ހައްޖުގެ ވެއިޓިން ލިސްޓް ވަރަށް ދިގު، 2030 ވަނަ އަހަރަށް މިހާރު ދަނީ ނަން ނޯޓު ކުރަމުން: ހައްޖު ކޯޕަރޭޝަން

ހައްޖުގެ ވެއިޓިން ލިސްޓް ވަރަށް ދިގު ކަމަށާއި، 2030 ވަނަ އަހަރަށް ނަން ނޯޓުކުރަމުން ދާކަމަށް ހައްޖު ކޯޕަރޭޝަނުން ބުނެފިއެވެ.

ރާއްޖެޓީވީގައި ވާހަކަފުޅުދައްކަވަމުން، ހައްޖު ކޯޕަރޭޝަންގެ ކޯޕަރޭޓް އެފެއާޒްގެ މެނޭޖަރު އާއިޝަތު ގާހިރު ވިދާޅުވީ ހައްޖު ކިއު ވަރަށް ދިގު ކަމަށާއި، މިހާރު ގާތްގަނޑަކަށް 6000ށްވުރެ ގިނަ މީހުން ކިއުގައި އެބަތިބި ކަމަށެވެ. ކިއު ދިގުވެފައިވަނީ ކޮވިޑް-19އާ ގުޅިގެން ކަމަށާއި، ދެ އަހަރު ފަހަތަށް ޖެހެން ޖެހުނު ކަމަށް އާއިޝަތު ވިދާޅުވިއެވެ.

އާއިޝަތު ވިދާޅުވީ ހައްޖަށް ދިއުމަށް މީހުން ނަން ނޯޓުކުރަމުން ދާކަމަށާއި، ނަން ނޯޓު ކުރަމުންދަނީ 800ގެ ކޯޓާއަށް ބެލުމަށްފަހު ކަމަށެވެ. އެގޮތުން ހައްޖަށް ދިއުމަށް އެދި ހުށަހަޅާ މީހުންގެ ތަރުތީބުން ނަން ނޯޓު ކުރަމުންދާ ކަމަށާއި، މިހާރު 2030 ވަނަ އަހަރަށް ނަން ނޯޓު ކުރަމުންދާ ކަމަށް އޭނާ ވިދާޅުވިއެވެ. 2030 ވަނަ އަހަރު ހައްޖަށް ދިއުމަށް މިހާރު އެއްކޮށް ފައިސާ ދައްކައިފިނަމަ ނުވަތަ 75 އިންސައްތަ ފައިސާ ދައްކައިފިނަމަ ކިޔުގައި ނަން ނޯޓު ކުރެވޭނެއެވެ.

ހައްޖު ކޯޓާ އިތުރުކުރުމަށް ކުރަމުންދާ މަސައްކަތްތަކަށް އިޝާރާތް ކުރައްވައި، މެނޭޖަރު ލީގަލް ކާމް ކޮންޕެނީ ސެކްރެޓަރީ އަބްދުﷲ ނާހިދު، ވިދާޅުވީ ކޯޓާ އިތުރުކުރުމަށް އަމަލީ ގޮތުން މަސައްކަތްތައް ކުރަމުންދާނީ އިސްލާމިކް މިނިސްޓްރީން، ސަރުކާރާ ގުޅިގެން ކަމަށެވެ. ނަމަވެސް ކޯޓާ އިތުރުކުރުމާ ގުޅޭގޮތުން އިސްލާމިކް މިނިސްޓްރީއާއެކު މަޝްވަރާކުރަމުން ދާކަމަށް އޭނާ ވިދާޅުވިއެވެ.

ސައުދީ ސަރުކާރުން ކޯޓާ އިތުރުކޮށްދެނީ ވެސް އެ ގައުމެއްގައި ދިރިއުޅޭ މުސްލިމުންގެ އާބާދީއަށް ބެލުމަށްފަހުއެވެ. 2022 ވަނަ އަހަރު މަދުން ކޯޓާ ލިބުނުނަމަވެސް އާއްމު ގޮތެއްގައި ކޯޓާ ދޭ މިންވަރަށް 2023 އަހަރު 1000 ކޯޓާ ދޫކޮށްފައިވެއެވެ.