ސުޕަލީގުގައި އިނގިރޭސި ކްލަބްތައް ދިޔަނުދޭން ބޮޑުވަޒީރު މަސައްކަތް ފައްޓަވައިފި
23 ޑިސެމްބަރު 2023 | ހޮނިހިރު 00:50ކުރީގެ ބޮޑު ވަޒީރު ބޮރިސް ޖޯންސަން އާއި ޕާލަމެންޓްގެ ގިނަ މެމްބަރުން މިކަމަށް ތާއީދު
އިނގިރޭސި ބޮޑު ވަޒީރު ރިޝީ ސުނާކް
ބައެއް ކުލަބުތައް އަޑީގައި ތިބެގެން އުފައްދަން މަސައްކަތް ކުރާ ޔޫރަޕިއަން ސުޕަ ލީގުގައި އިނގިރޭސި ކުލަބުތައް ބައިވެރިވިޔަ ނުދިނުމަށް އިނގިރޭސި ބޮޑުވަޒީރު ރިޝީ ސުނާކް މަސައްކަތް ފައްޓަވައިފި އެވެ.
މި ގޮތުން އިނގިރޭސި ސަރުކާރުން މަސައްކަތް ކުރަނީ އެ ގައުމުގެ ގާނޫނަށް ބަދަލުގެނައުމަށެވެ. އެއީ ބަޔަކު އަމިއްލަ އަށް އުފައްދާ މިފަދަ ލީގުތަކުގައި ބައިވެރިވުން އިނގިރޭސި ކުލަބުތަކަށް މަނާ ކުރުމަށެވެ. މިކަމަށް އިނގިރޭސި ޕާލަމެންޓްގެ ގިނަ މެމްބަރުން ވެސް ތާއީދުކުރެ އެވެ. އަދި ކުރީގެ ބޮޑު ވަޒީރު ބޮރިސް ޖޯންސަން ވެސް ވަނީ 2021 ވަނަ އަހަރު ސުޕަލީގް އުފެއްދުމުގެ ވާހަކަ އިވެން ފެށުމާއެކު މި ލީގާ ދެކޮޅު ހައްދަވައިފަ އެވެ.
ސުޕަލީގް އުފެއްދުމުގައި އިސްކޮށް ތިބީ ސްޕޭނުގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑެވެ. މި ލީގަކީ ޔޫރަޕުގެ ފުޓްބޯޅަ ޖަމިއްޔާ ޔޫއޭފާ އާއި ދުނިޔޭގެ ފުޓްބޯޅަ ޖަމިއްޔާ ފީފާއިން ދެކޮޅު ހަދާފައިވާ ލީގެކެވެ. ޔޫއޭފާއިން ވަނީ ސުޕަ ލީގުގައި ބައިވެރިވާ ކުލަބުތަކަށް އެ ޖަމާއަތާއި ފީފާގެ މުބާރާތްތަކުގައި ވާދަކުރަން ފުރުސަތު ނުދޭނެ ކަމަށް ބުނެފަ އެވެ.
ނަމަވެސް އިނގިރޭސި ކުލަބުތަކަކީ ސުޕަލީގު އުފެއްދުމުގައި ސިއްރު ސިއްރުން އެއްބަސްވުން ހެދި ބައެކެވެ. އިނގިރޭސި ސަރުކާރުން ގާނޫނަށް ބަދަލުގެނެސް މިކަން މަނާކުރަން އުޅެނީ ވެސް ކުލަބުތަކުން ސިއްރު އެއްބަސްވުމެއް ހަދައި ސުޕަލީގު ތައާރަފްކުރުމާއެއެކު އެކަމަށް 2021 ވަނަ އަހަރު އެއްބާރުލުން ދިނުމުގެ ސަބަބުންނެވެ.
ސުޕަލީގު އުފެއްދުމާ ފީފާ ޔޫއޭފާ ދެކޮޅު ހެދުމުން މި މައްސަލަ ފަހުން ވަނީ ކޯޓަށް ގެންގޮސްފަ އެވެ. އަދި ޔޫރަޕުގެ ކޯޓުން ނިންމާފައިވަނީ ޔޫއޭފާ އާއި ފީފާ އަށް މުބާރާތެއް އުފެއްދުން މަނާ ނުކުރެވޭނެ ކަމަށެވެ. މިއާއެކު ސުޕަލީގުގެ ފޯމެޓް އަލުން އެކުލަވާލައި ތައާރަފް ކުރި ނަމަވެސް ޔޫރަޕުގެ ގިނަ ކުލަބުތަކުން ވަނީ މި ލީގުގައި ބައިވެރިނުވާނެ ކަމަށް ބުނެފަ އެވެ. މި ގޮތުން އިނގިރޭސި ކުލަބުތަކުން ވެސް ވަނީ ސުޕަލީގަށް ތާއީދު ނުކުރާނެ ކަމަށް ބުނެފަ އެވެ.
ސުޕަލީގު އުފެއްދުމުގެ މަސައްކަތް ޔޫރަޕުގެ ބޮޑެތި ކުލަބުތަކުން ފެށީ ޗެމްޕިއަންސް ލީގުގެ ބަދަލުގަ އެވެ. އެއީ ގިނަ ފައިސާ ހޯދުމުގެ ނިޔަތުގަ އެވެ.
