ދެ އަތޮޅަކުން 12 ސަރަހައްދެއް، ހިމާޔަތްކޮށްފައިވާ ސަރަހައްދުގެ ގޮތުގައި ކަނޑައެޅުއްވުމަށް ރައީސުލްޖުމްހޫރިއްޔާ ނިންމަވައިފި
މި ތަންތަން ހިމާޔަތްކުރުމަށް ނިންމަވާފައިވަނީ، ސަރުކާރުގެ ސްޓްރެޓީޖިކް އެކްޝަން ޕްލޭން 2019-2023ގެ ދަށުން
ވަޒީރުންގެ މަޖިލީހުގެ ބައްދަލުވުމުގެ ތެރެއިން
ފެލިދެއަތޮޅު (ވ) އާއި، މާޅޮސްމަޑުލު ދެކުނުބުރި (ބ) އަތޮޅުން ތިމާވެށީގެ ގޮތުން ފާހަގަ ކުރެވޭ 12 ސަރަހައްދެއް، ހިމާޔަތްކޮށްފައިވާ ސަރަހައްދުގެ ގޮތުގައި ކަނޑައެޅުއްވުމަށް ވަޒީރުންގެ މަޖިލީހުގެ މެންބަރުންގެ ލަފާފުޅާއެކު ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު މިއަދު ނިންމަވައިފިއެވެ.
އަންގާރަ ދުވަހު ބޭއްވެވި ވަޒީރުންގެ މަޖިލީހުގެ ޖަލްސާގައި، މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ހުށަހެޅުއްވި ކަރުދާހަށް މެންބަރުން މަޝްވަރާކުރެއްވުމަށްފަހު، ގާނޫނު ނަންބަރު 93/4 (ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނު)ގެ ދަށުން ހިމާޔަތް ކުރެވިފައިވާ ސަރަހައްދުތަކުގެ ގޮތުގައި ހަމަޖެއްސެވުމަށް ނިންމެވި ސަރަހައްދުތަކަކީ ވ. ކަވަރުފަޅު ސަރަހައްދާއި، ވ. ފޮއްތެޔޮ ސަރަހައްދާއި، ވ. ހިނގާކުޅީ ފިނޮޅު ސަރަހައްދެވެ. އަދި ވ. ތުނޑުހުރައާއި، ވ. ރުއްހުރި ހުރައާއި، ވ. ރަކީދޫ ކޯނަރާއި، ވ. ފުށިފަރު ފަރުގެ ސަރަހައްދާއި، ވ. ހުރާ ފަޅާއި، ބ. ހުރާފަރު ސަރަހައްދާއި، ބ. ދަރަވަންދޫ ތިލަ ސަރަހައްދާއި، ބ. ނެލިވަރު ސަރަހައްދާއި، ބ. އިންނަފުށީ ސަރަހައްދުވެސް އޭގެ ތެރޭގައި ހިމެނެއެވެ.
މިއީ ތިމާވެށީގެ ގޮތުން ޚާއްސަ ސިފަތަކެއް ލިބިގެންވާ، ދިރޭތަކެތީގެ ނަސްލުން މުއްސަނދިވެފައިވާ ގުދުރަތީ ރީތި މަންޒަރުތަކެއް ހިމެނޭ، ތިމާވެށީގެ ޚާއްސަ ޚިދުމަތްތަކަކާއި ވަސީލަތްތަކެއް ފޯރުކޮށްދޭ ސަރަހައްދުތަކެއް ކަމަށް ރައީސް އޮފީހުން ވަނީ ބުނެފައެވެ. މި ތަންތަން ހިމާޔަތްކުރުމަށް ނިންމަވާފައިވަނީ، ސަރުކާރުގެ ސްޓްރެޓީޖިކް އެކްޝަން ޕްލޭން 2019-2023ގެ ދަށުންނެވެ.
