ޔަގީންކަން މާ ބޮޑުވެއްޖެނަމަ ރާއްޖެ މޮޅުވާނެ: ބަނގްލަދޭޝް ކޯޗު

މޮޅުވާނެ ކަމުގެ ޔަގީންކަން ބަނގްލަދޭޝް ކުޅުންތެރިންގެ ތެރޭގައި މާބޮޑުވެއްޖެނަމަ ވޯލްޑްކަޕް ކޮލިފައިންގައި މިރޭ ރާއްޖެ އަތުން ބަލިވެދާނެ ކަމަށް ބަނގްލަދޭޝްގެ ކޯޗު ހާވިއާ ކަބަރޭރާ ބުނެފި އެވެ.

ރާއްޖެ އައުމަށްފަހު ނޫސްވެރިންނާ ވާހަކަ ދައްކަމުން ސްޕޭނުގެ ކޯޗު ބުނީ މި އަހަރުގެ ޖުލައި މަހު ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖެ އަތުން މޮޅުވި ނަމަވެސް އެކަމުގެ އުފަލުގައި ތިބެގެން މި މެޗުން މޮޅުނުވާނެ ކަމަށެވެ.

ގަލޮޅު ދަނޑުގައި މިރޭ ކުޅޭ މެޗާ ބެހޭ ގޮތުން ކަބަރޭރާ ބުނީ ބަނގްލަދޭޝްއިން ދިވެހިރާއްޖެއާ މެދު ވަރަށް ބޮޑަށް ސަމާލުވެ ތިބެންޖެހޭނެ ކަމަށެވެ.

މި މެޗަކީ ރާއްޖެ މޮޅުވުމުން ވަރަށް މުހިންމު މެޗެކެވެ. އެއީ ކޮލިފައިންގައި މި ދެ ޓީމު ހަފުތާއެއް ފަހުން ބަނގްލަދޭޝްގައި ވެސް ކުޅެންޖެހޭތީ އެވެ. މި ދެ މެޗުން މޮޅުވާ ޓީމަކަށް ވޯލްޑްކަޕް ކޮލިފައިންގެ ގްރޫޕް ސްޓޭޖުން ފުރުސަތުލިބި ބަލިވާ ޓީމަމަށް ފުރުސަތު ބަންދުވާނެ އެވެ.