ފުޓުބޯޅަ އެސޯސިއޭޝަން އޮފް މޯލްޑިވްސް (އެފްްއޭއެމް) ހިންގުމުގައި ބައްސާމް އަދީލް ޖަލީލް ވަނީ އެތައް ގޮތަކުން އިހުމާލުވެފައި ކަމަށާއި، މިހާރު އުޅެނީ އައު ސަރުކާރުގެ ހިމާޔަތް ހޯދަން ކަމަށް އިބްރާހީމް އާމިރު (ސަލްސާ އާމިރު) ވިދާޅުވެއްޖެ އެވެ.
އެފްއޭއެމްގެ މައްސަލަތައް އިންތިހާއަށް ގޯސްވެ، އެ އިދާރާގެ ހިންގުން ބޮއްސުންލާފައި ވަނިކޮށް، ސޭވް އެފްއޭއެމްގެ ނަމުގައި ފެށި ޙަރަކާތުގައި އިސްކޮށް އުޅުއްވާ އާމިރު ވިދާޅުވީ، ތަކުރާރުކޮށް ބައްސާމް ވަނީ އެތައް ގޯހެއް ހައްދަވާފައި ކަމަށެވެ. އެގޮތުން ތަންތަނުން ޚިދުމަތް ހޯދުމަށްފަހު ދައްކަން ޖެހޭ ފައިސާތައް ނުދައްކާ އޮތްއިރު، އެ ފައިސާ ދެއްކުމަށް ޝަރުއީ ކޯޓުތަކުގެ ޙުކުމް އަންނަކަން އާމިރު ފާހަގަކުރެއްވި އެވެ. އޭގެ އިތުރުން މުވައްޒަފުންނަށް ދޭން ޖެހޭ މުސާރަ ނުދެވިގެން، ވަޒީފާއާ ބެހޭ ޓްރައިބުނަލްގައި ވެސް ބައިވަރު މައްސަލަތައް އޮތް ކަމަށާއި، ޕެންޝަން ފައިސާ ނުދައްްކައިގެން މައްސަލަ ފެންމަތިވެފައިވާ ކަމަށް ވެސް އާމިރު ވިދާޅުވި އެވެ.
އެވަރުގެ ކަންކަން ހިންގަަވާފައި ހުންނެވި ބޭފުޅަކު ސަރުކާރު ބަދަލުވި ވަގުތު ކުރައްވަން އުޅޭ ކަމަކީ، ދެން އުފެދެން އަންނަ ސަރުކާރުގެ ހިމާޔަތް ހޯދުން ކަމަށް އާމިރު ވިދާޅުވި އެވެ. އާމިރު މިހެން ވިދާޅުވީއިރު، ރިޔާސީ އިންތިޚާބު އިދިކޮޅު ޕީޕީއެމް/ޕީއެންސީ ކޯލިޝަން އިން ކާމިޔާބު ކުރުމާއެކު، ޖަލު ޙުކުމެއްގައި ހުންނެވި ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް ވަނީ ގޭ ބަންދަށް ބަދަލު ކޮށްފަ އެވެ. އެ ދުވަހު ރައީސް ޔާމީން ގެކޮޅަށް ގެނެވުނު ވަގުތު ބައްސާމް އެތަނުގައި ހުންނެވި އެވެ. އާމިރު ވިދާޅުވި ގޮތުގައި އެކަމަކީ ފުޓުބޯޅަ އާއިލާ އަށް އެއްވެސް ވަރަކަށް ބަލައި ގަނެވޭނެ ކަމެއް ނޫނެނެވެ. ހަމައެހެންމެ އެކަމުގައި ގިނަ ބަޔަކު ކަންބޮޑުވުން ފާޅު ކުރަމުން އަންނަ ކަމަށް ވެސް އާމިރު ވަނީ ވިދާޅުވެފަ އެވެ.
އެހެންވީމާ މިއީ ބަލައިގަނެވޭނެ ކަމެއް ނޫން. ދިވެހި ރައްޔިތުން، ފުޓުބޯޅަ އަށް ލޯބި ކުރާ އާއިލާ އިން ބުނަނީ ދެން ކޮންމެ ސަރުކާރެއް އައި ނަމަވެސް އެތަނުގައި (ބައްސާމް) ބަހައްޓައިގެން ނުވާނެ ކަމަށް. އެހެންވީމާ އެތަންތަނަށް ގޮސްގެން އެ އުޅެނީ ހިމާޔަތް ހޯދަން (އައު ސަރުކާރުގެ) އޭނަ. އެ ޖާގަ ދީގެން ނުވާނެ އެއްވެސް ފަރާތަކުން.އިބްރާހީމް އާމިރު (ސަލްސާ އާމިރު)
އައު ސަރުކާރުގެ ހިމާޔަތް ހޯދަން ބައްސާމް މަސައްކަތް ކުރެއްވި ނަމަވެސް، މިހާރު އިހުމާލުވެފަ ހުރި ކަންކަމުން އޭނާ އަށް ސަލާމަތް ނުވެވޭނެ ކަަމަށް އާމިރު ވަނީ ވިދާޅުވެފަ އެވެ. އެކަންކަމުގެ ޒިންމާ ބައްސާމް ނަންގަވަން ޖެހޭނެ ކަމަށާއި، ކޮންމެ ސަރުކާރެއް އައި ނަމަވެސް ބައްސާމް އަށް ދެން އެ މަގާމުގައި ހުރެވިގެން ނުވާނެ ކަމަށް ވެސް އާމިރު ވަނީ ވިދާޅުވެފަ އެވެ. އާމިރު ވިދާޅުވީ ތަކުރާރުކޮށް ބައްސާމް ގޯސް ހައްދަވަމުން ގެންދަވާއިރު، އޭނާ މަގާމުން ދުރުކުރުމަކީ ކުލަބުތަކުގެ އަތް މަތީގައި އޮތް ކަމެއް ކަމަށެވެ. އެގޮތުން ބައްސާމްގެ އިތުބާރު ނެތް ކަމަށް ކުލަބުންތަކުން ސޮއި ކުރުމާއެކު، އޭނާގެ އިތުބާރު ނެތް ކަމުގެ ވޯޓަކަށް ދާން ޖެހޭނެ ކަމަށް ވެސް އާމިރު ވިދާޅުވި އެވެ.
އާމިރު މިހެން ވިދާޅުވެފައިވާއިރު، އެފްއޭއެމްގެ މާލީ މައްސަލަ ތައްވަނީ ވަރަށް ބޮޑުވެފަ އެވެ. އެކަމާ ދެކޮޅަށް "ސޭވް އެފްއޭއެމް"ގެ ނަމުގައި މިހާރު އަންނަނީ ޙަރަކާތެއް ވެސް ހިންގަމުންނެވެ. އެ ޙަރަކާތުގައި ފުޓުބޯޅައިގެ ތަޖުރިބާކާރު ގިނަ ބޭބޭފުޅުން ހިމެނެ އެވެ.
