އަތޮޅު، ޒޯން އަދި ރީޖަނަލް މުބާރާތް އެފްއޭއެމްގެ ކަލަންޑަރުގައި ހިމަނަން ނިންމައިފި

ރީޖަނަލް އެސޯސިއޭޝަންތައް އުފެއްދުމުގެ މަޤުސަދުގައި ރާއްޖޭގެ ހުރިހާ ރަށްތަކަށް ހުޅުވާލައިގެން އަތޮޅު، ޒޯން އަދި ރީޖަނަލް ފުޓުބޯޅަ މުބާރާތް ނުވަތަ ލީގު، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކަލަންޑަރުގައި ހިމަނަން ނިންމައިފި އެވެ.

އެފްއޭއެމްގެ އަލަށް އިންތިޚާބުވި ހިންގާ ކޮމެޓީ އިން ވަނީ، އެ ހިންގާ ކޮމެޓީގެ ފުރަތަމަ ބައްދަލުވުން ހޯމަ ދުވަހު ބާއްވައިފަ އެވެ. އެ ބައްދަލުން ބާއްވާފައި ވަނީ އެފްއޭއެމްގެ ވަގުތީ އޮފީސް ހިންގަމުން އަންނަ، ގަލޮޅު ރަސްމީ ދަނޑުގަ އެވެެ.

އެފްއޭއެމް އިން ބުނެފައިވާ ގޮތުގައި ހިންގާ ކޮމެޓީގެ ފުރަތަމަ ބައްދަލުވުމުގައި ނިންމާފައި ވަނީ، އެފްްއޭއެމްގެ އަސާސީ ޤަވާއިދުގެ 86 ވަނަ މާއްދާގެ ނުވަ ވަނަ ނަންބަރު ބަޔާން ކުރާ ރީޖަނަލް އެސޯސިއޭޝަން އުފެއްދުމުގެ މަޤުސަދުގައި ރާއްޖޭގެ ހުރިހާ ރަށްތަކަށް ހުޅުވާލައިގެން އަތޮޅި، ޒޯން އަދި ރީޖަނަލް ފުޓުބޯޅަ މުބާރާތް ނުވަތަ ލީގު އެ އިދާރާގެ 2025/2026 ގެ ކަލަންޑަރުގައި ހިމަނައި، މިއަހަރުގެ ތެރޭގައި އެ މުބާރާތް ފެށުމަށެވެ.

މީގެ އިތުރުން އެ ބައްދަލުވުމުގައި ވަނީ، މިއަހަރަކީ ރާއްޖޭގެ ފުޓުބޯޅަ އަށް 75 އަހަރު ފުރޭ އަހަރު ކަމަށްވާތީ، އެކަން ކުލަ ގަދަ ގޮތެއްގައި ފާހަގަ ކުރުމަށް ވެސް ނިންމައިފަ އެވެ. އަދި އެފްއޭއެމްގެ އަސާސީ ޤަވާއިދުގައި ބަޔާން ކުރާ ގޮތުގެ މަތިން "ޑައިމަންޑްް ޖުބްލީ ކޮމެޓީ"ގެ ނަމުގައި އެކަމަށް ޚާއްސަ ކޮމެޓީއެއް އުފައްދަން ވަނީ ނިންމައިފަ އެވެ.

އެފްއޭއެމްގެ އައު ހިންގާ ކޮމެޓީ އިން ވަނީ، އެ އިދާރާގެ އަސާސީ ޤަވާއިދުގައި ބުނާ ގޮތުގެ މަތިން "ފުޓްސަލް އެންޑް ބީޗް ސޮކާ ކޮމެޓީ"ގެ ނަމުގައި ކޮމެޓީ އެއް އުފައްދަން ވެސް ނިންމައިފަ އެވެ.

