އަސްކޮއި އުމްރާ ކުންފުނީގެ އުމްރާ ހުއްދަ ބާތިލްކޮށް، އުމްރާ އަށް ދެއްކި ފައިސާ އަނބުރާ ދިނުމަށް އަމުރުކޮށްފި
މިފަދަ ކަމެއް އިތުރު ފަރާތަކަށް ދިމާވެފައިވާ ނަމަ އެކަން އިނޮކޮމިކް ކްރައިމްގެ ނަމްބަރު 9790048 އަށް ގުޅައިގެން ހިއްސާކުރުމަށް އެދިފައިވޭ
ބައެއް އުމްރާވެރިން ފުރަން ދާ މަންޒަރު ފެންނަ ފޮޓޯ އެއް
އަސްކޮއި އުމްރާ ކުންފުނިން އުމްރާއަށް ގެންދާނެ ކަމަށް ބުނެ އޮޅުވާލައިގެން ފައިސާ ހޯދާފައިވާ މައްސަލަ އާއި ގުޅިގެން އެ ގްރޫޕްގެ އުމްރާ ހުއްދަ ބާތިލްކޮށް މައްސަލަ ފުލުހަށް ހުށަހަޅައިފިއެވެ.
އެކަން ހާމަކޮށް އިސްލާމިކް މިނިސްޓްރީން ނެރުނު ބަޔާނުގައި ބުނެފައި ވަނީ އެ ގްރޫޕުން އުމްރާއަށް ގެންދާނެ ކަމަށް ބުނެ ބައެއްގެ އަތުން ފައިސާ އަތުލުމަށް ފަހު އުމްރާ އަށް ގެންގޮސްފައި ނުވާ މައްސަލަ އެއް ހުށަހަޅާފައިވާ ކަމަށެވެ. އަދި އެ ފައިސާ ދެއްކި މީހުންގެ ޕާސްޕޯޓާއި މުހިއްމު ލިޔެކިޔުންތައް ހޯދުމަށް އެ ގްރޫޕްގެ އިސްވެރިޔާއަށް ގުޅަން ކުރި މަސައްކަތް ކާމިޔާބު ނުވާ ކަމަށް އާއްމުން ބުނެފައިވާ ކަމަށް އެ މިނިސްޓްރީން ބުނެއެވެ.
ހަމައެހެންމެ އަސްކޮއިގެ އިސްވެރިޔާއާ ރަސްމީކޮށް ކުރި އެއްވެސް މުއާމަލާތަކަށް ޖަވާބު ދީފައި ނުވާ ކަމަށާއި އެގްރޫޕްގެ ކުންފުންޏަށް ފޮނުވާފައިވާ އެއްވެސް ސިޓީއަކަށް ވެސް ޖަވާބު ނުދޭ ކަމަށް އެ ވުޒާރާ އިން ވަނީ ބުނެފައެވެ.
އެ ގްރޫޕާއި މެދު އަޅަން ނިންމާފައިވާ ފިޔަވަޅުތަކަށް ބަލާ އިރު އުމްރާއަށް ގެންދަން ދޫކޮށްފައިވާ ހުއްދަ ބާތިލްކުރުމާއި ޖޫރިމަނާކުރުމުގެ އިތުރުން، ކުންފުނީގެ ހިއްސާދާރުން ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިއުމުގެ ހުއްދަ ނުދިނުމަށް ވަނީ ނިންމާފައެވެ. ހަމައެހެންމެ އާއްމުން އުމްރާ ދަތުރަށް ދައްކާފައިވާ ފައިސާ އަނބުރާ ދިނުމަށް އެންގުމާއި، މި މައްސަލަ ޕޮލިހަށް މައްސަލަ ހުށަހެޅުން އެ ގްރޫޕާއި މެދު އަޅާފައިވާ ފިޔަވަޅުތަކުގެ ތެރޭގައި ހިމެނެއެވެ.
މީގެ ކުރިން މި މައްސަލަ އާއި ގުޅިގެން ފުލުހުން ބުނެފައި ވަނީ އަސްކޮއި ހައްޖު އެންޑް އުމްރާ ޓުއަރސް ޕްރައިވެޓް ލިމިޓެޑުން އުމްރާ އަށް މީހުން ގެންދާނެ ކަމަށް ބުނެ ބައެއްގެ އަތުން ފައިސާ ނަގާ، އުމްރާ އަށް ދިއުމުގެ އިންތިޒާމް ހަމަޖައްސައިދީފައި ނުވާ ކަމަށް ބުނާ މައްސަލަ އެއް ފުލުހުންގެ ސަމާލުކަމަށް އައިސްފައިވާ ކަމަށެވެ. މި މައްސަލަ އާއި ގުޅިގެން ކަމާއި ގުޅުން ހުރި އިދާރާތަކާއި މަޝްވަރާކޮށް، ފުލުހުންގެ ޚިދުމަތުގެ އިކޮނޮމިކް ކްރައިމް އިންވެސްޓިގޭޝަނުން މި މައްސަލަ ތަހުގީގުކުރަމުންދާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ އެ ގްރޫޕްގެ ފަރާތުން މިފަދަ ކަމެއް އިތުރު ފަރާތަކަށް ދިމާވެފައިވާ ނަމަ އެކަން އިނޮކޮމިކް ކްރައިމްގެ ނަމްބަރު 9790048 އަށް ގުޅައިގެން ނުވަތަ ކްރިމިނަލް އިންވެސްޓިގޭޝަން ބިލްޑިން އަށް ހާޒިރުވެ މައްސަލަ ހުށަހެޅުމަށް އެދޭ ކަމަށެވެ.
