރެ ގިނަ ބޮން މިހާތަނަށް އައި އިރު ޣައްޒާ އަށް އަޅާފައިވާ ކަމަށެވެ. މިހާރު ޣައްޒާގެ ސަރަހައްދުތަކަށް ބަލާލުމުން ބައެއް ތަންތަން ފެންނަން ހުރީ ދުވަހަކު ދިރުމެއް ނެތް ތަންތަނުގެ ގޮތުގައި ކަމަށް އިމްރާން ވަނީ ވިދާޅުވެފައެވެ. ކުރިއަށް އޮތްތަނުގައި ވެސް މިހާރު ކަން ހިނގާ ގޮތަށް ބަލާ އިރު ޣައްޒާ އަށް އޮތީ އުނދަނގޫ ދުވަސްތަކެއްކަމަށް އިމްރާން ވަނީ ވިދާޅުވެފައެވެ.
އިމްރާން ވިދާޅުވީ ފަލަސްތީންގެ ޣައްޒާގައި ތިބި 2 މިލިއަނެއްހާ މީހުން އެ ސަރަހައްދު ދޫކޮށް ދެކުނަށް ބަދަލުވާން ދިން 24 ގަޑި އިރު ހަމަވެފައިވާ އިރު ބައެއް މީހުން ފުރާނަ ސަލާމަތްކުރުމަށް، ހަމަލާދެމުންދާ ސަރަހައްދުތައް ދޫކޮށް ދާ ކަަމަށެވެ. އެހެންނަމަވެސް އެ ސަރަހައްދުތައް ދޫކޮށް ދާ މިހުން ދަތުރުކުރަމުންދާ ސަވާރީތަކަށް ބޮން އަޅާ އެ މީހުން މަރަމުންދާ ކަމަށް އިމްރާން ވިދާޅުވިއެވެ. ފަލަސްތީންގެ ރައްޔިތުން ގޭގައި ތިއްބަސް މަގުތަކަށް ނުކުތަސް އެ މީހުންނަށް ސަލާމަތެއް ނެތް ކަމަށް އިމްރާން ވަނީ ވިދާޅުވެފައެވެ. އަދި 2000 އާއި ކައިރިކުރާ އަދަދަކަށް މީހުން މަރުވެފައިވާ އިރު އޭގެ ތެރޭގައި 400 އަށް ވުރެ ގިނަ ކުޑަކުދިންނާއި 300އެއްހާ އަންހެނުން ހިމެނޭ ކަމަށް ވެސް އިމްރާން ވަނީ ވިދާޅުވެފައެވެ. މީގެ އިތުރުން އިމްރާން ވިދާޅުވީ 8000 އަށް ވުރެ ގިނަ މީހުންނަށް ބޮޑެތި ޒަހަމްތައް ލިބިފައިވާ އިރު ބޭސްފަރުވާ ކުރެވޭނެ ގޮތެއް ނެތްކަަމަށެވެ.
ފަލަސްތީނުގެ ރައްޔިތުންނަކީ ހިތްވަރު ގަދަ ބައެއްކަމަށާއި ފަލަސްތީނުގެ އުންމަތަށް އެހީވުމަކީ މުސްލިމް އުންމަތުގެ އެންމެންނަށް އޮތް ކަމެއް ކަމެއް ކަމަށް އެމަނިކުފާނު ވިދާޅުވިއެވެ. ނަމަވެސް ދުނިޔޭގެ ވެރިންގެ މެދުގައި ވެސް ޣައްޒާ އަށް ލިބޭ އަނިޔާގެ ވާހަކަދައްކަމުން ނުދާކަމަށް ފާހަގަކުރައްވާ އިމްރާން ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އިރާދަކުރެއްވިއްޔާ އަދާލަތު ޕާޓީގެ ކެރިފޯރުންތެރިކަން ހުރި މިންވަރަކުން ޣައްޒާ އަށް އެހީތެރިވުމަށް މަސައްކަތްކުރާނެ ކަމަށާއި ވަކި ސިޔާސީ ޕާޓީއަކަށް ނުވަތަ ވަކި ޖަމިއްޔާއަކަށް އެކަމުގައި ނުބައްލަވާނެ ކަމަށް ވެސް އިމްރާން ވަނީ ވިދާޅުވެފައެވެ.
