އެމެރިކާގެ އިންޓަ މިއާމީ އަށް ސީޒަން ނިމުނު ނަމަވެސް އެކުލަބަށް ކުޅޭ ދުނިޔޭގެ އެންމެ މޮޅު ކުޅުންތެރިޔާ އާޖެންޓީނާގެ ކެޕްޓަން ލަޔޮނަލް މެސީ ލޯނު އުސޫލުން އެއްވެސް ޓީމަކަށް ނުދާނެ ކަމަށް މަޝްހޫރު ކުޅިވަރު ނޫސްތަކުން ބުނަން ފަށައިފި އެވެ.
މި ގޮޮތުން އީއެސްފީއެން އާއި ބީބީސީ އަދި ރޮއިޓާސްގެ އިތުރުން ސްޕޭނުގެ މަޝްހޫރު ނޫސްވެރިން ވެސް ދަނީ މިކަން ޔަގީންކޮށްދެމުންނެވެ.
ލޯނު އުސޫލުން މެސީ ސައޫދީ ލީގަށް ނުވަތަ އޭނާގެ ކުރީގެ ކުލަބު ބާސެލޯނާ އަށް ހިނގައިދާނެ ކަމުގެ ވާހަކަތައް ދެކެވެން ފެށީ އިންޓަ މިއާމީ އަށް ސީޒަން ނިމި އަންނަ މާޗު މަހާ ހަމައަށް ވާދަވެރި މެޗެއް ނުކުޅެ މެސީ ހުންނަން ޖެހުމާއެކުގަ އެވެ.
ނަމަވެސް ސްޕޭނުގެ މަޝްހޫރު ނޫސްވެރިޔާ ގުއިލަމް ބަލާގޭ ވެސް ވަނީ މެސީ ޗުއްޓީ އަށް ނޫނީ ދާނެ ތަނެއް ނެތް ކަމަށް ބުނެފަ އެވެ. އަނެއްކޮޅުން އޭނާ ގެންދިއުމުގެ ޝައުގުވެރިކަން ބާސެލޯނާގައި ނެތް ކަން ވެސް ބަލްގޭ ޔަގީންކޮށްދެ އެވެ. ސަބަބަކީ އެކުލަބުގެ މާލީ ހާލަތު އެކަމަށް އަދިވެސް ތަންނުދޭތީ އެވެ.
ނަމަވެސް ސައޫދީ އަރަބިއާގެ ކުލަބުތަކުން ތިބީ ފުރުސަތު ފަހިވާނަމަ މެސީ ގެންދިއުމަށް ތައްޔާރަށެވެ. ސަބަބަކީ 2030 ވަނަ އަހަރުގެ ވޯލްޑްކަޕަށް ސައޫދީން ބިޑްކުރާއިރު އެކަމަށް ސައޫދީ ލީގު އިސްތިހާރު ކުރުމަށާއި އެލީގުގެ ވިދުން ގަދަކުރުމަށެވެ.
މެސީގެ ވާހަކަ ދެކެވެން ފެށިއިރު އޭނާ އަށް އަލުން ބާސެލޯނާގެ ޖާޒީ އެންމެ މެޗަކަށް ނަމަވެސް ލެވޭނެ ގޮތް ހެދުމަށް އިންޓަ މިއާމީގެ ވެރިން ތިބީ ތައްޔާރަށެވެ. އެކަން އެކުލަބުން ޔަގީންކޮށްދިނީ މެސީ ގާތްގަނޑަކަށް 20 އަހަރު ބާސެލޯނާ އަށް ކުޅެފައިވާތީވެ އެކުލަބުގެ ސަޕޯޓަރުންނަށް ރަސްމީކޮށް އަލްވަދާއު ކިއުމުގެ ފުރުސަތު ދިނުމުގެ ގޮތުންނެވެ.
