ލިވަޕޫލާއި ނިއުކާސަލްއަށް ވެސް މޮޅެއް ނުވެވުނު!

އިނގިރޭސި ޕްރިމިއަރ ލީގުގައި ލިވަޕޫލާއި ނިއުކާސަލް ޔުނައިޓެޑަށްވެސް މޮޅު ނުވެވި, ޕޮއިންޓަކުން ފުއްދާލަން ޖެހިއްޖެއެވެ.

ލީގުގައި ލިވަޕޫލަށް މޮޅުނުވެވި, ޕޮއިންޓަކުން ފުއްދާލަން ޖެހުނީ ބްރައިޓަންއާ އެއްވަރުވެގެންނެވެ. ނިއުކާސަލް ޔުނައިޓެޑް އެއްވަރުވީ ވެސްޓް ހޭމްއާ ވާދަކޮށެވެ. ދެ މެޗުވެސް އެއްވަރުވީ 2-2ންނެވެ. ބްރައިޓަންގެ ދަނޑުގައި ލިވަޕޫލް ކޮޅަށް ފުރަތަމަ ލަނޑު ޖަހައި ކުރިހޯދީވެސް ބްރައިޓަންއެވެ. އެޓީމަށް ކުރިހޯދައިދިނީ ސިމޯން އަޑިންގްރާއެވެ. ލިވަޕޫލުން މެޗުގެ ނަތީޖާ ހަމަހަމަކޮށް, ހާފްގެ ފަހު ފަސް މިނިޓުގެ ތެރޭގައި ކުރިވެސް ހޯދިއެވެ. 40 ވަނަ މިނިޓްގައި ނަތީޖާ ހަމަހަމަކޮށްދިނީ މުހައްމަދު ސަލާހުއެވެ. އަދި ފުރަތަމަ ހާފްގެ އިތުރު ވަގުތުގެ ފުރަތަމަ މިނިޓުގައި ލިބުނު ޕެނަލްޓީއަކުން ކުރި ހޯދައިދިނީވެސް ސަލާހުއެވެ. ލިވަޕޫލް މެޗުން މޮޅުވިޔަނުދީ ހުއްޓުވީ 78 ވަނަ މިނިޓްގައި ކެޕްޓަން ލެވިސް ޑަންކް ޖެހި ލަނޑުންނެވެ. އޭގެކުރިން ނަތީޖާ ފަރަގު ބޮޑުކުރަން ލިވަޕޫލަށް ފުރުސަތު ލިބުނުނަމަވެސް އޭގެ ބޭނުމެއް ނުކުރެވުނެވެ.

ނިއުކާސަލް ޔުނައިޓެޑް ވެސްޓްހޭމްއާ ވާދަކޮށް އެއްވަރުވި މެޗުގައި ދެ ލަނޑުވެސް ޖެހީ އިސާކްއެވެ. މިމެޗުގައިވެސް ފުރަތަމަ ލަނޑު ޖަހައި ކުރިހޯދީ ވެސްޓް ހޭމްއިންނެވެ. ވެސްޓް ހޭމްގެ ދަނޑުގައި ކުޅުނު މެޗުގެ އަށްވަނަ މިނިޓުގައި އެޓީމަށް ކުރިހޯދައިދިނީ ސުޗެކްއެވެ. އިސާކް ނިއުކާސަލްއަށް ނަތީޖާ ހަމަހަމަކޮށްދިނީ 57 ވަނަ މިނިޓުގައެވެ. އަދި 62 ވަނަ މިނިޓުގައި ދެވަނަ ލަނޑެއް ޖަހައި ކުރި ހޯދައިދިނެވެ. ނިއުކާސަލް ވިދިވިދިގެން ފަސްވަނަ މެޗުން މޮޅުވާން ދަނިކޮށް, އެކަން ހުއްޓުވީ މެޗުގެ ފަހު މިނިޓްގައި ކުޑޫސް ލަނޑު ޖަހައިގެންނެވެ. މިއީ ވެސްޓް ހޭމްއަށް ބަދަލުވެ އޭނާ ޕްރިމިއަރ ލީގުގައި ޖެހި ފުރަތަމަ ލަނޑެވެ.

ލީގުގައި ވުލްވްސްއާއި އެސްޓަން ވިލާ ވާދަކުރި މެޗުވެސް ނިމުނީ އެއްވަރުވެގެންނެވެ. އެމެޗު އެއްވަރުވީ 1-1ންނެވެ. ލީގު ތާވަލްގައި ވެސްޓްހޭމް އޮތީ 14 ޕޮއިންޓާއެކު ހަތްވަނާގައެވެ. ނިއުކާސަލް އޮތީ 13 ޕޮއިންޓާއެކު އަށްވަނާގައެވެ.