ފަލަސްޠީނުގެ ރައްޔިތުންނާއެކު ދިވެހިރާއްޖެ ދެމިއޮންނާނެ: ރައީސް
އެންމެންނަށް ހަމަޖެހުން ކަށަވަރުކޮށްދޭ ދެ ދައުލަތުގެ ހައްލަކަށް ގޮވާލަން
ރައީސް އިބްރާހިމް މުޙައްމަދު ސާލިޙު
ފަލަސްޠީނުގެ ރައްޔިތުންނާއި، ފަލަސްޠީނުގެ ރައްޔިތުންގެ ކަރާމާތާއި އަމިއްލަ އިޚްތިޔާރުގެ ޙައްޤުގައި ދިވެހިރާއްޖެ ދެމިއޮންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
އާދިއްތަ ދުވަހު ރައީސް ކުރެއްވި ޓުވީޓެއްގައި ވިދާޅުވީ އިސްރާއީލުން ފަލަސްތީނުގެ ދިފާއީ ބާރުނެތް މުޖުތަމައުތަކަށް ނުހައްގުން ބާރުގެ ބޭނުންކުރަމުންދާތީ އެކަން ކުށްވެރިކޮށް، އެންމެންނަށް ހަމަޖެހުން ކަށަވަރުކޮށްދޭ ދެ ދައުލަތުގެ ހައްލަކަށް ގޮވާލާ ގޮވާލުން އާ ކުރައްވާ ކަމަށެވެ.
ރައީސް މިފަދައިން ވިދާޅުވެފައިވާއިރު ފަލަސްތީންގެ ބިންތަކުން އިސްރާއިލުން ފައިބަން ދިވެހި ސަރުކާރުން ވެސް ވަނީ ގޮވާލާފައެވެ.
ހަމާސް ޖަމާއަތުން ވަނީ ހޮނިހިރު ދުވަހުގެ ހެނދުނު، އިސްރާއިލް ގަނޑިން 06:30 ހާއިރު، އެގައުމުގެ ދެކުނުގެ ސަރަހައްދުތަކަށް ވަރުގަދަ ހަމަލާތަކެއް ފޮނުވާލާފައެވެ. މިއީ މިފަހުގެ ތާރީހެއްގައި ހަމާސްއިން އިސްރާއިލަށް އަމާޒުކުރި އެންމެ ބޮޑު ހަމަލާއެވެ. މިހަމަލާގައި އިސްރާއިލްގެ 40 މީހުން މަރުވެ، އެތައް ސަތޭކަ ބަޔަކަށް ހޮސްޕިޓަލްތަކުގައި ފަރުވާދެމުންދާކަމަށް އެގައުމުގެ ކަމާބެހޭ އިދާރާތަކުން ހަމާކޮށްފައިވާއިރު، މިހަމަލާތަކާ ވިދިގެން އިސްރާއިލުން ވަނީ ގައްޒާއަށް ރައްދު ހަމަލާތަކެއް ދޭން ފަށައިފައެވެ.
އިސްރާއިލްގެ ބޮޑުވަޒީރު ހަމާސްއާ ދެކޮޅަސް ހަނގުރާމަ އިއުލާނުކުރައްވާފައިވާއިރު، އެގައުމުގެ ޑިފެންސް މިނިސްޓަރު ޔޯވް ގެލަންޓް ވަނި ހަމާސްއިން އެގައުމަށް ހަމަލާދޭން ފެށި ފެށުމަކީ އެޖަމާއަތައް ހެދުނު ވަރަށްބޮޑު ގޯހެއް ކަމަށް ވިދާޅުވެފައެވެ.
ހަމާސް ޖަމާއަތުގެ އިސް ލީޑަރެއް ވަނީ ހޮނިހިރު ދުވަހުގެ ހެނދުނު އެޖަމާއަތުން ގައްޒާއަށް އަމާޒުކުރި ރޮކެޓް ހަމަލާތަކަކީ، "އޮޕަރޭޝަން އަލް-އަޤްސާ ފްލަޑް"ގެ ފެށުންކަމަށް ބުނެ، އިސްރާއިލްގެ އިސްތިއުމާރީ ބާރާ ދެކޮޅަށް ތެދުވެ، ހަނގުރާމަ ކުރަން ފަލަސްތީންގެ ރައްޔިތުންނަށް ވަނީ ގޮވާލާފައެވެ. މިހާރު ފުދިއްޖެކަމަށާއި މިއީ ދުނިޔޭގައި ހިސާރުކުރެވިފައި އޮތް އެންމެ ފަހު ސަރަހައްދު މިނިވަން ކުރާނެ ވަރުގަދަ ހަނގުރާމަކަމަށްވެސް އޭނާ ވަނީ ބުނެފައެވެ.
