އިސްރާއީލުން ރާއްޖެއަށް އެތެރެވުން މަނާކުރުމަށް، މަޖިލީހަށް ގަރާރެއް!

އިސްރާއީލުން ރާއްޖެއަށް މީހުން އެތެރެވުން މަނާކުރުމަށް ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

ބުރާސްފަތި ދުވަހު މި ގަރާރު ހުށަހެޅުއްވީ ރައްޔިތުންގެ މަޖިލީހުގެ ވިލިނގިލީ ދާއިރާގެ މެމްބަރު ސައުދު ހުސައިނެވެ. އެގޮތުން، އިސްރާއީލުން ފަލަސްތީނުގެ އެކި ސަރަހައްދުތަކަށް ދެމުންގެންދާ ނުރައްކާތެރި އުދުވާނީ ހަމަލާތައް ކުށްވެެރިކޮށް، އެ ހަމަލާތައް ވަގުތުން ހުއްޓާލުމަށާއި، ފަލަސްތީނުގެ ރައްޔިތުންނަށް އިސްރާއީލުން ދެމުންގެންދާ ލާއިންސާނީ އަނިޔާތައް ކުށްވެރިކޮށް އެއަނިޔާތައް ހުއްޓާލައި ފަލަސްތީނުގައި އިންސާނީ ހައްގުތައް ކަށަވަރުކޮށްދިނުމަށް އެ ގަރާރުގައި ވަނީ ގޮވާލާފައެވެ.

މީގެ އިތުރުން އިސްރާއީލުން ފަލަސްތީނުގެ ރައްޔިތުންގެ ކިބައިން ފޭރިގެންފައިވާ ބިންތައް މިނިވަންކޮށް، ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަގުވާމީ މުޖުތަމައަށް ގޮވާލައި، މަޖިލީހުން ދެކޭގޮތް ހާމަކުރުމަށްވެސް އެ ގަރާރުގައި ވަނީ ބަޔާންކޮށްފައެވެ.

މި ގަރާރުގައި ބުނެފައިވަނީ 1967 ވަނަ އަހަރު ކަނޑައެޅި ފަލަސްތީނުގެ ސަރަޙައްދީ އިމުގެ ތެރޭގައި ފަލަސްތީނުގެ މިނިވަން ދައުލަތެއް ގާއިމްކޮށް، އެ ދައުލަތުގެ ވެރިރަށަކީ އިރުމަތީ ގުދުސްކަމަށް ދިވެހިރާއްޖެއިން އަބަދުވެސް ގަބޫލުކުރާކަމަށެވެ. އިސްރާއީލުން ފަލަސްތީނުގެ އިތުރު ބިންތައް ފޭރިގަނެ އެބިންތަކަށް ވެރިވުމަކީ ފަލަސްތީނާއި އިސްރާއީލް ސުލްހަވެ، ވަކި ދެ ދައުލަތެއް ގާއިމްކުރުމަށް ކުރާ މަސައްކަތަށް އެޅޭ އިތުރު ހުރަހެއްކަމަށާއި، މި ލާއިންސާނީ ހަމަލާތަކުގައި ފަލަސްތީނުގެ ރައްޔިތުންނަށް ކަރަންޓާއި، ބޯފެނާއި އަދި ސިއްހީ ފަރުވާގެ ޚިދުމަތް ހުއްޓުވާލާފައި އޮތުމާއި، ކާބޯތަކެތި ޣައްޒާއަށް އެތެރެވިޔަ ނުދިނުމަށް ޣައްޒާ ވަށައިގެންވާ ހުރިހާ ޗެކް ޕޮއިންޓުތަކާއި ގޭޓުތައް ބަންދުކޮށްފައި އޮތް އޮތުންވެސް ވަނީ ކުށްވެރިކޮށްފައެވެ.

އިސްރާއީލުން މިހާރު ފަލަސްތީނަށް ދެމުން އަންނަ ހަމަލާތަކަކީ އެ ގައުމުގެ ރައްޔިތުންނާއި، ކުޑަކުދިންނާއި، މުސްކުޅިންނާއި ބަލި މީހުންނަނަށް ބެލުމެއް ނެތި، ފަލަސްތީނުގެ މުސްލިމް ދަރިފަސްކޮޅު ނައްތާލަން ހިންގާ އިންސާނިއްޔަތާ ޚިލާފު ބޮޑު ޖަރީމާއެއްކަންވެސް އެ ގަރާރުގައި ވަނީ ބަޔާންކޮށްފައެވެ. އަދި މި ހަމަލާތަކުގައި ބޭނުންކުރާ ހަތިޔާރުތަކުގެ ތެރޭގައި ބައިނަލްއަގުވާމީ މުއާހަދާތަކާއި ގާނޫނުތަކުން މަނާކޮށްފައިވާ ހަތިޔާރުވެސް ބޭނުންކުރަމުންދާއިރު، އެ އަމަލުތައް ހުއްޓުވުމަށް އދ.ގެ ސެކިއުރިޓީ ކައުންސިލާއި އިންސާނީ ހައްގުތައް ރައްކާތެރުިކުރުމަށް މަސައްކަތްކުރާ ހުރިހާ ފަރާތްތަކަށް ރާއްޖޭގެ ފަރާތުން އަޑުއުފުލުމަކީ މުހިންމު ކަމެއް ކަމަށްވެސް ވަނީ ބުނެފައެވެ.

އިސްރާއީލުން ދެމުން އަންނަ ލާއިންސާނީ ހަމަލާތަކާ ދެކޮޅުހެދުމުގެ ގޮތުން، ފަލަސްތީނުގެ ބިންތައް މިިނިވަންކޮށް، މެދުއިރުމަތީގައި ސުލްހަ ގާއިމުކުރެވެންދެން އިސްރާއީލުގެ ރައްޔިތުން ރާއްޖެ އެތެރެވުން މަނާކުރުމާއި، އިސްރާއީލުން އުފައްދާ އަދި އެކްސްޕޯޓްކުރާ ހުރިހާ ބާވަތެއް ރާއްޖެއަށް އެތެރެކުރުން މަނާކުރުމާއި، އިސްރާއީލާ ރާއްޖެއާ ދެމެދު އެއްވެސް ގުޅުމެއް އުފެދިފައިވާނަމަ އެފަދަ ހުރިހާ ގުޅުމެއް ވަގުތުން ސަސްޕެންޑް ކުރުމަށް، ސައުދު ހުށަހެޅުއްވި ގަރާރުގައި ވަނީ ގޮވާލާފައެވެ.