އަލް އަޚްދޫދު ބަލިކޮށް، އަލް ޙިލާލް އެއް ވަނަ އަށް

ސައުދީ ޕްރޯ ލީގުގައި އަލް އަޚްދޫދާ ދެކޮޅަށް ކުޅުނު މެޗުން މޮޅުވެ، އަލް ޙިލާލް ލީގު ތާވަލްގެ އެއް ވަނަ އަށް ޖެހިލައިފި އެވެ.

ލީގުގައި މި ދެ ޓީމު ކުރިމަތިލީއިރު، އެއް ވަނައިގައި އޮތީ އަލް އަހްލީ ސައުދީ އެވެ. އަލް ހިލާލަށް އެއް ވަނަ އަށް ޖެހިލެވެން އޮތީ އެ މެޗުން މޮޅުވެގެންނެވެ. އެ މެޗުގައި އަލް ހިލާލުން ވަނީ 3-0 އިން އަލް އަޚްދޫދުގެ މައްޗަށް ކުރި ހޯދައިފަ އެވެ. މެޗު ފަށައިގެން 10 ވަނަ މިނެޓުގައި އަލް ޙިލާލަށް ލީޑު ނަގައިދިނީ މިކޭލް އެވެ. މެޗުގައި އަލް އަޚްދޫދަށް އެންމެ ބޮޑު ގެއްލުމެއް ދެއްކީ ފުރަތަމަ ހާފުގެ އިތުރު ވަގުތުގައި އެ ޓީމުގެ ސައީދު އަލް ރުބައީ އަށް ރަތް ކާޑު ދެއްކުމުންނެވެ. މެޗުގެ ދެ ވަނަ ހާފު އެ ޓީމުން ކުޅެން ޖެހުނީ އެއް ކުޅުންތެރިޔަކު މަދުކޮށެވެ. މެޗުގައި އަލް ޙިލާލްގެ ފަހު ދެ ލަނޑު ވެސް ޖެހީ ސާޖެޖް މިލިންކޮވިޗް ސްވިޗް އެވެ. އޭނާ ލަނޑު ޖެހީ މެޗުގެ 71 ވަނަ މިނެޓާއި، 83 ވަނަ މިނެޓުގަ އެވެ.

މޮޅާއެކު އަލް ޙިލާލް އެއް ވަނައިގައި އޮތީ ކުޅުނު ނުވަ މެޗުން 23 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އަލް އަހްލީ ސައުދީ އަށް ލިބެނީ 22 ޕޮއިންޓެވެ. ތިން ވަނައިގައި 19 ޕޮއިންޓާއެކު އަލް ނަސްރު އޮތް އިރު، ހަތަރު ވަނައިގައި އޮތް އަލް އިއްތިހާދަށް ވެސް ލިބެނީ 19 ޕޮއިންޓެވެ. އަލް ނަސްރު ކުރި ހޯދަނީ ފައިދާ ލަނޑުންނެވެ.