ޕޯޓުގެ ދާއިރާތަކަށް ދަރިވަރުންގެ މެދުގައި ޝައުގުވެރިކަން އިތުރު ކުރުމަށް މިމަހުގެ ޚާއްސަ ހަރަކާތެއް ކުރިއަށް ގެންދަން މޯލްޑިވްސް ޕޯޓްސް ލިމިޓަޑް (އެމްޕީއެލް) އިން ނިންމައިފިއެވެ.

އެމްޕީއެލުން ބުނީ މަސައްކަތުގެ ދާއިރާތަކުގެ މައުލޫމާތު ސްކޫލް ދަރިވަރުންނާ ހިއްސާކޮށް، ޕޯޓުގެ މަސައްކަތުގެ ދާއިރާތަކަށް ސްކޫލް ދަރިވަރުންގެ ޝައުގުވެރިކަން އިތުރުކުރުމުގެ ގޮތުން "ޕޯޓް އޯޕަން ޑޭ"ގެ ނަމުގައި ޚާއްސަ ހަރަކާތެއް 14 އޮކްޓޯބަރ 2023 ވަނަ ދުވަހު ބޭއްވުމަށް ނިންމާފައިވާ ކަމަށެވެ.

އުމުރުން 13 އަހަރާއި 18 އަހަރާ ދެމެދުގެ ސްކޫލް ދަރިވަރުންނަށް އަމާޒުކޮށްގެން ބާއްވާ "ޕޯޓް އޯޕަން ޑޭ" ބޭއްވުމަށް ހަމަޖެހިފައިވަނީ ދެ ދަން ފަޅިއަކަށް ބަހާލައިގެންނެވެ. އެމްޕީއެލުން ބުނީ ހެނދުނު ދަންފަޅި އޮންނާނީ 08:30 އިން 12:45 އަށެވެ. އަދި މެންދުރުފަހުގެ ދަންފަޅި އޮންނާނީ 12:00 އިން 16:15 އަށެވެ.

އެމްޕީއެލުން ބުނީ މި ހަރަކާތް ބޭއްވުމުގެ މައިގަނޑު މަގުސަދަކީ ޕޯޓުގެ ދާއިރާގައި މަސައްކަތް ކުރުމަށް ދަރިވަރުންގެ މެދުގައި ޝައުގުވެރިކަން އިތުރުކޮށް މި ދާއިރާގެ ކުރިއަށް ދެވެން ހުރި ކެރިއަރ ތަކުގެ މައުލޫމާތު ހިއްސާކުރުން ކަމަށެވެ. މީގެ އިތުރުން އެމްޕީއެލުން ކުރަމުންގެންދާ މަސައްކަތްތަކުގެ މައުލޫމާތުތައް ފޯރުކޮށްދީ ޕޯޓުގެ ދާއިރާގެ ހޭލުންތެރިކަން އިތުރުކޮށް، ކުންފުނީގެ ސްޓޭކް ހޯލްޑަރުންނާ އޮތް ގުޅުން އިތުރަށް ވަރުގަދަކުރުން ވެސް ހިމެނެއެވެ.

މި ހަރަކާތުގައި ބައިވެރިވާ ދަރިވަރުންނަށް މާލޭ ވިޔަފާރި ބަނދަރާއި ހުޅުމާލެ އިންޓަރނޭޝަނަލް ޓަރމިނަލް އަށް ޒިޔާރަތްކޮށް ޕޯޓުގެ މަސައްކަތް ހިނގަމުންދާ ގޮތް ބަލާލުމުގެ ފުރުސަތު ދޭނެއެވެ.

އެމްޕީއެލުން ބުނީ ސޭފްޓީ އެންޑް ސެކިއުރިޓީ ޑްރިލް އަކާއި ޕޯޓުގައި ބޭނުންކުރާ މެޝިންތައް ބޭނުންކުރާ ގޮތް ދަރިވަރުންނަށް ދައްކާލުމަށް ހަމަޖެހިފައިވާ ކަމަށެވެ. އަދި މި ހަރަކާތުގައި ބައިވެރިވާ ދަރިވަރުންގެ މެދުގައި ނެގޭ ގުރުއަތަކުން ހޮވޭ ތިން ދަރިވަރަކަށް ކުންފުނީގެ ފަރާތުން ލެޕްޓޮޕް ހަދިޔާކުރުމަށް ވެސް ވަނީ ނިންމައިފައެވެ.