ޕީޖީން އެދިގެން ޔާމީނުގެ އަޑުއެހުން ކެންސަލް
އަޑުއެހުން ކެންސަލް ކޮށްފައިވަނީ ދައުލަތުން އެދިގެން
ވ އާރަށު ހިޔާނާތުގެ އިސްތިއުނާފު މައްސަލަ
ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ޖަލަށްލާން ކުރި ހުކުމުގެ އިސްތިއުނާފު އަޑުއެހުން ކެންސަލްކޮށްފިއެވެ.
މި އަޑުއެހުން ތާވަލުކޮށްފައި އޮތީ އާދިއްތަ ދުވަހުގެ މެންދުރު 14:00 އަށެވެ. އެހެންނަމަވެސް އަޑުއެހުން ކެންސަލްކޮށްފައިވަނީ ދައުލަތުން އެދިގެންނެވެ.
މި އަޑުއެހުމަކީ ވ. އާރަށް ކުއްޔަށް ދިނުމުގެ މުއާމަލާތާ ގުޅިގެން ރިޝްވަތާއި މަނީ ލޯންޑްރިންގެ ކުށް ސާބިތުވެ ޔާމީން 11 އަހަރަށް ޖަލަށްލާފައިވާ މައްސަލައިގެ އިސްތިއުނާފީ އަޑު އެހުމެކެވެ.
މި މައްސަލައިގައި މީގެ ކުރިން ބޭއްވި އަޑުއެހުމެއްގައި ޔާމީނުގެ ފަރާތުން ވަނީ ގާނޫނުގައި ބުނެފައި އޮންނަނީ އިންތިޚާބުތަކަށް ކުރާ ޚަރަދުގެ ތަފްސީލު ކަމާބެހޭ އިދާރާތަކަށް ހިއްސާކުރަންޖެހޭ ވާހަކަ ކަމަށާއި، ސިޔާސީ މަސައްކަތް ކުރަން ހެޔޮއެދޭ ފަރާތްތަކުން ދޭ ފައިސާ ހާމަކުރާކަށް ނުޖެހޭނެކަމަށް ވިދާޅުވެފައެވެ. އެހެންނަމަވެސް ޔާމީނު ފައިސާ ދައުރުކޮށްފައިވާ ގޮތުން ފައިސާގެ އަސްލު އޮޅިގެން ދިޔަކަމަށް ދައުލަތުން ބުނެފައިވެއެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 26 ސެޕްޓެމްބަރު 2023 ގައެވެ. އެ އަޑުއެހުމުގައި އޮތީ، ޔާމީނުގެ ފަރާތްޕުޅުން ހުށަހަޅާފައިވާ މަނީ ލޯންޑަރިންގެ ކުށުގެ ދައުވާއާގުޅޭ އިސްތިއުނާފުގެ ބާކީ ބައި ހުށައެޅުމެވެ. ދައުލަތުންވެސް އެ ނުކުތާތަކަށް ރައްދު ދީފައިވެއެވެ.
މަނީ ލޯންޑަރިންއާއި ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެ، ޔާމީނަށް 11 އަހަރުގެ ޖަލު ހުކުމެއް ވަނީ އިއްވާފައެވެ. އަދި 5 މިލިއަން ޑޮލަރުން ވަނީ ޖޫރިމަނާވެސް ކޮށްފައެވެ. ނަމަވެސް ޔާމީނުގެ ފަރާތްޕުޅުން ހުށަހެޅި، ހުކުމް ތަންފީޒުކުރުން ފަސްކުރުމުގެ މައްސަލަ ބަލައި ހައިކޯޓުން ވަނީ، ޖޫރިމަނާއާގުޅޭ ބައިގެ ހުކުމް ތަންފީޒުކުރުން ފަސްކުރުމަށާއި، ޖަލު އަދަބު ތަންފީޒުކުރުން ފަސް ކުރެވެން ނެތް ކަމަށް ނިންމާފައެވެ.
ހައި ކޯޓުގައި މި މައްސަލަ ބައްލަވަނީ ތިން ފަނޑިޔާރުންގެ ބެންޗަކުންނެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު މުހައްމަދު ސަލީމެވެ. ދެން ތިއްބެވީ ފަނޑިޔާރު ހަސަން ޝަފީއު އާއި ފަނޑިޔާރު ހުޒައިފާ މުހައްމަދެވެ.
