ސުލްހަ ގާއިމުވާން އޮތީ ޗައިނާގެ ބީއާރްއައި ތަންފީޒު ކޮށްގެން؟

ދުނިޔޭގެ 1 ނަމްބަރު ގައުމުގެ މަގާމަށް ފައި ވިއްދައިގެން ހަލުއި ދުވެލީގައި ގިނަ މަސައްކަތްތަކެއް ކުރަމުން އަންނަ ގައުމުތަކުގެ ލިސްޓުގެ އެންމެ ކުރިން ޖާގަ ހޯދާ އެއް ގައުމަކީ ޗައިނާއެވެ. ޗައިނާއިން އެކަން ކުރަނީ އެ ރޭހުގެ މުހިންމު ދުވުންތެރިންގެ ގޮތުގައި އެހެން ގައުމުތައްވެސް ބައިވެރިކޮށްގެންނެވެ. އެ ނޫން ގޮތަކަށް އެކަން ވާންވެސް ނެތީއެވެ. ރޭސް ކާމިޔާބުކުރުމަށް ޗައިނާއިން ބޭނުންކުރާ އެންމެ ވަރުގަދަ އެއް އުކުޅަކީވެސް، މި ދެންނެވި ފަދައިން އެތައް ޤައުމެއް ގުޅުވައިދޭ ބެލްޓް އެންޑް ރޯޑް އިނިޝިއޭޓިވް (ބީއާރްއައި) މަޝްރޫއެވެ.

ޗައިނާއިން ހުށަހަޅާފައިވާ ބީއާރްއައި މަޝްރޫއަކީ، އެ މަޝްރޫއުގައި ބައިވެރިވާ ގައުމުތަކުގެ މެދުގައި ސުލޫކީ އަދި ސަގާފީ ގުޅުންތައް ގާއިމްކުރުމަށް އެހީތެރިވެދޭ، އަދި ދުނިޔޭގެ ސުލްހައާއި ތަރައްގީއަށް މުހިންމު ވަސީލަތެއް ކަމަށް ވިދާޅުވެ އެންމެ ފަހުން ޗައިނާއަށް ތައުރީފުކުރެއްވި އެއް ރައީސަކީ ސޫރިޔާގެ ރައީސް ބައްޝާރުލް އަސަދެވެ.

2004 ވަނަ އަހަރަށްފަހު ޗައިނާއަށް ވަޑައިނުގެން ހުންނެވުމަށްފަހު ބައްޝާރު ވަނީ ދާދި ފަހުން ޗައިނާއަށް ދަތުރުފުޅެއް ކުރައްވައި، ޗައިނާގެ ރައީސް ޝީ ޖީންޕިންގްއާ ބައްދަލު ކުރައްވާފައެވެ. ހުސްވި ސެޕްޓެމްބަރު މަހު ޗައިނާގައި ޝީއާއެކު ކުރިއަށްގެންދެވި ބައްދަލުކުރެއްވުމުގައި ބައްޝާރު ވަނީ، ޗައިނާގެ ބެލްޓް އެންޑް ރޯޑް މަޝްރޫއަށް ސޫރިޔާއިން ފުރިހަމައަށް އެއްބާރުލުން ދީ ބައިވެރިވާނެކަމުގެ ޔަގީންކަން ޝީއަށް ދެއްވާފައެވެ. ޗައިނާގެ ރައީސް ޝީ، އެންމެ ފުރަތަމަ ބީއާރްއައި ހުށަހެޅުއްވީ 2013 ވަނަ އަހަރުގެ ތެރޭގައެވެ.

ގަދީމީ ސިލްކް ރޯޑް ވިޔަފާރި ރާސްތާގައި ހިމެނޭ މުހިންމު އެއް ގައުމުގެގޮތުގައި ބެލެވުނު ސޫރިޔާއިން ވަނީ މިދިޔަ އަހަރުގެ ޖެނުއަރީ މަހު، ބެލްޓް އެންޑް ރޯޑް އިނިޝިއޭޓިވްއާ ގުޅިފައެވެ.

ބައިނަލްއަގުވާމީ ފެންވަރުގެ އިސްނެގުންތަކަށް އަމާޒުކުރައްވައިގެން ޝީ ހުށަހަޅުއްވާފައިވާ ހުށަހެޅުއްވުންތަކަކީ މުހިންމު ކަންތައްތަކެއްކަން، ޗައިނާގެ ގައުމީ ޓީވީއަށް ދެއްވި ބަސްދީގަތުމެއްގައި ވެސް ބައްޝާރު ވަނީ ފާހަގަކުރައްވާފައެވެ. އެގޮތުން، ޝީގެ ހުށަހެޅުއްވުންތަކަކީ ގައުމެއްގެ އަމިއްލަވަންތަކަމަށް ނުރައްކާ ކުރިމަތިނުވާ ގޮތަށް އެއް ބަޔަކު އަނެއް ބަޔަކާ ގުޅުވައިދީ، ތަރައްގީ ހޯދައިދޭ ހުށަހެޅުއްވުންތަކެއްގެ ގޮތުގައި ބައްޝާރު ވަނީ ސިފަކުރައްވާފައެވެ.

ޕޮލިސީ ކޯޑިނޭޝަން ރަނގަޅުކުރުމާއި، ފެސިލިޓީތަކުގެ ގުޅުން ރަނގަޅުކުރުމާއި، ހުރަހެއް ނެތް ވިޔަފާރިއާއި، މާލީ ގުޅުންތައް ރަނގަޅުކުރުމާއި، ޓްރާންސް ކޮންޓިނެންޓަލް ފެންވަރުގައި ދޭދޭ މީހުންގެ މެދުގައި ބަދަލުކުރާ ބަދަލުކުރުންތައް ހަރުދަނާކުރުމުގެ މަގުސަދުގައި ޗައިނާއިން ބީއާރްއައި ހުށަހެޅީ 2013 ވަނަ އަހަރުއެވެ.