ރެއާލް ދޫކޮށްލުމަށްފަހު މޮރާޓާ ޗެލްސީއަށް ސޮއިކޮށްފި

ރެއާލް މެޑްރިޑް ދޫކޮށްލުމަށްފަހު ސްޕެއިންގެ ފޯވާޑް، އަލްވަރާ މޮރާޓާ ޗެލްސީއަށް ސޮއިކޮށްފިއެވެ.

އުމުރުން 24 އަހަރުގެ މޮރާޓާ ޗެލްސީއަށް ބަދަލުވިކަން އެ ކްލަބުން އިއުލާންކޮށްފައިވާއިރު، އޭނާ އެ ކްލަބަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުން 70 މިލިއަން ޕައުންޑަށެވެ.

ޗެލްސީއަށް ބަދަލުވުމަށްފަހު ނޫސްވެރިންނަށް މައުލޫމާތު ދެމުން މޮރާޓާ ބުނީ އެ ކްލަބަށް ބަދަލުވުމުން އޭނާ ވަރަށް އުފާވެފައިހުރި ކަމަށާއި، އަދި ކްލަބަށް ގިނަ ލަނޑުތައް ޖަހައިދީ ބުރަ މަސައްކަތްކޮށް، ތަށިތައް ހޯދައިދޭން ބޭނުންވާ ކަމަށެވެ.

މޮރާޓާއާ ބެހޭގޮތުން ޗެލްސީގެ ކޯޗު އެންޓޯނިއޯ ކޮންޓޭ ބުނީ އޭނާ ދެކޭ ގޮތުގައި މޮރާޓާ އަކީ ކްލަބަށް ގެނެވުނު ރަނގަޅު ކުޅުންތެރިއެއް ކަމަށާއި، ޒުވާން ނަމަވެސް މޮރާޓާގެ ތަޖުރިބާ ހުންނާނެ ކަމަށެވެ. މީގެއިތުރުން ފާއިތުވެދިޔަ ދުވަސްތަކުގައި ރެއާލް އަދި ޔުވެންޓަސްގައިވެސް މޮރާޓާ މޮޅު ކުޅުމެއް ދައްކާފައިވާކަން އޭނާ ފާހަގަކުރިއެވެ.

މޮރާޓާގެ ސޮއި ޗެލްސީން ހޯދީ އޭނާ ހޯދުމަށް ޕެރިސް ސެއިންޓް ޖާމަން (ޕީއެސްޖީ)، އޭސީ މިލާން އަދި އާސެނަލް އިން މަސައްކަތްކުރަނިކޮށެވެ. މީގެއިތުރުންވެސް ގިނަ ކްލަބްތަކުން އޭނާ ހޯދަން މަސައްކަތްކުރިއެވެ.

ރެއާލް މެޑްރިޑުން 2010 ވަނަ އަހަރު ސީނިއާ ކްލަބް ލެވެލް ކެރިއަރު ފެށި މޮރާޓާ ރެއާލް ދޫކޮށްލުމަށްފަހު ޔުވެންޓަސްއަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި އޭނާ ވަނީ ދެ ސީޒަން ހޭދަކޮށްފައެވެ. އެމުއްދަތުގައި އެޓީމަށް ކުޅުނު 93 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލީގުގެ ދެވަނަވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލަށް ބަދަލުވީ މިދިއަ ސީޒަނުގައެވެ. އެގޮތުން އޭނާ ވަނީ އެޓީމަށް ކުޅުނު 43 މެޗުގައި 20 ލަނޑު ކާމިޔާބުކޮށްފައެވެ.