މީގެ އިތުރުން އެފްއޭއެމްގެ އަސާސީ ޤަވާއިދުގައި ބަޔާން ކުރާ ސްޓޭންޑިން ކޮމެޓީ ތަކަށް ބޭނުންވާ މެމްބަރުންގެ ނަންތައް ހުށަހެޅުމުގެ ފުރުސަތާއި، އަލަށް އެކުލަވާލި ދެ ކޮމެޓީ އަކަށް ނަން ހުށަހެޅުމުގެ ފުރުސަތު އެފްއޭއެމްގެ ހުރިހާ މެމްބަރު ކުލަބުތަކަށް ވަނީ ހުޅުވާލައިފަ އެވެ.

އެ ކޮމެޓީ ތަކަށް ނަން ހުށަހެޅުމުގެ ސުން ގަޑި އަކީ، 2025 ވަނަ އަހަރުގެ އޯގަސްޓު މަހުގެ ތިން ވަނަ ދުވަހުގެ މެންދުރު ފަހު 14:00 ގެ ކުރިން ކަމަށް ވެސް އެފްއޭއެމް އިން ވަނީ ބުނެފަ އެވެ.

އެފްއޭއެމްގެ އަލަށް އެކުލަވާލެވޭ ފުޓުބޯޅަ ކަލަންޑަރާ މެދު މަޝްވަރާ ކުރެވި، ކޮމެޓީ ތަކަށް މެމްބަރުން އައްޔަން ކުރެވުމުން، ފުޓުބޯޅަ ކަލަންޑަރާ ދޭތެރޭގައި ގޮތެއް ނިންމުމަށް އެފްއޭއެމްގެ ހިންގާ ކޮމެޓީ އިން ވަނީ ނިންމައިފަ އެވެ.

ހިންގާ ކޮމެޓީގެ ފުރަތަމަ ބައްދަލުވުމުގައި ވަނީ، ޤައުމީ ޓީމުތަކަށް ބައިނަލްއަޤުވާމީ މުބާރާތްތަކެއް ކުރިއަށް ހުރި ދުވަސްތަކުގައި އޮތުމުން، ޤައުމީ ޓީމުގެ ކޯޗުންނާއި އޮފިޝަލުން ކަނޑައަޅާނެ ގޮތަކާމެދު މަޝްވަރާ ކޮށްފަ އެވެ. އަދި އަލަށް އެކުލަވާލެވޭ ކޮމެޓީތައް އެކުލަވާލެވުމުން ގޮތެއް ނިންމުމަށް ވެސް ވަނީ މަޝްވަރާ ކޮށްފަ އެވެ.

މިދިޔަ ހޮނިހިރު ދުވަހު އޮތް އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ވަނީ، އެ އެސޯސިއޭޝަންގެ ރައީސް ކަމަށް ޤައުމީ ޓީމުގެ ކުރީގެ ފޯވާޑު އަޙުމަދު ޠާރިޤު (ޓޮމް) އިންތިޚާބު ކޮށްފަ އެވެ. ޓޮމް އާއި އޭނާގެ ހިންގާ ކޮމެޓީ އަށް ވަނީ، ކޮންގްރެސްގައި ބައިވެރިވި މެމްބަރުންގެ ފުރިހަމަ ތާއީދު ލިބިފަ އެވެ.

އެފްއޭއެމްގެ ރައީސް ކަމުގެ ދެ ވަނަ ދައުރަކަށް ޓޮމް ވަޑައިގެންނެވީ ގިނަ ވައުދުތަކާ އެކު އެވެ. ޚާއްސަކޮށް އިނދަ ޖެހިފައިވާ އެފްއޭއެމް އަލުން ކޮޅަށް ޖަހައި، ރާއްޖޭގައި ގެއްލިފައިވާ ފުޓުބޯޅައިގެ ފޯރި އަލުން ގެނައުމަށް މަސައްކަތް ކުރައްވާނެ ކަމަށް ޓޮމް ވަނީ ވިދާޅުވެފަ އެވެ.